Qoraqalpog'iston Respublikasi Amudaryo tumani hokimligi

Amudaryo tumanida 9-may — Xotira va qadrlash kuni munosabati bilan “Burch, jasorat, matonat!” shiori ostida keng ko‘lamli ma’naviy-ma’rifiy bayram tadbiri bo‘lib o‘tdi. Ushbu sana xalqimizning jasorat, fidoyilik va inson qadri kabi yuksak fazilatlarga bo‘lgan cheksiz hurmatining yana bir yorqin ifodasiga aylandi.
    Tuman markazidagi Xotira maydonida tashkil etilgan tadbirda tuman hokimi Sobir Xo‘jametov, mudofaa va huquqni muhofaza qiluvchi idoralar vakillari, davlat va jamoat tashkilotlari rahbarlari, nuroniylar, yoshlar hamda keng jamoatchilik vakillari ishtirok etdi. Xotira maydonida hukm surgan tantanavor va ayni paytda hayajonli muhit barchaga bugungi tinch va osoyishta hayotning naqadar ulug‘ ne’mat ekanini yana bir bor his qildirdi.
    Tadbir avvalida “Burch, jasorat, matonat!” shiori ostida o‘tkazilgan velomarafon hamda yugurish musobaqalari g‘oliblari tantanali ravishda taqdirlandi. Mazkur sport tadbirlari yoshlar orasida sog‘lom turmush tarzini targ‘ib qilish, ularni sportga keng jalb etish, zararli illatlar va giyohvandlikning oldini olish, eng muhimi, yosh avlod qalbida Vatanga sadoqat va matonat tuyg‘ularini mustahkamlashga xizmat qildi.
    So‘zga chiqqanlar sport musobaqalari nafaqat jismoniy chiniqish, balki vatanparvarlik, jasorat va iroda maktabi ekanini alohida ta’kidladilar. Zero, sog‘lom va ma’naviy yetuk avlod — yurt tayanchi, millat kelajagining ishonchli kafolatidir.
    Bayram tadbirini tuman hokimi Sobir Xo‘jametov tabrik so‘zi bilan ochib berdi. Tuman hokimi o‘z nutqida bugungi dorilamon va osuda hayotimiz zamirida ajdodlarimizning mardligi, fidoyiligi hamda Vatan uchun jonini ayamagan insonlarning buyuk jasorati mujassam ekanini ta’kidladi.
— Xotira va qadrlash kuni — bu faqat tarixni eslash emas, balki ajdodlarimizning mardlik maktabidan saboq olish, ularning pok ruhlari oldida bosh egish va bugungi tinchlikning qadriga yetish kunidir. Yurt tinchligini asrash, xalq farovonligi yo‘lida xizmat qilish har birimizning muqaddas burchimizdir, — dedi tuman hokimi.
    Tadbir davomida so‘zga chiqqan nuroniylar, faxriylar va jamoatchilik vakillari ham Xotira va qadrlash kuni xalqimiz uchun eng ulug‘, eng qadrli sanalardan biri ekanini qayd etdilar. Ular bugungi farovon hayot, osoyishta kunlar va mustaqil yurtimiz taraqqiyoti ortida ajdodlarimizning mashaqqatli sinovlari, sabr-toqati hamda buyuk matonati mujassam ekanini alohida ta’kidlashdi.
    Tuman Madaniyat bo‘limi ijodkorlari tomonidan ijro etilgan Vatan, tinchlik va jasoratni madh etuvchi kuy-qo‘shiqlar, sahna ko‘rinishlari tadbirga yanada ko‘tarinki ruh bag‘ishladi. Harbiy orkestrning tantanavor sadolari ostida Motamsaro ona haykali poyiga gulchambarlar qo‘yilib, tadbir ishtirokchilari Ikkinchi jahon urushi yillarida Vatan ozodligi, xalq tinchligi va bugungi osuda hayot uchun jon fido qilgan yurtdoshlarimiz xotirasiga yuksak hurmat bajo keltirdilar.
    Shuningdek, Afg‘oniston hududida xizmat burchini ado etish vaqtida halok bo‘lgan yurtdoshlarimiz xotirasiga bag‘ishlab bunyod etilgan yodgorlik ham ziyorat qilindi. Ularning mardligi, jasorati va Vatan oldidagi fidokorona xizmatlari chuqur ehtirom bilan yod etildi.
    Tadbir davomida yosh avlodni Vatanga muhabbat, milliy qadriyatlarga hurmat, ajdodlar xotirasiga sadoqat ruhida tarbiyalash bugungi kunning eng dolzarb vazifalaridan biri ekani alohida qayd etildi. Chunki o‘z tarixini, qahramonlarini va milliy qadriyatlarini qadrlagan xalqning kelajagi ham buyuk bo‘ladi.
    Darhaqiqat, Xotira va qadrlash kuni — bu faqat o‘tganlarni yod etish emas. Bu sana inson qadrini ulug‘lash, bugungi tinch hayotning qadriga yetish, yurt ravnaqi va xalq farovonligi yo‘lida birdamlikni mustahkamlashga xizmat qiluvchi ulug‘ ayyomdir.
    Xotira — millat qalbidagi abadiy nur, qadrlash esa xalqimizga xos eng ezgu fazilatdir. Ajdodlar jasorati hech qachon unutilmaydi, ularning porloq xotirasi qalblarda mangu yashaydi.