Amudaryo tumanida “Xalqaro bolalarni himoya qilish kuni” keng nishonlandi
2025-06-02 10:15:00 / Yangiliklar
Ta’kdlanganidek, yurtimizda bolalar manfaatlarini himoya qilish, ularni har tomonlama qo‘llab-quvvatlash davlat siyosatining ustuvor yo‘nalishlaridan biridir. Muhtaram Prezidentimiz rahbarligida olib borilayotgan islohotlar zamirida yosh avlodning baxtli va sog‘lom ulg‘ayishini ta’minlash, ularning har tomonlama kamolotini qo‘llab-quvvatlash yotadi. Hududlarda yangidan barpo etilayotgan, maktabgacha ta’lim muassasalari, umumta’lim maktablari zamonaviy sport maydonchalari va kutubxonalar farzandlarimizning barkamol avlod bo‘lib voyaga yetishlari uchun qaratilayotgan e’tibor namunasidir.
Bayram tadbiri davomida tumandagi samarali faoliyat olib borayotgan maktabgacha ta’lim tashkilotlari jamoalariga tashakkurnomalar topshirildi. Bu orqali ta’lim-tarbiya muassasalarining bolalar tarbiyasiga qo‘shayotgan hissasi yuksak e’tirof etildi.
Shuningdek, bolajonlar uchun rang-barang konsert dasturlari, sahna ko‘rinishlari, musiqiy chiqishlar, sport o‘yinlari va ijodiy tanlovlar tashkil etildi. Tumandagi maktabgacha ta’lim tashkilotlari tarbiyalanuvchilari bir-biridan ajoyib quvnoq raqslar, kuy-qo‘shiqlar ijro qildilar. Tuman Madaniyat bo‘limi xonandalari tomonidan kuylangan sho‘x-shodon qo‘shiqlar barchaga yuqori kayfiyat bag‘ishladi. Bolalar bayramni katta xursandchilik va quvonch bilan nishonlab, esdalik sovg‘alarga ega bo‘lishdi.
Aytish joizki, har yili 1-iyun sanasida dunyo bo‘ylab Xalqaro bolalarni himoya qilish kuni keng nishonlanadi. Bu sana – insoniyatning eng nozik, eng musaffo qalblari bo‘lgan bolalar haqidagi g‘amxo‘rlik, mehr va e’tibor bayramidir. Bu kun – farzandlarimizning baxtli bolaligi, porloq kelajagi va himoyasi uchun har birimiz mas’ul ekanligimizni yana bir bor eslatadi.
Bolalar – millatning kelajagi, har bir yurtdagi ezgulik, umid va ertangi kunning tayanchidir. Ularning sog‘lom, bilimli va baxtli bo‘lib voyaga yetishlari har qanday jamiyat uchun eng ustuvor vazifadir. Aynan shu sababli, bu muhim sanada nafaqat bayram tadbirlari, balki bolalarning huquqlari, manfaatlari va tarbiyasiga oid masalalarga alohida e’tibor qaratiladi.
1-iyun sanasi 1950-yildan boshlab rasmiy ravishda Xalqaro bayram sifatida nishonlab kelinadi. Bu tashabbus ilk bor BMT tomonidan ilgari surilib, butun dunyo mamlakatlariga bolalarni har tomonlama asrab-avaylash, ularni jismoniy va ma’naviy jihatdan qo‘llab-quvvatlash, bolalarning huquqlarini himoya qilish choralarini ko‘rish tavsiya etilgan. Bugungi kunga kelib, butun dunyo bo‘ylab, jumladan, yurtimizda ham keng nishonlanadi.
Bu kun – farzandlarimizning baxtli bolaligi, porloq kelajagi va himoyasi uchun har birimiz mas’ul ekanligimizni yana bir bor eslatadi. Bu kunda butun mamlakatimiz bo‘ylab bayram tadbirlari, konsertlar, bolalar uchun turli ko‘ngilochar dasturlar o‘tkaziladi. Bolalar tabassumi, ularning beg‘ubor quvonchi esa har qanday insonni mehr va ezgulik sari yetaklaydi.
Charos Arslonova, tuman hokimligining Axborot xizmati rahbari.