Mustaqillik bayrami shukuhida “Hokim kubogi”
2025-08-28 18:10:00 / Yangiliklar
Musobaqa davomida har bir mahalla jamoasi g‘alaba uchun bor kuchini safarbar etdi. Futbol maydonlarida qizg‘in, bir-biridan qiziqarli bahslar kechdi. Har bir o‘yinda nafaqat sportchilar, balki tomoshabinlar ham o‘z jamoasini qo‘llab-quvvatlab, haqiqiy sport bayrami muhitini yaratishdi.
Shiddatli bellashuvlar yakuniga ko‘ra 1-o‘rin — “To‘lqin” OFY jamoasi, 2-o‘rin — “A. Navoiy” MFY jamoasi, 3-o‘rin — “Kuyuk-ko‘pir” OFY jamoasi sovrindorlikni qo‘lga kiritdi.
27-avgust kuni bo‘lib o‘tgan tantanali taqdirlash marosimida g‘olib va sovrindor jamoalar diplom, medal va qimmatbaho sovg‘alar bilan taqdirlandi. Tadbirda tuman hokimi o‘rinbosari Nodirbek Kamolov so‘zga chiqib, jismoniy tarbiya va sportning inson salomatligidagi o‘rni, yoshlarning ma’naviy va jismoniy barkamolligini ta’minlashdagi beqiyos ahamiyati haqida alohida to‘xtaldi.
Nodirbek Kamolov o‘z so‘zida ushbu musobaqa sportchilar mahoratini sinovdan o‘tkazganini, yoshlarda bir-biriga hurmat, do‘stlik, hamjihatlik kabi fazilatlarni ham mustahkamlaganini ta’kidladi. “Sog‘lom avlod – yurt kelajagi, bizning eng katta boyligimizdir”, — dedi u o‘z nutqida.
Darhaqiqat, bugungi kunda mamlakatimizda sportni rivojlantirish davlat siyosatining muhim yo‘nalishlaridan biriga aylangan. So‘nggi yillarda barcha hududlarda zamonaviy sport inshootlari barpo etilmoqda, mahallalar kesimida sport maydonchalari tashkil qilinmoqda, yoshlarga sport bilan muntazam shug‘ullanish uchun keng imkoniyatlar yaratilmoqda.
Prezidentimiz tashabbusi bilan “Sog‘lom turmush tarzi” va “5 tashabbus” loyihalari asosida yoshlarni ommaviy sportga jalb etish, qizlar sportini rivojlantirish, iste’dodli sportchilarni qo‘llab-quvvatlash borasida keng ko‘lamli ishlar amalga oshirilmoqda. Bugun yoshlarimiz nafaqat respublika, balki xalqaro maydonlarda ham yurtimiz sharafini munosib himoya qilmoqda.
Tumanimizda tashkil etilgan “Hokim kubogi” musobaqasi ham ushbu yuksak islohotlarning amaliy ifodasidir. Zero, sport – sog‘liq garovi, birlik va do‘stlik ramzi, yoshlar tarbiyasining muhim maktabidir. Mustaqillik bayrami arafasida o‘tkazilgan bu kabi tadbirlar yoshlar qalbida Vatanga mehr, sog‘lom turmushga intilish va do‘stlik rishtalarini yanada mustahkamlaydi.
Charos Arslonova, tuman hokimligining Axborot xizmati rahbari.