Bilimlar kuni — ezgu tashabbuslar bilan boshlandi
2025-09-04 17:20:00 / Yangiliklar
Taqdimot marosimida tuman hokimining o‘rinbosari, Oila va xotin-qizlar bo‘limi boshlig‘i Go‘zal Saburova hamda tuman hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Nodirbek Kamolov, shuningdek, tuman Maktabgacha va maktab ta’limi bo‘limi boshlig‘i Yalg‘ash Shomuratov ishtirok etib, o‘quvchilarga maktab formasini tantanali ravishda topshirdilar. So‘zga chiqqan mas’ullar yangi o‘quv yilini boshlayotgan aziz bolajonlarni samimiy tabriklab, ularga ilmiy izlanishda bardavomlik, yuksak marralarni zabt etish, katta orzular sari dadil intilish tilaklarini bildirdilar.
Bu ezgu tashabbus yoshlarda bilim olishga bo‘lgan mehrni yanada oshirish, ularni qo‘llab-quvvatlash, orzulari sari intilishlariga ko‘mak berish yo‘lidagi muhim qadamlardan biridir. Zero, har bir bola maktab formasini kiyar ekan, o‘zini kelajak sari dadil qadam tashlayotgan, jamiyat e’tiborida bo‘lgan yosh sifatida his qiladi.
Bayramlar arafasida mehr-muhabbat ulashish, insonlarning qalbini quvonchga to‘ldirish — eng savobli va eng ezgu amallardan biridir. Ayniqsa, ehtiyojmand insonlarni shod etish, ularning ertangi kuniga ishonch bag‘ishlash — bu nafaqat moddiy yordam, balki mehr, g‘amxo‘rlik va yuksak insoniy qadriyatlarning yorqin ifodasidir.
Shubhasiz, bugun o‘ziga yarasha kichik ko‘rinadigan, ammo kelajak uchun ulkan ma’naviy ahamiyat kasb etadigan bu tashabbus — ertangi kunimiz egalari bo‘lgan yoshlarning qalbida ishonch, orzu va intilishlar uchqunini uyg‘otadi. Ilmli, tarbiyali va komil insonlarni voyaga yetkazish esa nafaqat oila, balki butun jamiyatning sharafli va mas’uliyatli burchidir.
Bilimlar kuni bayrami mana shunday ezgu tashabbuslar, samimiy tabriklar, ota-onalarning shukronasi va farzandlarning beg‘ubor quvonchlari bilan boshlandi. Ishonamizki, tumanimizdagi barcha maktab o‘quvchilari yangi o‘quv yilida yurtimiz taraqqiyotiga munosib hissa qo‘shadigan, ilmiy yutuqlar sari intiladigan, ma’rifatli avlod vakillari sifatida ulg‘ayadilar.
Charos Arslonova, tuman hokimligining Axborot xizmati rahbari.