Qoraqalpog'iston Respublikasi Amudaryo tumani hokimligi

Amudaryo tumanida bolalar salomatligini mustahkamlash, kasalliklarni erta aniqlash va malakali tibbiy xizmatdan foydalanish imkoniyatlarini kengaytirish maqsadida Respublika Bolalar milliy tibbiyot markazining Orolbo‘yi klinikasi tomonidan tashkil etilgan “Salomatlik aksiyasi” muvaffaqiyatli yakunlandi.
     Mazkur xayrli tashabbus doirasida 0–18 yoshdagi bolalar uchun bepul tibbiy ko‘riklar tashkil etilib, yuzlab ota-onalar va farzandlar malakali mutaxassislar xizmatidan foydalanish imkoniyatiga ega bo‘ldilar. Aksiya Amudaryo tumani tibbiyot birlashmasida o‘tkazilib, hudud aholisi tomonidan katta mamnuniyat bilan kutib olindi.
    Tadbir davomida Respublika Bolalar milliy tibbiyot markazining tajribali va yuqori malakali shifokorlari tomonidan bolalar chuqurlashtirilgan tibbiy ko‘rikdan o‘tkazildi. Xususan, otolaringolog, neyroxirurg, plastik jarroh, nevropatolog, ortoped, umumiy jarroh, urolog, kardioxirurg, pediatr, gematolog hamda ultratovush diagnostikasi mutaxassislari tomonidan bemorlarga maslahatlar berildi, zarur tibbiy tavsiyalar ishlab chiqildi.
     Ko‘riklar jarayonida bir qator bolalarda turli kasalliklar va tug‘ma nuqsonlar erta bosqichda aniqlanib, ularni davolash bo‘yicha aniq yo‘nalishlar belgilandi. Ayniqsa, murakkab jarrohlik amaliyotlarini talab etuvchi holatlar mutaxassislar tomonidan alohida nazoratga olinib, tegishli hujjatlar rasmiylashtirildi.
     Aksiyaning eng muhim jihatlaridan biri shundaki, mutaxassislar tavsiyasiga ko‘ra Respublika Bolalar milliy tibbiyot markazining Orolbo‘yi klinikasiga yo‘llanma berilgan bolalar uchun bepul jarrohlik amaliyotlari tashkil etilishi belgilandi. Bu esa ko‘plab oilalarning moddiy yukini yengillashtirish bilan birga, bolalarning sog‘lom hayot kechirishi uchun muhim imkoniyat yaratdi.
    Tadbir davomida ota-onalar shifokorlar bilan bevosita muloqot qilib, farzandlarining salomatligi bo‘yicha o‘zlarini qiziqtirgan savollarga batafsil javob oldilar. Mutaxassislar tomonidan bolalarda uchraydigan kasalliklarning oldini olish, sog‘lom turmush tarziga rioya qilish va muntazam tibbiy nazoratning ahamiyati haqida tushuntirish ishlari ham olib borildi. 
    Aksiyaning eng e’tiborli va tarixiy ahamiyatga ega jihatlaridan biri — Toshkent shahridan tashrif buyurgan tajribali kardioxirurglar tomonidan Amudaryo tumanida ilk bor bolalarda yurak jarrohlik amaliyotlarining muvaffaqiyatli amalga oshirilgani bo‘ldi. Yuqori malakali mutaxassislar tomonidan o‘tkazilgan murakkab operatsiyalar zamonaviy tibbiy standartlar asosida bajarilib, yosh bemorlarning sog‘lig‘ini tiklashda muhim natijalarga erishildi. 
    Avvallari bunday murakkab amaliyotlarni o‘tkazish uchun bemorlar va ularning ota-onalari uzoq masofalarni bosib o‘tib, poytaxt yoki yirik tibbiyot markazlariga murojaat qilishlariga to‘g‘ri kelar edi. Endilikda esa Respublika Bolalar milliy tibbiyot markazi mutaxassislarining tashabbusi va ko‘magi bilan hududning o‘zida yuqori texnologik tibbiy yordam ko‘rsatish imkoniyati yaratildi. Eng muhimi, ushbu operatsiyalar bolalarning hayot sifatini yaxshilash, ularning sog‘lom va baxtli kelajagini ta’minlash yo‘lida muhim qadam bo‘ldi.
    Mazkur natija “Salomatlik aksiyasi”ning nafaqat profilaktik ko‘riklar, balki amaliy tibbiy yordam ko‘rsatish borasida ham yuksak samaradorlikka ega ekanini yaqqol namoyon etdi. 
     Aholining tibbiy madaniyatini oshirish, chekka hududlarda yashovchi bolalarga sifatli va zamonaviy tibbiy xizmatlarni yaqinlashtirishga qaratilgan bunday ezgu tashabbuslar jamiyatda sog‘lom avlodni tarbiyalash yo‘lidagi muhim amaliy qadam bo‘lib xizmat qilmoqda.
     “Salomatlik aksiyasi” bolalar salomatligi – kelajak poydevori ekanligining yaqqol isboti bo‘ldi. Ularning sog‘lom ulg‘ayishi uchun yaratilayotgan imkoniyatlar, malakali shifokorlar tomonidan ko‘rsatilayotgan beg‘araz yordam va tibbiyot tizimidagi islohotlar xalq farovonligini ta’minlashga xizmat qilmoqda.
     Mazkur aksiya yakunlari bo‘yicha ko‘plab bolalar malakali tibbiy ko‘rikdan o‘tkazilib, zarur tavsiyalar berildi hamda davolanish va jarrohlik amaliyotlariga ehtiyoji mavjud bemorlar keyingi bosqichlarga yo‘naltirildi.