Qoraqalpog'iston Respublikasi Amudaryo tumani hokimligi

 Amudaryo tumanidagi qadimiy maskan — Chilpiq qal’asi yana bir muhim ma’naviy-ma’rifiy tadbirga mezbonlik qildi. Bu yerda “Orol dengiziga poyezd” yoshlar ekologik aksiyasi hamda “Biz Orol bilan birgamiz” eko-marafoni yuqori ruh va katta taassurotlarga boy tarzda tashkil etildi. Mazkur tadbir nafaqat ekologik muammolarga e’tibor qaratish, balki yoshlar qalbida tabiatga mehr, tarixiy merosga hurmat va turizm madaniyatini shakllantirishga xizmat qilgani bilan ahamiyatlidir.

    Aksiyada respublikamizning turli hududlaridan tashrif buyurgan oliy ta’lim muassasalari talabalari faol ishtirok etdilar. Jumladan, Andijon davlat universiteti, Namangan davlat universiteti, Farg‘ona davlat universiteti, Guliston davlat universiteti, Jizzax davlat pedagogika universiteti, Chirchiq davlat pedagogika universiteti, Samarqand davlat universiteti, Navoiy davlat universiteti, Buxoro davlat universiteti, Qarshi davlat universiteti, Termiz davlat universiteti, Urganch davlat universiteti, O‘zbekiston Milliy universiteti hamda Qoraqalpog‘iston Respublikasidagi oliy ta’lim muassasalarida ekologiya va turizm yo‘nalishlarida tahsil olayotgan talabalar ishtiroki tadbirga yanada keng qamrov va mazmun bag‘ishladi.

    Yoshlar dastlab tarix nafasi ufurib turgan Chilpiq qal’asi bilan yaqindan tanishdilar. Ming yillik tarixni o‘z bag‘rida saqlab kelayotgan ushbu muqaddas maskan ularda katta taassurot uyg‘otdi. Qadimiy devorlar, afsonalar bilan uyg‘unlashgan tarixiy manzara yoshlarni ajdodlar merosi haqida chuqurroq o‘ylashga undadi. Ayniqsa, Orolbo‘yi hududining boy tarixi, madaniyati va tabiiy salohiyati haqidagi ma’lumotlar talabalarning ilmiy va ma’naviy dunyoqarashini yanada kengaytirdi.

     Tadbir davomida ekologik muammolar, xususan, Orol dengizi fojiasining bugungi avlod zimmasiga yuklayotgan mas’uliyati haqida ham fikr almashildi. Yoshlar tabiatni asrash, ekologik madaniyatni yuksaltirish va yashil turmush tarzini targ‘ib qilish borasida o‘z tashabbuslarini ilgari surdilar. “Biz Orol bilan birgamiz” eko-marafoni esa tabiat va inson taqdiri bir-biriga chambarchas bog‘liq ekanini yana bir bor namoyon etdi.

     Bugungi kunda turizm nafaqat iqtisodiy soha, balki xalqlarni yaqinlashtiruvchi, milliy qadriyatlarni dunyoga tanituvchi muhim ma’naviy ko‘prik vazifasini bajarmoqda. Ayniqsa, ekologik va tarixiy turizm yo‘nalishlarini rivojlantirish orqali hududlarning tabiiy va madaniy boyliklarini asrab-avaylash, ularni kelajak avlodga yetkazish imkoniyati kengaymoqda. Orolbo‘yi hududlarida o‘tkazilayotgan bunday tadbirlar esa yoshlarni yurt tarixiga befarq bo‘lmaslikka, tabiatni sevishga va ichki turizmni rivojlantirishga chorlaydi.

     Chilpiq qal’asida tashkil etilgan ushbu ekologik aksiya yoshlar uchun oddiy sayohat emas, balki katta hayotiy saboq bo‘ldi. Ular nafaqat tarixiy obidalarni ko‘rdilar, balki ekologik muammolarning asl mohiyatini his etdilar, tabiat oldidagi inson mas’uliyatini chuqur angladilar. Bu esa ertangi kunning ekologik ongli, vatanparvar va tashabbuskor yoshlarini tarbiyalashda muhim ahamiyat kasb etadi.

     Shubhasiz, ana shunday ma’naviy-ma’rifiy va ekologik loyihalar yoshlarning dunyoqarashini boyitadi, ularni ona yurtga muhabbat ruhida tarbiyalaydi hamda Orolbo‘yi hududining turistik salohiyatini keng targ‘ib qilishga xizmat qiladi.

Charos Arslonova, tuman hokimligining Axborot xizmati rahbari.