Xonobodda turizm salohiyatini rivojlantirish bo'yicha yirik loyiha amalga oshirilmoqda
2025-12-13 08:30:00 / Yangiliklar
Bugun viloyat hokimi Shuhratbek Abdurahmonov Xonobod shahrida bo‘lib, hududning turizm salohiyatini oshirish bo‘yicha amalga oshirilayotgan ishlar yuzasidan muhokamalar o‘tkazdi. Shuningdek, viloyat rahbari «Sun’iy ko‘l havzasini tashkil etish» loyihasi doirasida bugunga qadar bajarilgan ishlar bilan yaqindan tanishdi.
Ma’lumot o‘rnida: loyiha uchun Xonobod shahrining Kampirrovot mahallasidagi 104 gektar maydon ajratilgan. Dastur doirasida 25 gektarlik sun’iy ko‘l barpo etish, savdo va ko‘ngilochar markazlarini qurish, 3 ta ochiq plyaj hamda bir nechta “Akvapark”larni tashkil etish rejalashtirilgan.
Shu bilan birga, hududda 8 ta har biri 100 o‘rinli apart-otel, 200 o‘ringa mo‘ljallangan zamonaviy mehmonxona, sport maydonlari, aholi dam olish maskanlari va keng ko‘lamli yashil hududlar barpo etilishi ko‘zda tutilgan.
Viloyat rahbari obyektdagi ishlar bilan tanishar ekan, aniqlangan kamchiliklar bo‘yicha mas’ullarga topshiriq hamda kelgusida bajarilishi zarur bo‘lgan vazifalarni belgilab berdi.