Qoraqalpog'iston Respublikasi Amudaryo tumani hokimligi

 Bugungi kunda yurtimizda ipakchilik tarmog‘ini rivojlantirishga katta e’tibor qaratilmoqda. Ipak qurti parvarishi va pilla yetishtirish – qadimdan xalqimiz hayotida muhim o‘rin tutgan, ekologik toza va iqtisodiy foydali bo‘lgan sohalardan biridir. Mazkur yo‘nalishning rivojlanishi nafaqat qishloq xo‘jaligi samaradorligini oshirish, balki aholini barqaror daromad manbayi bilan ta’minlashda ham muhim ahamiyat kasb etadi.
     So‘nggi yillarda ipakchilik tarmog‘ini modernizatsiya qilish, eksport salohiyatini oshirish va xalqaro bozorga chiqish imkoniyatlarini kengaytirish maqsadida bir qator islohotlar amalga oshirilmoqda. Fermer xo‘jaliklari, dehqonlar va tadbirkorlar ipak qurti urug‘i, tut daraxti ko‘chatlari va parvarishlash vositalari bilan ta’minlanmoqda. Shuningdek, klaster tizimi orqali pilla yetishtiruvchi xo‘jaliklar va qayta ishlovchi korxonalar o‘rtasida barqaror hamkorlik yo‘lga qo‘yilmoqda.
     Amudaryoliklar ipak qurti parvarishi va pilla yetishtirishda respublikada eng ilg‘orlardan hisoblanadi. Tumanda joriy yilda pilla yetishtirish rejasi 296 tonna bo‘lib, 2658 ta xonadonda 4936 quti ipak qurti parvarishlanmoqda.
     Do‘rman ovuli aholisi pillachilikning mo‘may daromad manbayi ekanligini chuqur anglab yetgan. Uning mehnatidan qochmay, ipak qurti parvarishini markazlashgan holda tashkil etishi, o‘zaro hamjihatliklari bilan boshqalarga namuna bo‘lmoqda. Har yili ovuldagi band bo‘lmagan xotin-qizlar OFY dagi bo‘sh turgan binolarda ipak qurti parvarishiga jalb qilinib, ularning oilasiga daromad olib kelishiga ko‘maklashilmoqda.
    Bu yilgi mavsumda ham do‘rmanliklar tumanda eng ilg‘orlar qatorida markazlashgan holda pilla yetishtirmoqda. 15 nafardan ortiq ayol-qizlar 20 quti ipak qurtini parvarish qilib, pilla xirmoniga munosib hissa qo‘shmoqda. Ularning mashaqqatli mehnati va o‘zaro hamjihatliklarini rag‘batlantirish maqsadida tuman hokimining birinchi o‘rinbosari Fahriddin Yusupov ish jarayoniga tashrif buyurdi.
    Fahriddin Yusupov pillakorlarga ipakchilik bu nafaqat iqtisodiy foyda, balki oilaviy baraka, xotin-qizlar va yoshlar uchun ish o‘rni, ekanligini ta’kidlab, bu yo‘nalishdagi har bir mehnatkashning hissasi tahsinga loyiq ekanini qayd etdi.
    Tadbir davomida pillakorlar faol ishtiroki, sifatli va mo‘l hosil yetishtirayotgani uchun esdalik sovg‘alari bilan rag‘batlantirildi. Ularning orasida uzoq yillardan buyon ipak qurti parvarishi bilan shug‘ullanib kelayotgan tajribali pillakorlar, nuroniy onaxonlar bunday e’tibor va e’tirof ularni yanada ko‘proq mehnat qilishga undayotganini aytib, minnatdorlik bildirishdi.
     Ta’kidlash joizki, ipak qurti parvarishi, ayniqsa, bahor va yoz mavsumlarida minglab oilalar uchun vaqtinchalik, ammo barqaror daromad manbayi hisoblanadi. Ayollar, yoshlar va keksalar ham bu jarayonda faol ishtirok etib, o‘z turmush darajasini yaxshilash imkoniga ega bo‘lmoqda. Ayniqsa, uy sharoitida olib boriladigan ipak qurti boqish faoliyati qishloq ayollari uchun qulay va mos keladi. 

Hafiza Xudoyberganova, O‘zJOKU "Axborot xizmati va jamoatchilik bilan aloqalar" fakulteti 2-kurs talabasi.