Qoraqalpog'iston Respublikasi Amudaryo tumani hokimligi

6-oktabr sanasi Amudaryo tumanining olis va chekka hududlaridan biri — Uyshin mahallasi aholisi uchun unutilmas, tarixiy kunlardan biri bo‘ldi. Mahalla ahli uzoq yillar davomida orziqib kutgan yangi oilaviy shifokorlik punkti foydalanishga topshirildi.
    Mazkur zamonaviy tibbiyot maskani mahalla aholisi hayotida katta qulaylik yaratadi. Chunki ilgari Uyshin mahallasi aholisi Qipchoq shaharchasi hududidagi 1-sonli oilaviy poliklinikaga borib tibbiy xizmat olishga majbur edi. Poliklinika mahalladan 8–9 chaqirim uzoqlikda joylashgani, ayniqsa qishning izg‘irinli kunlarida yoki yozning jazirama issig‘ida transport vositasi topish mushkulligi sababli, bu yo‘l keksalar va yosh bolali ayollar uchun ayniqsa og‘ir kechardi. 
   Aholining ana shunday ehtiyojini inobatga olgan holda, saxovatpesha tadborkorning tashabbusi qo‘lab-quvvatlandi va Qoraqalpog‘iston Respublikasi Sog‘liqni saqlash vazirligi tomonidan Uyshin mahallasi hududida yangi tibbiy punkt qurish loyihasi tasdiqlandi. Eng e’tiborlisi shundaki, mazkur inshoot tadbirkor homiyligida barpo etildi — bu esa xususiy sektorning ijtimoiy sohadagi faol ishtirokining yorqin namunasi bo‘ldi.
     Ochilish marosimida tuman hokimligi mas’ullari, sog‘liqni saqlash tizimi rahbarlari, nuroniylar, keng jamoatchilik vakillari hamda mahalla aholisi ishtirok etdi. Tadbirda so‘zga chiqqanlar ushbu xayrli tashabbus uchun sahovatpesha tadbirkorga chuqur minnatdorchilik bildirib, uning mahalla aholisi farovonligi yo‘lida amalga oshirgan ezgu ishlarini yuksak e’tirof etdilar. Tadbirkorning xalq manfaati yo‘lidagi bunyodkorlik ishlari, nafaqat Uyshin mahallasi aholisi uchun qulaylik yaratdi, balki tadbirkorlikning ijtimoiy mas’uliyati, vatanparvarlik va mehr-oqibat fazilatlarining yorqin namunasiga aylandi.
    Bu kabi xayrli ishlar zamirida inson salomatligini asrash, jamiyat farovonligiga hissa qo‘shish kabi ezgu maqsadlar mujassam. Shuning uchun ham bu tashabbus jamoatchilik tomonidan e’tirof etilib, fidoyi tadbirkorning mehnatlari alohida qadrlandi. 
     Ramziy tasma kesilib, zamonaviy tibbiy jihozlar bilan ta’minlangan yangi bino o‘z faoliyatini boshladi. 
    Ushbu zamonaviy tibbiy punkt UZI, EKG apparatlari, tish davolash uskunalari, kompyuter texnikalari va boshqa ilg‘or tibbiy jihozlar bilan to‘liq ta’minlangan. Endilikda Uyshin mahallasi aholisi birlamchi tibbiy xizmatlardan o‘z mahallasining o‘zida, qulay va tezkor tarzda foydalanish imkoniga ega bo‘ldi.
     Bu nafaqat tibbiyot infratuzilmasining kengayishi, balki odamlar hayot sifatining oshishi, sog‘lom turmush tarzini targ‘ib etish yo‘lidagi navbatdagi muhim qadamlardan biridir.

Charos Arslonova, tuman hokimligining Axborot xizmati rahbari.