Qoraqalpog'iston Respublikasi Amudaryo tumani hokimligi

Amudaryo tumani hokimligi majlislar zalida Xalq deputatlari Amudaryo tumani Kengashining navbatdagi 25-sessiyasi bo‘lib o‘tdi.

Sessiyada tuman hokimi Sobir Xo‘jametov, tuman hokimi o‘rinbosarlari, tegishli tashkilot va idoralar rahbarlari, ekspert guruhi a’zolari, mahalla fuqarolar yig‘inlari raislari, xotin-qizlar faollari hamda ommaviy axborot vositalari vakillari ishtirok etdi.

Sessiya ishini Xalq deputatlari Amudaryo tumani Kengashi raisi Alisher Yo‘ldashev olib bordi. Yig‘ilish O‘zbekiston Respublikasi va Qoraqalpog‘iston Respublikasi davlat madhiyalari ijrosi bilan boshlandi. Sessiya kotibligiga 23 –“Qipchoq” saylov okrugidan deputat Muyassar Raxmatullayeva nomzodi deputatlar tomonidan bir ovozdan ma’qullandi.

Kun tartibiga kiritilgan masalalar yuzasidan tuman hokimi o‘rinbosarlari hamda tegishli tashkilot va idoralar rahbarlarining hisobot va axborotlari tinglandi.

Sessiya kun tartibidagi birinchi masala — Amudaryo tumani mahalliy budjetining maqbullashtirilgan mablag‘larini yetishmayotgan ish haqi xarajatlariga yo‘naltirish to‘g‘risida tuman hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — Iqtisodiyot va moliya bo‘limi boshlig‘i Faxriddin Yusupov hisobot berdi.

Hisobotda O‘zbekiston Respublikasi Budjet kodeksining 119, 120, 126-moddalari hamda O‘zbekiston Respublikasi Vazirlar Mahkamasining 2026-yil 2-martdagi 3-sonli (03:03/1-4501) yig‘ilish bayonida mahalliy budjetdagi qonunchilik hujjatlariga muvofiq bo‘lmagan hamda past samarali, shuningdek, to‘rtinchi guruh xarajatlarni maqbullashtirish belgilanganligi qayd etildi.

Shuningdek, maqbullashtirilgan mablag‘larni birinchi navbatda budjet tashkilotlari va muassasalarining ish haqi, ijtimoiy soliq hamda kommunal xizmatlar to‘lovlarining yetishmagan qismiga yo‘naltirish nazarda tutilganligi ta’kidlandi. Shu asosda Amudaryo tumani mahalliy budjetining maqbullashtirilgan mablag‘lari hisobidan tegishli budjet tashkilotlariga mablag‘ yo‘naltirish masalasi muhokama qilindi.

Sessiya kun tartibidagi navbatdagi masala mahallalarda xavfsiz muhitni yaratish va huquqbuzarliklarning barvaqt oldini olishga bag‘ishlandi. Mazkur masala yuzasidan Amudaryo tumani prokurori Ravshanbek Bauaddinov axborot berdi. Qayd etilganidek, jinoyatchilik va huquqbuzarliklarning barvaqt oldini olish maqsadida hududda 20 ta “Namunaviy xavfsiz ko‘cha” va 7 ta “Namunaviy xavfsiz uy” tashkil etilgan.

Ko‘p qavatli uylarning eshiklariga 16 ta zamonaviy domofon kompleksi, ko‘p qavatli uylarning kirish yo‘laklari oldiga 9 ta tashvish tugmasi, mahallalardagi aholi gavjum joylar va ko‘chalarga 30 ta kuzatuv kamerasi o‘rnatildi. Ko‘p qavatli uylarning hovlilariga 4 ta, maktablarning kirish va chiqish joylariga 8 ta, sport maydonchalariga esa 2 ta PTZ kamerasi o‘rnatilgan.

Mahallalarning asosiy kirish va chiqish joylariga 14 ta, savdo markazlari va bozorlarga 2 ta yuzni va avtotransport raqamlarini tanib oluvchi kamera o‘rnatildi. Shuningdek, 77 ta ko‘p qavatli uy va yakka tartibdagi xonadon hamda 39 ta savdo va maishiy xizmat ko‘rsatish obyekti texnik qo‘riqlovga olindi.

Jinoyatchilikning oldini olishda viktimologik tadbirlardan samarali foydalanilib, jinoyat sodir etishga moyil 373 nafar hamda jinoyatdan jabr ko‘rishi mumkin bo‘lgan 162 nafar, jami 535 nafar shaxs ro‘yxati shakllantirildi.

Sessiya kun tartibidan Amudaryo tumani ichki ishlar bo‘limi boshlig‘ining “Mahallalarda xavfsiz muhitni yaratish va huquqbuzarliklarning barvaqt oldini olish to‘g‘risida”gi hisoboti ham o‘rin oldi.

Tuman ichki ishlar bo‘limi boshlig‘i Mahsud Sherimbetovning hisobotida aholining huquqiy ongi va madaniyatini yuksaltirish borasida voyaga yetmaganlar o‘rtasida 476 ta, probatsiya hisobidagi shaxslar o‘rtasida esa 382 ta targ‘ibot tadbiri o‘tkazilgani qayd etildi.

Tarbiyasiga mas’uliyatsizlik bilan yondashayotgan 844 nafar ota-onaga nisbatan ma’muriy choralar ko‘rildi. Tarbiyasi og‘ir 134 nafar o‘quvchi bilan manzilli profilaktik ishlar olib borildi.

Amalga oshirilgan amaliy ishlar natijasida tumandagi 38 ta mahallada jinoyat sodir etilishiga yo‘l qo‘yilmadi va ular “yashil” mahalla toifasiga kiritildi. 10 ta mahalla “sariq” toifaga kiritilgan bo‘lsa, o‘tgan 9 oy mobaynida 1 ta mahalla “qizil” toifaga kiritildi.

Sessiyada “Mahallaning ijtimoiy-iqtisodiy muammolarini hal etish jamg‘armasi” daromadlari va xarajatlari ijrosi hamda mahalla institutini rivojlantirishga qaratilgan farmon va qarorlarning ijrosi to‘g‘risida O‘zbekiston mahallalari uyushmasi Amudaryo tuman bo‘limi          boshlig’i Alisher Yo‘ldashev hisobot berdi.

Hisobotda joriy yilning o‘tgan 9 oyi davomida mahalla hududidagi ichki yo‘llar, piyodalar yo‘lakchalari, yoritish tizimi, elektr energiyasi va tabiiy gaz tarmoqlari, ichimlik va oqova suv tizimlarini ta’mirlash va tiklash, shuningdek, ehtiyojmand oilalarni moddiy tomondan qo‘llab-quvvatlash bo‘yicha qator ishlar amalga oshirilgani qayd etildi.

Mart oyida O‘zbekiston mahallalari uyushmasi tuman bo‘limi va fuqarolar yig‘inlari bilan hamkorlikda “Yashil makon” umummilliy harakati doirasida jami 120 mingdan ortiq ko‘chat ekildi.

Uyushma tomonidan “Qipchoq o‘rmon xo‘jaligi”dan shartnoma asosida 20 ming dona mevali daraxt ko‘chatlari sotib olinib, fuqarolar yig‘inlari tomonidan ijtimoiy himoyaga muhtoj oilalarga tarqatildi. Mazkur tadbir uchun 299 million so‘m sarflandi.

Fuqarolar yig‘inlarining moddiy-texnik bazasini mustahkamlash maqsadida 15 ta kompyuter texnikasi, 13 ta printer va 20 ta mebel jamlanmasi berildi. Shuningdek, 8 ta — Bo‘zёp, Do‘rman, Qizilcholi, Qilichboy, Do‘stlik, Qoramon, O‘zbekiston va Xolimbeg mahallalarida ta’mirlash ishlari olib borildi. Bu tadbirlar uchun 319 million so‘m sarflandi.

Sessiya kun tartibidan tuman hokimligi ijro intizomi nazorati bo‘linmasi bosh mutaxassisi Ma’murjon Tajiboyevning axboroti ham o‘rin oldi.

Axborotga ko‘ra, tuman hokimligiga 2026-yilning 9 oyida 22 ta Prezident farmoni, 38 ta qarori, 1 ta farmoyishi hamda Vazirlar Mahkamasining 18 ta qarori va farmoyishlari asosida tayyorlangan Vazirlar Kengashining 79 ta normativ-huquqiy hujjati kelib tushgan.

Mazkur hujjatlar ijrosi yuzasidan tuman hokimining 38 ta qaror va farmoyishi qabul qilinib, 41 tasi ijro va ma’lumot uchun qabul qilingan.

Prezident va Hukumat topshiriqlari nazorat rejalari ijrosi bo‘yicha tuman hokimligiga “edo.ijro.uz” tizimi orqali 2026-yilning 9 oyida jami 83 ta hujjat bo‘yicha Vazirlar Kengashining nazorat rejalari kelib tushgan. Shu asosda tuman hokimligining 83 ta nazorat rejasi ishlab chiqilib, tasdiqlangan va ijroga qaratilgan.

Ushbu nazorat rejalarida jami 290 ta topshiriq belgilangan bo‘lib, bugungi kunda ularning 227 tasi, ya’ni 78 foizi bajarilgan. 63 ta topshiriq ijro jarayonida bo‘lib, bajarilmagan topshiriqlar mavjud emas.

Sessiya davomida tuman hududida favqulodda vaziyatlarning oldini olish hamda ularni bartaraf etish borasida 2026-yilning 3-choragi davomida amalga oshirilgan ishlar to‘g‘risida tuman Favqulodda vaziyatlar bo‘limi boshlig‘i Zafar Ahmedov hisobot berdi.

Hisobotda keltirilishicha, tuman hududida joriy yilning 3-choragi davomida 24 ta yong‘in sodir bo‘lgan. Natijada fuqarolarga 1 milliard 925 million 810 ming so‘m miqdorida zarar yetkazilgan. Yong‘inlar oqibatida tan jarohati olish yoki halok bo‘lish bilan bog‘liq holatlar qayd etilmagan.

“112” qisqa raqamiga fuqarolardan kelib tushgan xabarlar bo‘yicha 78 marotaba chiqish amalga oshirilib, fuqarolarga amaliy yordam ko‘rsatildi.

Sodir bo‘lishi mumkin bo‘lgan yong‘inlar va favqulodda vaziyatlarni tezkor hamda samarali bartaraf etish maqsadida 26 marotaba yong‘in-taktik mashq va 12 marotaba yong‘in-taktik mashg‘uloti o‘tkazildi.

Reja asosida davlat tasarrufidagi 172 ta hamda tadbirkorlik subyektlariga tegishli 314 ta obyekt tekshiruvdan o‘tkazildi. Tekshiruvlar davomida O‘zbekiston Respublikasi Vazirlar Mahkamasining 2020-yil 20-oktabrdagi “Yong‘in xavfsizligi qoidalarini tasdiqlash to‘g‘risida”gi 649-son qarorida ko‘rsatilgan talablarni buzgan shaxslarga nisbatan 834 ta holat bo‘yicha jami 557 million 664 ming so‘m jarima qo‘llanildi.

Yong‘in kelib chiqish xavfi yuqori bo‘lgan 52 ta obyektning faoliyati vaqtincha to‘xtatildi. 272 ta qo‘lbola va nosoz agregatdan foydalanish taqiqlandi va ular muhrlandi. 18 ta tadbirkorlik subyektida monitoring va profilaktika tadbirlari o‘tkazildi.

Aniqlangan yong‘inga qarshi kamchiliklar va muammolar yuzasidan yuqori turuvchi organlarga axborotnoma va taqdimnomalar kiritildi.

Sessiya kun tartibiga davlat maktabgacha ta’lim tashkilotlarini tashkil etish to‘g‘risidagi masala ham kiritildi.

Mazkur masala belgilangan tartibda doimiy komissiya tomonidan ko‘rib chiqilib, Kengash qarori loyihasi ishlab chiqilgan. Qaror loyihasi sessiya ishtirokchilari muhokamasiga qo‘yildi.

Muhokamalar davomida deputatlar tomonidan bildirilgan taklif va mulohazalar atroflicha ko‘rib chiqildi. Berilgan savollarga mas’ullar tomonidan batafsil javoblar berildi.

Sessiya yakunida kun tartibidagi barcha masalalar yuzasidan tegishli qarorlar qabul qilinib, ularning ijrosini ta’minlash bo‘yicha mas’ullarga zarur vazifalar belgilandi.