Qoraqalpog‘iston Respublikasi Konstitutsiyasi qabul qilinganining 33 yilligi keng nishonlandi
2026-04-09 17:35:00 / Yangiliklar
1993-yil 9-aprel sanasi Qoraqalpog‘iston Respublikasi tarixiga muhrlangan ulkan siyosiy-huquqiy voqea sifatida alohida o‘rin tutadi. Aynan shu kuni Qoraqalpog‘iston Respublikasi Oliy Kengashining sessiyasida Respublikaning asosiy qonuni — Konstitutsiya qabul qilinib, xalq suvereniteti, inson huquq va erkinliklari hamda davlat boshqaruvining mustahkam huquqiy poydevori yaratildi. Bugun ushbu muhim sanaga 33 yil to‘ldi.
Oradan 33 yil o‘tib, ushbu muhim sana yana bir bor yuksak ruh, faxr va iftixor bilan qarshi olindi. Har yili an’anaga aylanganidek, bu sana munosabati bilan respublika bo‘ylab turli madaniy-ma’rifiy tadbirlar, davra suhbatlari, uchrashuvlar tashkil etilib, yurtdoshlarimiz qalbida Konstitutsiyaga hurmat va sadoqat tuyg‘ularini mustahkamlashga alohida e’tibor qaratilmoqda.
Sana munosabati bilan tuman Madaniyat bo‘limida ham bayramona tadbir tashkil etildi. Tadbir O‘zbekiston va Qoraqalpog‘iston Respublikalarining davlat madhiyalari sadolari ostida tantanali ravishda boshlandi.
Bayram dasturini Xalq deputatlari tuman Kengashi kotibiyati mudiri Mansur O‘razboev kirish so‘zi bilan ochib berdi. U o‘z nutqida Konstitutsiya har qanday davlatning asosiy huquqiy tayanchi ekanini alohida ta’kidlab, uning mamlakat siyosiy hayotidagi o‘rni va ahamiyati haqida atroflicha to‘xtaldi. Shuningdek, u barcha ishtirokchilarni ushbu qutlug‘ sana bilan samimiy muborakbod etdi.
Tadbir davomida tuman Madaniyat bo‘limi san’atkorlari hamda yosh, umidli ijodkorlar tomonidan namoyish etilgan badiiy chiqishlar yig‘ilganlarga unutilmas taassurotlar ulashdi. Vatan, tinchlik va do‘stlikni madh etuvchi kuy-qo‘shiqlar, dilbar sahna ko‘rinishlari bayramga yanada ko‘tarinki ruh bag‘ishladi. Iste’dodli xonandalar ijrosidagi qo‘shiqlar tomoshabinlar qalbida yurtga muhabbat va sadoqat tuyg‘ularini yanada mustahkamladi.
Tadbirda so‘zga chiqqanlar ta’kidlaganidek, Konstitutsiya — ko‘p millatli xalqimizning hamjihatligi va birdamligini mustahkamlovchi, ularni ezgu maqsadlar sari yetaklovchi bosh qomusdir. Unda belgilangan tamoyillar jamiyat taraqqiyoti, inson manfaatlarini ta’minlash va adolatli fuqarolik jamiyatini barpo etishda muhim dasturilamal bo‘lib xizmat qilmoqda.
Yurtimizning bugungi taraqqiyot bosqichlariga nazar tashlar ekanmiz, iqtisodiyotimizning izchil rivojlanib borayotgani, aholi turmush farovonligi ortib borayotgani, keng ko‘lamli bunyodkorlik ishlari amalga oshirilayotgani — bularning barchasi Konstitutsiyamizda mujassam etilgan ezgu g‘oyalar va puxta o‘ylangan strategik maqsadlarning amaliy ifodasidir.
Ayniqsa, mamlakatimiz rahbari tashabbusi bilan Qoraqalpog‘iston Respublikasini har tomonlama rivojlantirishga qaratilgan alohida qaror va davlat dasturlarining qabul qilinishi hudud hayotida tub burilish yasamoqda. Bugungi kunda ushbu dasturlar asosida keng ko‘lamli qurilish, ta’mirlash va obodonlashtirish ishlari olib borilmoqda, yangi ijtimoiy obyektlar barpo etilmoqda, aholi uchun munosib turmush sharoitlari yaratilmoqda.
Darhaqiqat, Konstitutsiya — xalq irodasining ifodasi, davlat mustaqilligining ramzi va huquqiy demokratik jamiyat qurish yo‘lidagi ishonchli kafolatdir. Qoraqalpog‘iston Respublikasi Konstitutsiyasi ham ana shu yuksak mezonlarga to‘la javob beradi. U O‘zbekiston Respublikasi Konstitutsiyasi bilan uyg‘un holda, shu bilan birga, xalqning tarixiy, madaniy va ijtimoiy xususiyatlarini inobatga olgan holda ishlab chiqilgan. Unda fuqarolarning asosiy huquq va erkinliklari, davlat tuzilmasi, hokimiyat organlari faoliyati hamda ularning o‘zaro munosabatlari aniq belgilab qo‘yilgan.
Xulosa o‘rnida aytish joizki, 9-aprel sanasi nafaqat muhim huquqiy hujjat qabul qilingan kun, balki Qoraqalpog‘iston xalqi uchun g‘urur va iftixor manbai bo‘lgan ulug‘ sana sifatida e’zozlanadi.
Charos Arslonova, tuman hokimligi Axborot xizmati rahbari