Qoraqalpog'iston Respublikasi Amudaryo tumani hokimligi

Bu boradagi ishlarni yanada jadallashtirish, ilg‘or tajribalarni yanada ommalashtirish maqsadida 24-avgust kuni Amudaryo tumanida ham qator seminarlar tashkil etildi. Seminarlarda Qoraqalpog‘iston Respublikasi Vazirlar Kengashi Raisining qishloq va suv xo‘jaligi masalalari bo‘yicha o‘rinbosari Shuhrat Teshayev, tuman hokimi Sobir Xo‘jametov, hokim o‘rinbosarlari, sohaga mas’ul tashkilotlar rahbarlari, mutaxassislar va fermer xo‘jaliklari egalari faol ishtirok etdilar.

Dastlabki seminar Qangli ovuli hududidagi “Mangitova Aziza” fermer xo‘jaligida o‘tkazildi. Tadbirda 2026-yil hosili uchun g‘alla ekish masalalari atroflicha muhokama qilindi.

Seminarda Qoraqalpog‘iston Respublikasi Vazirlar Kengashi Raisining qishloq va suv xo‘jaligi masalalari bo‘yicha o‘rinbosari Shuhrat Teshayev so‘zga chiqib, g‘alla ekish jarayonida qo‘llanilishi lozim bo‘lgan ilg‘or tajribalar, samarali agrotexnik tadbirlar hamda fermerlar oldida turgan ustuvor vazifalar yuzasidan batafsil to‘xtalib o‘tdi.

Shuningdek, fermerlar o‘z tajribalari bilan o‘rtoqlashib, yangi ekin uslublari, hosildorlikni oshirish va yer unumdorligini yaxshilash yo‘llari yuzasidan fikr-mulohaza yuritdilar.

Keyingi seminar Qipchoq paxta qabul qilish maskanida davom etdi. Unda yaqinlashib kelayotgan paxta yig‘im-terimi mavsumiga tayyorgarlik holati o‘rganildi. Yig‘ilganlar barcha texnikalarning mavsumga to‘liq shayligi, kombayn va agregatlarning ishchi holatga keltirilgani bilan yaqindan tanishdilar. Bu yilgi paxta yig‘im-terimini o‘z vaqtida va sifatli yakunlash uchun barcha zarur sharoitlar yaratilganini seminar ishtirokchilari amalda ko‘rdilar.

Tadbirda so‘zga chiqqanlar ta’kidlaganidek, paxta yig‘im-terimi qishloq xo‘jaligi sohasidagi yilning eng mas’uliyatli davri biri sanaladi. Hosilni o‘z vaqtida, sifatli va betalafot yig‘ib olishda tayyorgarlik jarayonlari, ayniqsa, texnikalarni to‘liq ishchi holatga keltirish nihoyatda muhim ahamiyat kasb etadi. Chunki paxta yig‘im-terimida har bir daqiqa, har bir texnika unumli ishlashi hosilning taqdirini belgilaydi.

Shularni inobatga olgan holda tumanda mavsumga jiddiy tayyorgarlik ko‘rilib, barcha mavjud kombaynlar, traktorlar va boshqa yordamchi agregatlar to‘liq ko‘zdan kechirildi, zarur ehtiyot qismlar almashtirildi hamda mexanik jihatdan shay holatga keltirildi. Bu esa kelgusi mavsumni betalofat o‘tkazish, hosilni qisqa fursatda yig‘ishtirib olish imkonini beradi.

Shuni ta’kidlash joizki, texnika vositalarining shayligi nafaqat hosilni yo‘qotishsiz yig‘ib olishga, balki mehnat unumdorligini oshirish, xarajatlarni kamaytirish va yakunda paxta sifatini yuqori darajada saqlab qolishga xizmat qiladi. Ayniqsa, mexanizatsiya darajasi yuqori bo‘lgan hududlarda terim jarayonlari ancha yengil, samarali va tejamkor kechadi.

Seminarlarning keyingi manzili Choyko‘l ovuli hududidagi “Jayxun Choyko‘l” fermer xo‘jaligi bo‘ldi. Bu yerda 2025 yil hosili uchun ekilgan paxta maydonlarida defoliatsiya qilish ishlariga alohida e’tibor qaratildi. Paxta bargini to‘kish orqali hosilni tez pishirish va sifatli yig‘ib olish, terim jarayonida mehnat samaradorligini oshirishda defoliatsiyaning ahamiyati alohida qayd etildi.

O‘tkazilgan uchrashuvlar jarayonida fermerlar va mutaxassislar o‘zaro tajriba almashdilar, yangicha yondashuvlar bo‘yicha maslahatlar berdilar. Eng muhimi, bunday seminarlar sohaga oid muammolarni joyida o‘rganish va tezkor hal qilish imkonini beradi. Bu esa, albatta, qishloq xo‘jaligi rivojida samaradorlikni oshirishga xizmat qiladi.

Bugun yurtimizda qishloq xo‘jaligi sohasi oldiga qo‘yilgan maqsadlar ulkan. Hosildorlikni oshirish, zamonaviy agrotexnologiyalarni joriy etish, ekologik toza mahsulot yetishtirish, eksport salohiyatini kuchaytirish – bularning barchasi xalqimiz farovon hayot kechirishi uchun mustahkam zamin yaratadi. O‘tkazilgan seminarlar esa bu maqsadlarga erishishda muhim vosita bo‘lib xizmat qilishi shubhasiz.

Charos Arslonova, tuman hokimligining Axborot xizmati rahbari.