Amudaryo tumanida g‘alla yig‘im-terimi boshlandi
2025-06-07 11:30:00 / Yangiliklar
Seminarda tuman hokimi Sobir Xo‘jametov so‘zga chiqib, bu yilgi g‘alla mavsumi uchun yaratilgan shart-sharoitlar, hosildorlik darajasi va rejalashtirilgan natijalar xususida batafsil to‘xtalib o‘tdi. U o‘z nutqida qishloq xo‘jaligi tarmog‘ida samaradorlikni oshirish, g‘alla yetishtiruvchilarga amaliy yordam ko‘rsatish va hosilni qisqa muddatlarda, sifatli yig‘ib olish muhimligini ta’kidladi.
Aytish joizki, g‘alla xalqimiz dasturxonining to‘kinligi, yurtimiz oziq-ovqat xavfsizligining asosi hisoblanadi. Shu bois, har bir dehqon bug‘doy maydoniga urug‘ qadagan lahzadan boshlab, u hosil bo‘lib, omborga topshirilguncha barcha agrotexnik tadbirlarni o‘z vaqtida va sifatli bajarishga intiladi.
Hosildorlik, eng avvalo, yer tanlash va uni to‘g‘ri tayyorlashdan boshlanadi. Tuproqning fizik-kimyoviy tarkibi, namlik darajasi va unumdorligi aniqlanib, unga mos g‘alla navlarini ekish muhim ahamiyatga ega. Shuningdek, yerga organik va mineral o‘g‘itlar me’yorida berilishi, yer shudgorlash, tekislash va lazer usulida tayyorlash agrotexnik jihatdan asosiy bosqichlardandir.
Joriy yilgi mavsumda tumanimizda 270 ta fermer xo‘jaliklari tomonidan 4800 gektar ekin maydoniga g‘alla ekilgan. Joriy mavsumdagi bug‘doy yetishtiruvchi fermer xo‘jaliklari tomonidan yetishtiriladigan g‘alla hosili rejasi 11 ming 130 tonnani tashkil etadi. “Taqiatosh don” AJ g‘alla qabul qilish maskanida birinchi kunda jami 27 tonna don qabul qilingan bo‘lib, “Temurbek- Bilolbek” fermer xo‘jaligi dastabki g‘alla topshirgan xo‘jalik sifatida qayd etildi. “Temurbek- Bilolbek” fermer xo‘jaligi 6 tonna g‘alla hosili topshirib, peshqadamlar qatoridan joy oldi.
Seminarda so‘z olgan soha mutaxassislari bug‘doy yetishtirishda agrotexnik tadbirlarni o‘z vaqtida amalga oshirish eng muhim omillardan ekanligini alohida ta’kidladilar. Bunda sifatli va sertifikatlangan urug‘ tanlash, urug‘ni ekishdan oldin zararkunandalarga qarshi ishlov berish, optimal muddatda ekish, ya’ni kechikkan yoki juda erta ekish hosilga salbiy ta’sir qilishi, o‘g‘itlash tizimini to‘g‘ri rejalashtirish, begona o‘tlar, kasalliklar va zararkunandalarga qarshi kurash, shuningdek, sug‘orish va namlikni tejovchi texnologiyalarni qo‘llash zarurligi xususida so‘z yuritdilar.
Bugungi kunda tumanimizdagi ko‘plab ilg‘or fermer xo‘jaliklari har gektardan 60-70 sentner, ba’zilari esa undan ham yuqori ko‘rsatkichlarda hosildorlikka erishmoqdalar. Bunga fermerlarning mehnatsevarligi, zamonaviy texnikalardan foydalanish, tajribali agronomlar tavsiyalariga amal qilish va yaratilayotgan keng ko‘lamli imkoniyatlardan samarali foydalanish asos bo‘lmoqda.
Seminar davomida “Taqiatosh don” AJ tomonidan g‘alla qabul qilishning texnologik jarayonlari, laboratoriya sinovlari va saqlash shartlari bo‘yicha amaliy ko‘rgazmalar tashkil etildi. Mutaxassislar hosilni yetkazib berish va qabul qilishda fermerlarga qulaylik yaratish maqsadida amalga oshirilayotgan ishlar bilan ishtirokchilarni tanishtirdi. Tadbir yakunida ishtirokchilar mavsum davomida yuzaga kelishi mumkin bo‘lgan muammolar va ularning yechimlari yuzasidan o‘zaro fikr almashdilar.
Charos Arslonova, tuman hokimligining Axborot xizmati rahbari.