Tashabbuskor ayol – yurt farovonligi yo‘lida doim harakatda
2025-07-25 10:30:00 / Yangiliklar
Uning tadbirkorlik yo‘li 2008-yilda, onasi bilan birga kuniga bor-yo‘g‘i 100 dona non va patir yopishdan boshlangan. Vaqt o‘tishi bilan bu kichik ishbilarmonlik tashabbusi ulkan maqsad va keng miqyosdagi ishlab chiqarish korxonasiga aylandi. Bugun u rahbarlik qilayotgan korxonalar non va non mahsulotlari ishlab chiqarishga ixtisoslashgan “Ravshanbek Yulduzxon” MCHJ va sut mahsulotlari ishlab chiqaradigan “Kamron Gold Media” MCHJlarda 33 nafar yurtdoshimiz, ayniqsa, ijtimoiy himoyaga muhtoj ayollar va ishsiz fuqarolar uchun doimiy ish o‘rni yaratilgan muhim maskanga aylangan.
Dildora Xayitboyeva mamlakat rahbariyatining tadbirkorlikni rivojlantirish borasidagi e’tibor va qo‘llovini to‘g‘ri tushunib, amalda foydalana oldi. O‘zbekiston Respublikasi Prezidentining “Qoraqalpog‘iston Respublikasida tadbirkorlik, innovatsion texnologiyalar va infratuzilmalarni jadal sur’atlarda rivojlantirish orqali aholi farovonligini oshirishning qo‘shimcha chora-tadbirlari to‘g‘risida”gi 213-sonli Farmoni asosida ajratilgan 200 ming AQSH dollari miqdoridagi imtiyozli kredit hisobiga Xitoy Xalq Respublikasidan zamonaviy dastgoh va asbob-uskunalarni olib keldi. Bu esa korxonaning texnik quvvatini oshirib, mahsulot turini kengaytirish va sifatini yaxshilash imkonini berdi.
Bugungi kunda korxonada 10 xildan ortiq sifatli sut mahsulotlari ishlab chiqarilmoqda. Har kuni 600 litrdan ziyod sut qayta ishlanadi. Eng e’tiborlisi, ishlab chiqarilgan mahsulotlar tumandagi davlat maktabgacha ta’lim tashkilotlariga shartnoma asosida yetkazib beriladi. Korxonaning o‘ziga qarashli 4 ta yetkazib berish avtomobili mavjud bo‘lib, mahsulotlar iste’molchilarga shu kunning o‘zida yetkaziladi. Mang‘it dehqon bozorida tashkil etilgan do‘kon va yarmarkalarda esa aholiga mahsulotlar arzon va hamyonbop narxlarda sotilmoqda.
Tadbirkor Dildora Xayitboyevaning kelgusidagi rejalari ham katta. Tumandagi har bir mahallada aholi uchun qulay va sifatli xizmat ko‘rsatish maqsadida sut mahsulotlari, non va un mahsulotlarini sotuvchi shoxobchalar tashkil etish niyatida. Bu esa, bir tarafdan, aholiga qulaylik yaratsa, boshqa tarafdan yangi ish o‘rinlari ochilishiga xizmat qiladi.
Alohida ta’kidlash lozimki, Dildora Xayitboyeva faqat iqtisodiy muvaffaqiyatlar bilan emas, balki ijtimoiy mas’uliyat bilan ham namuna bo‘la oladi. Onalar va bolalar salomatligini mustahkamlash, ayniqsa, yod tanqisligining oldini olish maqsadida yodlangan funksional un mahsulotlarini ishlab chiqarishni yo‘lga qo‘ydi va bu un mahsulotini Amudaryo tumani aholisi orasida keng yoyishga kirishdi.
Uning tashabbuslari, ijtimoiy loyihalardagi faolligi, “Ayollar daftari”ga kiritilgan ayollarni ish bilan ta’minlash borasidagi harakati tahsinga loyiq. Bundan tashqari, Dildora Xayitboyeva “Hamroh” tadbirkor ayollar maktabi a’zosi sifatida doimiy ravishda o‘z bilim va tajribasini oshirib bormoqda. U ko‘plab respublika va xalqaro investitsiya forumlarining faol ishtirokchisi bo‘lib, xorijiy mutaxassislar bilan tajriba almashmoqda.
Bugun Dildora Xayitboyeva singari mehnatsevar, fidoyi, tashabbuskor ayollar tufayli Qoraqalpog‘iston iqtisodiyoti va ijtimoiy hayotida ijobiy o‘zgarishlar ro‘y bermoqda. Ularning har biri jamiyatning har bir qatlamiga, ayniqsa, ayollar va yoshlar hayotiga yangi yo‘nalish, yangi imkoniyat olib kiryapti.
Charos Arslonova, tuman hokimligining Axborot xizmati rahbari.