Qoraqalpog'iston Respublikasi Amudaryo tumani hokimligi

Mamlakatimizda so‘nggi yillarda olib borilayotgan keng qamrovli islohotlar davlat va jamiyat hayotining barcha sohalariga singib bormoqda. Xususan, adliya tizimida boshlangan yangilanish jarayonlari fuqarolarning huquq va erkinliklarini ta’minlash, huquqiy xizmatlarni yanada ommalashtirish va adliya organlarining mas’uliyatini oshirishga xizmat qilmoqda.
     2024-yil 24-may kuni qabul qilingan “Ma’muriy islohotlar doirasida Adliya organlari va muassasalarining mas’uliyatini yanada oshirish hamda ixcham boshqaruv tizimini shakllantirish to‘g‘risida”gi Prezident Farmoni adliya tizimidagi islohotlarning yangi bosqichini boshlab berdi. Ushbu hujjat orqali adliya organlari zimmasiga aholi manfaatlarini yanada samarali himoya qilish, davlat xizmatlarini ixcham va sifatli ko‘rsatish, shuningdek, joylarda huquqiy tarbiya va targ‘ibotni kuchaytirish kabi qator dolzarb vazifalar yuklatildi.
     Mazkur islohotlarning hududlarda qanday ijro etilayotgani bilan tanishish maqsadida O‘zbekiston Respublikasi Adliya vaziri Akbar Toshqulov Qoraqalpog‘iston Respublikasiga xizmat safarini amalga oshirdi. Safar davomida vazir Amudaryo tumanida bo‘lib, tuman Adliya bo‘limi faoliyatini o‘rgandi.
     O‘rganish jarayonida Qoraqalpog‘iston Respublikasi Adliya vaziri Elmurod Tursunov, vazirning birinchi o‘rinbosari Aman Prenov, Amudaryo tumani hokimi Sobir Xo‘jametov, tuman Adliya bo‘limi boshlig‘i Mansur Sadikov ham ishtirok etdilar.
     Dastlab aholining huquqiy muammolarini o‘rganish, ularni hal etish mexanizmlarini takomillashtirish va mahalla darajasida huquqiy targ‘ibot ishlarini samarali tashkil etish bo‘yicha amalga oshirilayotgan chora-tadbirlar bilan tanishildi. Shu bilan birga, mahalla fuqarolar yig‘inlari hamda davlat organlarining quyi bo‘g‘inlariga metodik yordam ko‘rsatish masalalari ham alohida muhokama qilindi.
     Qoraqalpog‘iston Respublikasi Adliya vazirining birinchi o‘rinbosari Aman Prenov respublika va tuman miqyosida adliya sohasida olib borilayotgan ishlar yuzasidan taqdimot o‘tkazdi. Unda aholining huquqiy savodxonligini oshirish, jinoyatchilik va huquqbuzarliklarning oldini olish, oilaviy muammolarni huquqiy mexanizmlar orqali hal etishga doir yangicha yondashuvlar tilga olindi.
     O‘zbekiston Respublikasi Adliya vaziri Akbar Toshqulov ham yig‘ilish ishtirokchilariga bir qator amaliy tavsiyalar berdi. Xususan, ovul va mahallalarda huquqbuzarliklarning oldini olish, aholi bandligini ta’minlash, ijtimoiy himoyaga muhtoj fuqarolarga huquqiy yordam ko‘rsatish orqali ularni qo‘llab-quvvatlash, oilaviy zo‘ravonlik va ajrimlarning oldini olish masalalari bo‘yicha vazifalar belgilab berildi.
     Shuni alohida qayd etish joizki, huquqiy targ‘ibot ishlari qanchalik kengaytirilsa, fuqarolar o‘z huquqlarini shunchalik yaxshi bilib, ularni himoya qila oladi. Adliya tizimidagi islohotlar nafaqat huquqshunoslar yoki davlat idoralari faoliyatiga, balki har bir fuqaroning hayotiga bevosita ta’sir etmoqda.
     O‘zbekiston Respublikasi Adliya vaziri Akbar Toshqulovning Qoraqalpog‘istonga tashrifi adliya tizimidagi islohotlarning joylardagi ijrosini kuchaytirish, aholiga bevosita yordam ko‘rsatish va mahallalarda huquqiy madaniyatni yuksaltirishga qaratilgan amaliy qadamlardan biri bo‘ldi. Zero, kuchli huquqiy poydevor – taraqqiyotning asosiy garovidir.

Charos Arslonova, tuman hokimligining Axborot xizmati rahbari.