Qoraqalpog'iston Respublikasi Amudaryo tumani hokimligi

Bugungi kunda mamlakatimizda yosh avlodni har tomonlama sog‘lom, aqlan va jismonan yetuk etib voyaga yetkazish masalasi davlat siyosatining ustuvor yo‘nalishlaridan biri hisoblanadi. Sport va jismoniy tarbiya barkamol avlodni shakllantirishda muhim ahamiyat kasb etadi.
     Sport inson salomatligini mustahkamlash, sog‘lom turmush tarzini shakllantirish, maqsad sari intilish, iroda, sabr-toqat va jamoada ishlash ko‘nikmalarini rivojlantirishda muhim vosita bo‘lib xizmat qiladi. Aynan sport orqali yoshlar o‘zlarida qat’iyat, intizom, mas’uliyat va vatanparvarlik tuyg‘ularini shakllantiradi.
     Shu sababli ham soha rivojiga alohida e’tibor qaratilib, Prezidentimiz tashabbusi bilan joylarda zamonaviy sport inshootlari, bolalar sport maktablari, stadion va sport zallari qurilmoqda. Bu esa yoshlar uchun sport bilan muntazam shug‘ullanishga keng imkoniyat yaratmoqda.
     Barkamol avlod shakllanishiga xizmat qilayotgan “Davlat xavfsizlik xizmati raisi kubogi” sport musobaqalarining Amudaryo tuman bosqichi yakunlandi va g‘oliblarni taqdirlash marosimi tantanali tarzda bo‘lib o‘tdi. Tuman Xotira maydonida marosim uchun katta tayyorgarlik ko‘rilib, bayram sifatida tashkil etildi.
     Tadbirda tuman hokimi Sobir Xo‘jametov boshchiligidagi rahbarlar, jamoatchilik faollari, sportchi yoshlar hamda aholi vakillari ishtirok etdi. Tadbirda musobaqaning tuman bosqichida g‘oliblikni qo‘lga kiritgan mahallalar jamoalari medal, diplom, kubok hamda qimmatbaho sovg‘alar bilan taqdirlandi.
     Marosimda tuman hokimi Sobir Xo‘jametov so‘zga chiqib, yurtimizda yosh avlodni har tomonlama sog‘lom, ma’naviy yetuk va vatanparvar qilib tarbiyalash ustuvor yo‘nalishlaridan ekanligi, bu borada amalga oshirilayotgan keng ko‘lamli islohotlar qatorida sport musobaqalari, xususan, “Davlat xavfsizlik xizmati raisi kubogi” doirasida tashkil etilayotgan bellashuvlarning o‘rni va ahamiyati beqiyos ekanligi xususida so‘z yuritdi. Shuningdek, g‘olib yoshlarni muvaffaqiyat bilan tabrikladi va keyingi bosqichlarda yuqori natijalarni ko‘rsatishda ularga yuksak ishonch bildirdi.
     Musobaqaning tuman bosqichida mini futbol bo‘yicha o‘g‘il bolalar o‘rtasida faxrli 1-o‘rinni "Farovon" MFY jamoasi, faxrli 2-o‘rinni "Oybek" MFY jamoasi, faxrli 3-o‘rinni "Xizr eli" MFY jamoasi egalladi. Qizlar o‘rtasida faxrli 1-o‘rinni "Xolimbeg" OFY jamoasi, faxrli 2-o‘rinni "Oq oltin" OFY jamoasi, faxrli 3-o‘rinni "To‘lqin" OFY jamoasi qo‘lga kiritdi.
     Musobaqa doirasida futbol sport turi bo‘yicha o‘tkazilgan bahslar murosasiz kechdi. Jamoalar chempionlikni egallash uchun bor kuch va imkoniyatlarini ishga soldilar. Futbol bo‘yicha bellashuvlar yakuniy natijalariga ko‘ra "To‘lqin" OFY jamoasi faxrli 1-o‘rinni, "Kuyuk ko‘pir" OFY jamoasi faxrli 2-o‘rinni, "Qangli" OFY jamoasi faxrli 3-o‘rinni qo‘lga kiritdi. G‘olib jamoalar keyingi bosqich – Qoraqalpog‘iston Respublikasi saralash musobaqalariga yo‘llanma oldi.
     Ta’kidlash joizki, mazkur musobaqalar yoshlar o‘rtasida sog‘lom turmush tarzini targ‘ib qilish, jismoniy tarbiya va sportga bo‘lgan qiziqishni oshirish, shuningdek, harbiy-vatanparvarlik ruhini mustahkamlashga muhim ahamiyat kasb etmoqda.
     Shuningdek, musobaqalar nafaqat sportchilar o‘rtasida sog‘lom raqobat muhitini shakllantiradi, balki yoshlarda jismoniy tayyorgarlikni oshirish, intizomlilik, jamoaviylik, iroda va qat’iyat kabi fazilatlarni kamol toptirishga xizmat qiladi. Ayniqsa, musobaqalarning harbiy-vatanparvarlik ruhida o‘tishi yoshlar qalbida ona Vatanga sadoqat, fidoyilik va mas’uliyat tuyg‘ularini yanada kuchaytiradi.
     Qolaversa, bu musobaqalar orqali yoshlar o‘zlarining sportga bo‘lgan qobiliyatlarini namoyon etish, o‘z ustida ishlash va yuqori natijalarga erishish imkoniyatiga ega bo‘lishadi. Bu esa o‘z navbatida, sog‘lom turmush tarzining jamiyatda ommalashuviga xizmat qiladi.
     Taqdirlash marosimi doirasida ishtirokchilar va mehmonlar uchun boy madaniy dastur – konsert namoyish etildi. Tuman Madaniyat bo‘limi xonandalari tomonidan namoyish etilgan konsert dasturi tadbirga bayramona ruh bag‘ishladi. Unda tumanimizning mashhur estrada xonandalari, iste’dodli ijodkorlar o‘zlarining sho‘x-shodon kuy-qo‘shiqlari bilan ishtirok etib, tomoshabinlarga ko‘tarinki kayfiyat ulashdi.
     “Davlat xavfsizlik xizmati raisi kubogi” sport musobaqalari barkamol avlodni shakllantirish, ularni jismoniy va ma’naviy tayyor holda voyaga yetkazish yo‘lida muhim vositalardan biri bo‘lib xizmat qilmoqda. Bu kabi tashabbuslar orqali kelajakda yurtimizni yelkasida ko‘taradigan, sog‘lom fikrlaydigan va vatanparvar yoshlar yetishib chiqmoqda. 

Charos Arslonova, tuman hokimligining Axborot xizmati rahbari.