Mustaqillik bayrami oldidan keng ko‘lamli obodonlashtirish ishlari davom etmoqda
2026-08-03 09:40:00 / Yangiliklar
Yurtimiz bo‘ylab eng ulug‘ va eng aziz ayyom – O‘zbekiston Respublikasi davlat mustaqilligining 35 yilligini keng ko‘lamda nishonlashga puxta hozirlik ko‘rilmoqda. Ozod va obod yurtimizning barcha go‘shalarida katta shodiyona oldidan o‘ziga xos tayyorgarlik jarayonlari qizg‘in pallaga kirgan. Bu yilgi bayram tadbirlari “Yagona Vatan, yagona xalq bo‘lib, yangi hayot va kelajak yaratamiz!” degan elu yurtni birlashtiruvchi, qalblarga faxr va iftixor tuyg‘ularini baxsh etuvchi ezgu g‘oya ostida nishonlanadi. Ushbu shonli sanani har tomonlama munosib hamda yuqori saviyada kutib olish maqsadida butun respublikamiz hududlarida bo‘lgani kabi, Amudaryo tumanida ham keng ko‘lamli obodonlashtirish, ko‘kalamzorlashtirish va bunyodkorlik ishlari uyushqoqlik bilan tashkil etilmoqda.
Hududlarda olib borilayotgan ushbu keng qamrovli obodonlashtirish tadbirlaridan ko‘zlangan asosiy maqsad, eng avvalo, mahalla ahli uchun yanada qulay, toza-ozoda va har tomonlama fayzli muhit yaratishdan iboratdir. Qolaversa, chekka hududlar va mahallalarning sanitariya holatini tubdan yaxshilash, aholi o‘rtasida sog‘lom turmush tarzini keng targ‘ib qilish hamda ekologik barqarorlikni ta’minlash ustuvor vazifalar qatorida belgilangan. Shu orqali eng ulug‘ va eng aziz bayramimiz bo‘lmish Mustaqillik ayyomini barcha xonadonlarda, mahalla va ko‘chalarda munosib, ko‘tarinki hamda o‘ziga xos bayramona kayfiyatda kutib olish uchun zarur shart-sharoitlar yaratilmoqda. Obodlik ko‘ngildan boshlanadi, deganlaridek, bugun yurtdoshlarimizning qalbidagi poklik ularning yon-atrofni go‘zallashtirish yo‘lidagi sa’y-harakatlarida o‘z aksini topmoqda.
Amudaryo tumanining barcha ovul va mahallalarida ham umumxalq hasharlari qizg‘in davom etmoqda. Jumladan, tumandagi Choyko‘l ovulida ham bayram oldidan tayyorgarlik ishlari avjida. Jarayonlarni bevosita nazorat qilish va xalq bilan hamnafas bo‘lish maqsadida Amudaryo tumani hokimining o‘rinbosari Jasur Yaxshimov o‘zi mas’ul qilib biriktirilgan ushbu ovulda bo‘ldi hamda hududda olib borilayotgan obodonlashtirish ishlari bilan yaqindan tanishib, mahalla faollari va aholi vakillari bilan yaqindan muloqot qildi. Bundan tashqari, jarayonlarni yanada jadallashtirish uchun zarur bo‘lgan barcha tashkiliy hamda texnik yordamlarni ko‘rsatdi. Hududlarga maxsus texnikalar jalb qilinib, og‘ir qo‘l mehnati talab etiladigan ishlarda aholiga yaqindan yordam ko‘rsatilmoqda.
Choyko‘l ovuli aholisi o‘zaro hamjihatlikda milliy qadriyatimizga aylangan hashar yo‘li bilan hovlilari, ko‘cha va guzarlarni tartibga keltirmoqdalar. Barcha xonadon egalari bayramni ko‘tarinki ruhda kutib olish maqsadida ahillik va birdamlikda mehnat qilmoqda. Ko‘cha bo‘ylari va ichki yo‘llar chetidagi manzarali hamda mevali daraxtlarga shakl berilib, oqlanmoqda. Shu bilan birga, suv yo‘llarining ravonligini ta’minlash, ekinlarni sug‘orishda muammolar kelib chiqmasligi uchun ariq va zovurlar turli chiqindilardan, xas-cho‘plardan tozalanmoqda. Keksayu yoshning hamjihatlikda qilayotgan bunday mehnati natijasida butun hudud obod va ko‘rkam qiyofa kasb etmoqda.
Mustaqilligimizning 35 yillik bayrami oldidan olib borilayotgan bu kabi bunyodkorlik va tozalik tadbirlari nafaqat ko‘cha va mahallalarimizning qiyofasini tubdan yaxshilamoqda, balki odamlarning ruhiyatiga yuqori kayfiyat, qalbiga esa yurtga bo‘lgan cheksiz muhabbat tuyg‘ularini baxsh etmoqda. Ovul ahlining yuz-ko‘zlaridagi tabassum va ertangi kunga bo‘lgan mustahkam ishonch elu yurtimizning "Yagona Vatan, yagona xalq bo‘lib, yangi hayot va kelajak yaratamiz!" degan oliy maqsad yo‘lida jipslashganining amaliy ifodasidir. Zero, o‘z mahallasi va go‘shasini obod qilgan insonning hayoti ham, kelajagi ham albatta farovon bo‘ladi.
manba: amunews.uz