Qoraqalpog'iston Respublikasi Amudaryo tumani hokimligi

2026-yil 8-sentabr kuni Amudaryo tumani hokimligida Xalq deputatlari Amudaryo tumani Kengashining yettinchi chaqiriq navbatdagi 24-sessiyasi bo‘lib o‘tdi.

    Sessiyada tuman hokimi o‘rinbosarlari, tegishli tashkilot va idoralar rahbarlari, ekspert guruhi a’zolari, mahalla fuqarolar yig‘inlari raislari, xotin-qizlar faollari hamda ommaviy axborot vositalari vakillari ishtirok etdi.

     Sessiya ishini Xalq deputatlari Amudaryo tumani Kengashi raisi Alisher Yo‘ldoshev ochib berdi va olib bordi. Majlis O‘zbekiston Respublikasi hamda Qoraqalpog‘iston Respublikasi davlat madhiyalari sadolari ostida boshlandi. Sessiya kotibligiga 21-Choyko‘l saylov okrugidan deputat Yaxshimurat Axmedov nomzodi deputatlar tomonidan ma’qullandi.

    Sessiya kun tartibidan Amudaryo tumani bo‘yicha “Tashabbusli budjet” jarayonining 2026-yil 2-mavsumida g‘olib bo‘lgan loyihalarni “Fuqarolar tashabbusi jamg‘armasi” hisobidan moliyalashtirish hamda Amudaryo tumani mahalliy budjeti mablag‘larini yo‘naltirish to‘g‘risidagi masalalar o‘rin oldi.

    Mazkur masalalar yuzasidan Amudaryo tumani Iqtisodiyot va moliya bo‘limi boshlig‘ining birinchi o‘rinbosari Jahongir Yo‘ldoshev hisobot berdi.

    Ta’kidlanganidek, joriy yilning “Tashabbusli budjet” jarayoni ikkinchi mavsumini moliyalashtirish uchun jami 16 milliard 242 million 452 ming so‘m mablag‘ shakllantirilgan. Mazkur mablag‘larning 12 milliard 243 million 976 ming 500 so‘mi budjet parametrida nazarda tutilgan mablag‘lar hisobidan, 1 million 66 ming so‘mi “Tashabbusli budjet” jamg‘armasidagi qoldiq mablag‘lardan, 1 milliard 27 million 709 ming 500 so‘mi esa 2026-yilning birinchi mavsumida o‘tkazilgan “Tashabbusli budjet” jarayoni yakunlariga ko‘ra iqtisod qilingan mablag‘larni jamg‘armaga qayta tiklash hisobidan shakllantirilgan. Shuningdek, birinchi chorak tuman mahalliy budjeti daromadlar rejasining ortiqcha bajarilgan qismining 30 foizi hisobidan 1 milliard 456 million 800 ming so‘m, ikkinchi chorak tuman mahalliy budjeti daromadlar rejasining ortiqcha bajarilgan qismining 30 foizi hisobidan esa 1 milliard 512 million 900 ming so‘m mablag‘ yo‘naltirilgan.

    Hisobotga ko‘ra, “Fuqarolar tashabbusi jamg‘armasi”da 1 milliard 413 million 562 ming 504 so‘m qoldiq mablag‘ mavjud.

     Shuningdek, 4 149 ta ovoz to‘plagan ID 055491330002 tashabbus — Jumurtov SHFY hududidan o‘tuvchi D-217A yo‘lining 6 kilometr oralig‘idan O‘zbekiston MFY va Qizilcholi MFYga olib boradigan, 1-Bahouddin Naqshbandiy hamda 5-Bahouddin Naqshbandiy ko‘chalari bilan tutashgan Damba yo‘lini asfalt qilish loyihasi muhokama qilindi.

    Qiymati 1 milliard 647 million 723 ming 225 so‘m bo‘lgan mazkur loyihani qo‘shimcha g‘olib deb topish uchun 236 million so‘m mablag‘ yetishmayotgani qayd etildi.

    Sessiyada 2026-yil ikkinchi chorak tuman mahalliy budjeti daromadlar rejasining ortiqcha bajarilgan qismi mablag‘lari hisobidan 236 million so‘mni tuman hokimligi huzuridagi “Fuqarolar tashabbusi jamg‘armasi”ga o‘tkazish hamda yuqorida qayd etilgan ID 055491330002 tashabbusini 2026-yil 2-mavsum g‘oliblari qatoriga qo‘shish taklifi bildirildi.

    Sessiya kun tartibidagi navbatdagi masala — “Mahallaning ijtimoiy-iqtisodiy muammolarini hal etish jamg‘armasi” daromadlari va xarajatlari ijrosi hamda mahalla institutini rivojlantirishga qaratilgan farmon va qarorlarning ijrosi to‘g‘risidagi masala yuzasidan O‘zbekiston mahallalari uyushmasi Amudaryo tuman bo‘limi rahbari Alisher Yo‘ldoshev hisobot berdi.

    Hisobotda qayd etilishicha, joriy yilning o‘tgan 8 oyi davomida mahalla hududlaridagi ichki yo‘llar, piyodalar yo‘laklari, yoritish tizimi, elektr energiyasi va tabiiy gaz tarmoqlari, ichimlik hamda oqova suv tizimlarini ta’mirlash va tiklash, shuningdek, ehtiyojmand oilalarni moddiy tomondan qo‘llab-quvvatlash bo‘yicha qator ishlar amalga oshirilgan.

    Mart oyida O‘zbekiston mahallalari uyushmasining tuman bo‘limi va fuqarolar yig‘inlari bilan hamkorlikda “Yashil makon” umummilliy harakati doirasida jami 120 mingdan ortiq ko‘chat ekildi.

     Shuningdek, uyushma tomonidan “Qipchoq o‘rmon xo‘jaligi”dan shartnoma asosida 20 ming dona mevali daraxt ko‘chati xarid qilinib, fuqarolar yig‘inlari tomonidan ijtimoiy himoyaga muhtoj oilalarga tarqatildi. Mazkur tadbir uchun 299 million so‘m mablag‘ sarflandi.

     Fuqarolar yig‘inlarining moddiy-texnik bazasini mustahkamlash maqsadida 15 ta kompyuter texnikasi, 13 ta printer va 20 ta mebel jamlanmasi berildi. Shuningdek, 8 ta mahallada — Bo‘zyop, Do‘rman, Qizilcholi, Qilichboy, Do‘stlik, Qoramon, O‘zbekiston va Xolimbeg mahallalarida ta’mirlash ishlari olib borildi. Ushbu tadbirlar uchun 319 million so‘m mablag‘ sarflandi.

    Bundan tashqari, 8 nafar kam ta’minlangan oila xonadoniga quyosh panellari olish uchun 176 million so‘m miqdorida moddiy yordam ko‘rsatildi. 19 nafar kam ta’minlangan fuqaroning uy-joyi ta’mirlanib, ushbu ishlar uchun 125 million so‘m mablag‘ sarflandi.

    Sessiya kun tartibidagi yana bir muhim masala — Amudaryo tumanida maktabgacha ta’limni takomillashtirish va rivojlantirish yo‘nalishida amalga oshirilayotgan chora-tadbirlarning samaradorligi to‘g‘risidagi masala bo‘ldi.

    Mazkur masala yuzasidan Amudaryo tumani maktabgacha va maktab ta’limi bo‘limi boshlig‘i Yalg‘ashboy Shamuratov hisobot berdi.

    Hisobotda keltirilishicha, 2026-yil davomida O‘zbekiston Respublikasi Prezidentining 2021-yil 18-sentabrdagi, Islom taraqqiyot banki va OPEK Xalqaro taraqqiyot jamg‘armasi ishtirokida “Qishloq joylarni barqaror rivojlantirish loyihasini amalga oshirish chora-tadbirlari to‘g‘risida”gi PQ-5246-son qarori asosida tumanning “Olmazor” MFY hududida 120 o‘rinli, “Farovon” MFYda 90 o‘rinli, “Arnabuyi” MFYda 150 o‘rinli, “Do‘stlik” MFYda esa 240 o‘rinli davlat maktabgacha ta’lim tashkilotlari qurib bitkazilib, foydalanishga topshirildi va faoliyatini boshladi.

    Bundan tashqari, qamrov darajasi past, kambag‘allik darajasi yuqori hududlarda 2026-yil davomida 18 ta oilaviy nodavlat maktabgacha ta’lim tashkilotini yangidan ochish va faoliyatini yo‘lga qo‘yish rejalashtirilgan. Yil boshidan buyon esa rejalashtirilganidan ortiq — 22 ta oilaviy nodavlat maktabgacha ta’lim tashkiloti tashkil etilib, faoliyati yo‘lga qo‘yildi.

    2026–2027-o‘quv yilida “Beshtom” MFY hududida 150 o‘rinli DMTT, “Oq oltin” OFY hududida esa 90 o‘rinli DMTT yangidan qurilib, foydalanishga topshirilishi kutilmoqda.

    Sessiya kun tartibidan, shuningdek, deputatlarning o‘z faoliyati yuzasidan saylovchilar oldida axborot berishining reja-jadvalini tasdiqlash to‘g‘risidagi masala ham o‘rin oldi.

    Mazkur masala yuzasidan Xalq deputatlari Amudaryo tumani Kengashi kotibiyati mudiri Mansur O‘razboyev axborot berdi.

     Sessiyada kun tartibiga kiritilgan barcha masalalar atroflicha muhokama qilindi. Deputatlarning fikr va mulohazalari tinglanib, berilgan savollarga mutasaddilar tomonidan tegishli javoblar qaytarildi.

    Muhokamalar yakunida har bir masala yuzasidan tegishli qarorlar qabul qilinib, Xalq deputatlari Amudaryo tumani Kengashining navbatdagi 24-sessiyasi o‘z ishini yakunladi.

Charos Arslonova, tuman hokimligining Axborot xizmati rahbari.