Xalq deputatlari Amudaryo tuman Kengashining o‘n ikkinchi sessiyasi haqida axborot
2025-08-27 10:35:00 / Yangiliklar
Sessiyani Xalq deputatlari tuman Kengashi Raisi – tuman hokimi Sobir Xo‘jametov ochdi hamda olib bordi. Sessiya kotibligiga “14-Bo‘z yop” saylov okrugidan deputat Muzaffar Yeshchanovni tayinlash to‘g‘risidagi taklif deputatlar tomonidan ma’qullandi.
Sessiya kun tartibidagi “2025-yilda rejalashtirilgan qurilish-ta’mirlash ishlari to‘g‘risida”gi masala yuzasidan Amudaryo tumani hokimining qurilish, to‘siqlarsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari Bahodir Ernazarov hisobot berdi.
Hisobotda keltirilishicha, joriy yil davomida tuman bo‘yicha amalga oshirilayotgan qurilish ishlarining umumiy qiymati 800 mlrd. so‘mdan ortiqroqni tashkil etadi. O‘zbekiston Respublikasi Prezidentining 454-sonli qarori asosida jami 28,3 mlrd.so‘m mablag‘ evaziga 8 ta obyektda, shundan 2 ta maktab, 2 ta ichimlik suvi va kanalizatsiya, 2 ta irrigatsiya va melioratsiya, 1 ta prokuratura va 1 ta issiqlik ta’minoti binolarida qurilish-ta’mirlash ishlarini olib borilayotgan bo‘lib, bugungi kunga qadar ushbu obyektlardan 3 tasini foydalanishga topshirish choralari ko‘rilgan.
Sessiya kun tartibiga kiritilgan O‘zbekiston Respublikasi Vazirlar Mahkamasining “Xotin-qizlar muammolarini o‘rganish va hal etish tizimini yanada takomillashtirish chora-tadbirlari to‘g‘risida”gi 145-sonli qarorining tumandagi ijrosi to‘g‘risidagi masala yuzasidan tuman hokimi o‘rinbosari, Oila va xotin-qizlar bo‘limi boshlig‘i Go‘zal Saburova hisobot berdi.
Go‘zal Saburova o‘z hisobotida xotin-qizlarni qo‘llab-quvvatlash, ularning jamiyat hayotidagi faol ishtirokini ta’minlash, mavjud muammolarini tizimli ravishda hal etish va ularni ijtimoiy qo‘llab-quvvatlash maqsadida qator yo‘nalishlarda tizimli ishlar tashkil qilinayotgani xususida so‘z yuritdi. Xususan, joriy yilda 1 ming 65 nafar xotin-qizlarni kasbiy layoqati va qiziqishlaridan kelib chiqib turli xil yo‘nalishlarda kasb-hunarga yo‘naltirish belgilangan bo‘lib, shundan, bugungi kungacha 480 nafar xotin-qizlar kasb-hunarga yo‘naltirilgan. Tadbirkorlik qilish istagidagi 1 ming 736 nafar xotin-qizlarga tijorat banklari tomonidan tadbirkorlik qilish yoki biznesini kengaytirish maqsadida tijorat kreditlari ajratilib, ularning faoliyati qo‘llab-quvvatlangan.
Sessiya majlisi kun tartibidagi Amudaryo tumani mahalliy budjetining 2025-yil 6 oyi davomidagi ijrosi yuzasidan hisobot uchun so‘z tuman Iqtisodiyot va moliya bo‘limi boshlig‘ining moliya budjet masalalari bo‘yicha o‘rinbosari Saidabror Saidaxmedovga berildi. Hisobotda joriy davrda tuman mahalliy budjetining daromadlar rejasi jami 62 mlrd 885 mln 347 ming so‘m qilib belgilangan bo‘lib, ushbu reja jami 66 mlrd 162 mln 249 ming so‘mga, ya’ni 3 mlrd 276 mln 902 ming so‘mga, yoki 105,2 foizga ortig‘i bilan bajarilganligi qayd qilindi. Shuningdek, tuman mahalliy budjetidan hisobot davri davomida jami 82 mlrd 947 mln 215 ming so‘mlik mablag‘lar sarflanganligi qayd etildi.
Sessiya mobaynida O‘zbekiston Respublikasi Prezidentining “Yoqilg‘i-energiya resurslaridan noqonuniy foydalanish va behuda sarflanishining oldini olish hamda energiya samaradorligini oshirish bo‘yicha chora-tadbirlarni takomillashtirish to‘g‘risida”gi qarori ijrosi yuzasidan tuman “Energosavdo” bo‘limi boshlig‘i Jahongir Allaniyazov hisobot berdi.
Hisobotda energiya tejamkorlik va energiya resurslardan oqilona foydalanish orqali belgilangan chora-tadbirlarni bajarish natijasida 2025-yilning o‘tgan davrida prognozdagi iste’mol rejasiga nisbatan ancha kam miqdorda elektr energiyasi ishlatilgani xususida so‘z yuritildi.
Qayd etilishicha, joriy yilda tumanda jami 170,2 km elektr tarmoqlari va 58 ta transformator punktlarini mukammal ta’mirlash va 430,5 km elektr tarmoqlari va 162 ta transformator punktlarini joriy ta’mirlash rejalashtirilgan. Shu kungacha 135 km uzunlikdagi elektr tarmoqlari va 47 ta transformatorlarni mukammal ta’mirlash rejalashtirilgan bo‘lsa, amalda 127 km uzunlikdagi elektr tarmog‘i va 47 ta transformator punkti mukammal ta’mirlangan.
Sessiya kun tartibiga kiritilgan barcha masalalar, hisobot va axborotlar atroflicha muhokama qilinib, fikr-mulohazalar bildirildi va tegishli qarorlar qabul qilindi.
Shu bilan Xalq deputatlari tuman kengashining 12-sessiyasi o‘z ishini yakunladi.
Charos Arslonova, tuman hokimligining Axborot xizmati rahbari.