Qoraqalpog'iston Respublikasi Amudaryo tumani hokimligi

25-sentabr kuni O‘zbekiston Respublikasi Suv xo‘jaligi vaziri Shavkat Xamrayev Qoraqalpog‘iston Respublikasining Amudaryo tumanida ommaviy sayyor qabul o‘tkazdi. Ushbu tadbir nafaqat hudud aholisining muammolarini hal etish, balki suv resurslaridan oqilona foydalanish, sohada olib borilayotgan islohotlarni tushuntirish hamda joylardagi amaliy muammolarga yechim topish uchun muhim muloqot maydoniga aylandi.
Tumanning Choyko‘l ovulida atshkil etilgan sayyor qabulda Qoraqalpog‘iston Respublikasi Vazirlar Kengashi Raisining qishloq va suv xo‘jaligi masalalari bo‘yicha o‘rinbosari Shuhrat Teshayev, Amudaryo tumani hokimi Sobir Xo‘jametov, Qoraqalpog‘iston Respublikasi Suv xo‘jaligi vaziri Baxtiyor Yusupov, mutasaddi idoralar vakillari, suv xo‘jaligi sohasi mutaxassislari, fermer xo‘jaliklari rahbarlari hamda suv iste’molchilari, aholi vakillari qatnashdi.
Vazir Shavkat Xamrayev o‘z chiqishida mamlakatimiz suv xo‘jaligi tizimida amalga oshirilayotgan keng ko‘lamli islohotlar haqida to‘xtalib, Prezident tashabbusi bilan qabul qilingan yangi farmon va qarorlarning amaliy ahamiyatini atroflicha tushuntirdi. Xususan, suv resurslaridan samarali foydalanish, ularni tejash va qayta taqsimlash, yangi texnologiyalarni joriy etish, mo‘l hosil yetishtirishda suvning to‘g‘ri boshqarilishi hal qiluvchi omil ekanini ta’kidladi.
Tadbir ochiq muloqot shaklida davom ettirildi. Unda hududdagi fermerlar, tadbirkorlar, mahalla faollari o‘z muammolari va takliflari bilan murojaat qildilar. Suv taqchilligi, irrigatsiya tarmoqlarini ta’mirlash, sug‘orish tizimlarida elektr ta’minoti, yangi quvurlar tortish kabi masalalar ko‘tarildi.
Qabul jarayonida jami o‘ndan ortiq murojaat tinglandi. Ulardan ko‘pchiligiga joyida hal etiladigan yechim topildi. Ayrim masalalar esa qo‘shimcha o‘rganishni talab etgani bois, mutasaddilarga aniq topshiriqlar berildi. Jumladan, Qoraqalpog‘iston Respublikasi Suv xo‘jaligi vaziri Baxtiyor Yusupov va Amudaryo tumani “Suv yetkazib berish xizmati” DM direktori Baxtiyor Davekov mas’ul etib belgilandi.
Qabul yakunida ishtirokchilar o‘z murojaatlari ijobiy hal etilganidan mamnun ekanliklarini bildirib, suv xo‘jaligi tizimi vakillariga minnatdorchilik izhor qildilar. “Eng muhimi – bizning ovozimiz eshitilayotganidan, muammolarimiz joyida hal qilinayotganidan xursandmiz”, – deya ta’kidladilar ular.
Darhaqiqat, suv – hayot manbai. Uning oqilona boshqarilishi nafaqat dehqonning mo‘l hosili, balki xalq farovonligi va yurt taraqqiyoti bilan chambarchas bog‘liq. Tumanimizda o‘tkazilgan ushbu sayyor qabul ham aynan shu ezgu maqsadlarga xizmat qildi.

Bugungi kunda davlatimiz tomonidan suv xo‘jaligini takomillashtirish, suv tejovchi texnologiyalarni keng joriy etish, mavjud resurslardan samarali foydalanish borasida keng ko‘lamli ishlar amalga oshirilmoqda. Bunday ochiq muloqotlar esa bu jarayonni yanada jadallashtirish, xalq bilan tizim o‘rtasida bevosita aloqani mustahkamlash uchun muhim omil bo‘lib xizmat qilmoqda. 

Charos Arslonova, tuman hokimligining Axborot xizmati rahbari.