Qoraqalpog'iston Respublikasi Amudaryo tumani hokimligi

Amudaryo tumanida ta’lim sohasida muhim voqea yuz berdi — tumanda zamonaviy “Ilk rivojlanish markazi” o‘z faoliyatini boshladi. Ushbu markaz tuman Maktabgacha va maktab ta’limi bo‘limi huzurida tashkil etilib, bolajonlarning ilk qadamlarini ilm-fan olamiga yetaklash, ularning har tomonlama rivojlanishi uchun qulay sharoit yaratishga qaratilgan.
Markazning ochilish marosimi tantanali tarzda tashkil etilib, respublika miqyosida qator sohalar rahbarlari ishtirok etdilar. Xususan, Qoraqalpog‘iston Respublikasi Maktabgacha va maktab ta’limi vaziri Gulistan Kojabayeva, tuman hokimi Sobir Xo‘jametov, O‘zbekiston Respublikasi Prezidenti huzuridagi Ijtimoiy himoya milliy agentligi Qoraqalpog‘iston Respublikasi boshqarmasi boshlig‘i Saylaubay Daniyarov hamda tuman Maktabgacha va maktab ta’limi bo‘limi boshlig‘i Yalg‘ash Shomuratovlar hamda soha mas’ullari ishtirok etdilar. Tadbir davomida mamlakatimizda so‘nggi yillarda ta’lim va ijtimoiy sohalarda amalga oshirilayotgan keng ko‘lamli islohotlar, xususan, maktabgacha ta’lim bilan qamrovni kengaytirish borasida qilinayotgan ishlarga alohida to‘xtalib o‘tildi.
Markazning bosh maqsadi — hali maktabgacha ta’lim tizimiga qamrab olinmagan bolalarni, xususan, “Kambag‘allik reyestri”dagi oilalar farzandlari va imkoniyati cheklangan 2–7 yoshli bolalarni bepul ta’lim jarayoniga jalb etishdir. Bu orqali nafaqat bolalar, balki butun jamiyat uchun katta imkoniyatlar eshigi ochiladi.
Zamonaviy, eng so‘nggi o‘quv-uslubiy vositalar bilan jihozlangan markazda yorug‘ va shinam sinf xonalari, xavfsiz o‘yin maydonchalari tashkil etilgan. Bu esa bolajonlarning nafaqat bilim olishi, balki sog‘lom, baxtiyor va quvnoq ulg‘ayishi uchun mustahkam zamin yaratadi. Dastlab 240 nafar bola markazga qamrab olinib, ta’lim jarayonlari ikki smenada, to‘rt soatdan olib boriladi.
Shuningdek, markazda inklyuziv ta’lim tizimi ham joriy qilinmoqda. Alohida parvarishga muhtoj bolalar uchun maxsus sharoit yaratilgan bo‘lib, individual o‘qitish jarayonlari uyga tashriflar orqali ham tashkil etiladi. Bu esa hech bir bolani ta’limdan chetda qoldirmaslik tamoyilini amalga oshirishga zamin yaratadi.
 Tadbir ishtirokchilari ta’kidlaganidek, ushbu tashabbus O‘zbekiston Respublikasi Prezidentining 2024-yil 23-sentabrdagi 330-sonli qarori ijrosi doirasida amalga oshirilmoqda. Qarorga muvofiq, 2025-yilda Amudaryo, Chimboy va To‘rtko‘l tumanlarida “Ilk rivojlanish markazlari” ish boshladi. Kelgusida esa bunday markazlar bosqichma-bosqich barcha tuman va shaharlarda tashkil etilishi rejalashtirilgan.
 Qiziqarli tomoni shundaki, ochilish marosimlari bir vaqtning o‘zida Chimboy va To‘rtko‘l tumanlarida ham bo‘lib o‘tdi. Ular onlayn platforma orqali Amudaryo tumanidagi marosimni bevosita kuzatib bordilar. Bu esa hududlararo tajriba almashinuvi va bir vaqtning o‘zida umumiy g‘oya ostida birlashishning yaqqol isbotidir.
 Markazlarda 3–6 yoshli bolalar uchun “O‘yin guruhlari”, 2–7 yoshdagi alohida ta’lim ehtiyojlari bo‘lgan bolalar uchun esa “maxsus maktabgacha ta’lim xizmati” tashkil etiladi.
Mazkur “Ilk rivojlanish markazlari” nafaqat bolajonlar uchun, balki butun jamiyat kelajagi uchun muhim ahamiyat kasb etmoqda. Chunki kelajakda jamiyatning ilmli, sog‘lom va barkamol bo‘lib ulg‘ayishi, aynan bugun tashlangan ana shunday qadamlar bilan chambarchas bog‘liqdir. 

Charos Arslonova, tuman hokimligining Axborot xizmati rahbari.