Qoraqalpog'iston Respublikasi Amudaryo tumani hokimligi

Bugungi kunda sog‘lom turmush tarzi, jismoniy faollik va ruhiy salomatlikni mustahkamlash masalalari jamiyat taraqqiyotining muhim omillaridan biriga aylanib bormoqda. Ana shunday ezgu maqsadlar yo‘lida fidoyilik bilan mehnat qilib kelayotgan amudaryolik professional yoga murabbiylari — ona-bola Gulchiroy Karimova va uning qizi Farangiz Jabbarbergenova nafaqat tumanimiz, balki butun mamlakatimiz sharafini xalqaro maydonda munosib himoya qilib qaytishdi.
    Ular tarixda ilk marotaba Hindiston Respublikasining Ahmadobod shahrida o‘tkazilgan Yogasana bo‘yicha Jahon chempionatida O‘zbekiston terma jamoasi tarkibida ishtirok etib, yurtimiz vakillari safida munosib natijalarni qo‘lga kiritdilar. Bu esa Amudaryo tumani sport va salomatlik harakati tarixida muhim voqea sifatida e’tirof etilmoqda.
    Ma’lumki, 2026-yil 4–8-iyun kunlari Hindistonning Ahmadobod shahridagi zamonaviy EKA Arena majmuasida ilk bor World Yogasana Championship 2026 — Yogasana bo‘yicha Jahon chempionati bo‘lib o‘tdi. Nufuzli musobaqada dunyoning 60 dan ortiq davlatidan 400 nafardan ziyod sportchi ishtirok etib, yoga san’ati va sport mahorati borasida o‘zaro bellashdilar. Ushbu chempionat yogasananing xalqaro sport turi sifatidagi nufuzi tobora ortib borayotganini yana bir bor namoyon etdi.
    O‘zbekiston terma jamoasi safida qatnashgan Gulchiroy Karimova va Farangiz Jabbarbergenovaning jahon arenalaridagi ishtiroki yurtimizda, xususan, Amudaryo tumanida yoga sportining rivojlanayotganidan dalolat beradi. Ularning ushbu muvaffaqiyati yoshlar, ayniqsa, xotin-qizlar uchun katta rag‘bat va o‘rnak bo‘lib xizmat qilmoqda.
    Amudaryo tumani hokimining o‘rinbosari, Oila va xotin-qizlar bo‘limi boshlig‘i Go‘zal Saburova Alisher Navoiy mahallasida tashkil etilgan yoga klubiga tashrif buyurdi. Tashrif davomida u O‘zbekiston terma jamoasi a’zolari, tajribali yoga murabbiylari Gulchiroy Karimova va Farangiz Jabbarbergenovani Hindistonda bo‘lib o‘tgan Yogasana bo‘yicha Jahon chempionatidagi muvaffaqiyatli ishtiroki bilan samimiy tabrikladi.
     Tadbir davomida ona-bola murabbiylarning yurtimiz sporti va xotin-qizlar salomatligini mustahkamlash yo‘lidagi xizmatlari yuksak baholandi. Shuningdek, kelgusida yoga sportini yanada rivojlantirish, yoshlar va xotin-qizlar o‘rtasida ommalashtirish, sog‘lom turmush tarzini keng targ‘ib qilish borasidagi vazifalar haqida fikr almashildi.
    Bugun Amudaryo tumanida yoga bilan shug‘ullanishga qiziqayotgan xotin-qizlar soni yildan-yilga ortib bormoqda. Bu borada professional yoga murabbiyi Gulchiroy Karimovaning xizmatlari alohida e’tiborga loyiq. U sog‘lom turmush tarzini targ‘ib etish, ayollar salomatligini mustahkamlash va ularning bo‘sh vaqtini mazmunli tashkil etish yo‘lida samarali faoliyat yuritib kelmoqda.
   Murabbiy o‘z tashabbusi va sa’y-harakatlari bilan To‘lqin ovuli, Alisher Navoiy nomidagi mahalla hamda Qipchoq shaharchasida xotin-qizlar uchun yoga klublarini tashkil etib, yuzlab ayollarni sog‘lom hayot sari yetaklamoqda. Ushbu klublarda nafaqat jismoniy mashqlar o‘rgatiladi, balki sog‘lom turmush madaniyati, ruhiy xotirjamlik va hayotiy faollikni oshirishga qaratilgan mashg‘ulotlar ham muntazam olib boriladi.
    Mutaxassislarning ta’kidlashicha, yoga inson organizmiga ko‘plab foyda keltiradi. U mushaklar va bo‘g‘imlarning moslashuvchanligini oshiradi, qomatni tiklaydi, qon aylanishini yaxshilaydi, stress va ruhiy zo‘riqishlarni kamaytiradi. Ayniqsa, xotin-qizlar salomatligini mustahkamlash, onalik davridagi jismoniy va ruhiy holatni yaxshilashda yoga mashg‘ulotlari muhim ahamiyat kasb etadi. Shu bois bugungi kunda tumanimizda ushbu sport turi bilan shug‘ullanuvchilar safi tobora kengayib bormoqda.
    Shubhasiz, Gulchiroy Karimova va Farangiz Jabbarbergenovaning xalqaro maydondagi ishtiroki Amudaryo tumani uchun katta faxrdir. Ularning mehnati va fidoyiligi tufayli bugun ko‘plab xotin-qizlar sog‘lom hayot sari dadil qadam tashlamoqda. Jahon chempionatida qo‘lga kiritilgan yutuqlar esa nafaqat shaxsiy muvaffaqiyat, balki yurtimizda yoga sportining rivojlanishi, xotin-qizlar salomatligini mustahkamlash va sog‘lom avlodni tarbiyalash yo‘lidagi sa’y-harakatlarning amaliy natijasidir.

Charos Arslonova, tuman hokimligining Axborot xizmati rahbari.