Qoraqalpog'iston Respublikasi Amudaryo tumani hokimligi

Amudaryo tumanida bahorning ilk nafasi, yangilanish va yasharish ramzi bo‘lgan Navro‘z umumxalq bayrami bu yil ham o‘ziga xos ruh, yuqori shukuh va milliy qadriyatlarimizga xos an’analar asosida keng nishonlandi. Ushbu bayram nafaqat tabiatning uyg‘onishi, balki inson qalbining poklanishi, mehr-oqibat va bag‘rikenglik tuyg‘ularining yuksalishiga xizmat qilishi bilan ham alohida ahamiyat kasb etadi.
Do‘stlik mahallasi hududidagi Vaxum aholi punktida joylashgan bolalar o‘yingohi bayramning markaziy maskaniga aylandi. Bu maskan go‘yo milliy qadriyatlar, urf-odatlar va an’analar uyg‘unlashgan katta sahnaga aylandi. Bu yerda yozilgan fayzli dasturxonlar xalqimizning asrlar davomida shakllangan mehmondo‘stligi, sahovatpeshaligi va bag‘rikengligini yana bir bor namoyon etdi. Bahoriy noz-ne’matlar, milliy taomlar bilan bezatilgan dasturxonlar har bir tashrif buyuruvchiga ko‘tarinki kayfiyat ulashdi.
Bayram davomida tashkil etilgan sahna ko‘rinishlari milliy qadriyatlarimizning mazmun-mohiyatini chuqur ifoda etdi. Turli millat vakillarining hamjihatlikda namoyish etgan chiqishlari yurtimizdagi do‘stlik va totuvlik muhitining yorqin ifodasi bo‘ldi. Bahor, Vatan, yangilanish va baxtni madh etuvchi kuy-qo‘shiqlar, jozibador raqslar esa bayramga o‘zgacha ruh bag‘ishlab, tomoshabinlarga unutilmas taassurotlar qoldirdi. Taniqli san’atkorlarning chiqishlari esa tadbirning badiiy saviyasini yanada yuksaltirdi.
Shuningdek, bayram tadbirlari doirasida o‘tkazilgan milliy o‘yinlar va sport musobaqalari ham keng jamoatchilik e’tiborini tortdi. Arqon tortish, tosh ko‘tarish, milliy kurash kabi bellashuvlar ishtirokchilar o‘rtasida nafaqat sog‘lom raqobatni shakllantirdi, balki yosh avlodni jismonan chiniqtirish, milliy sport turlariga qiziqishini oshirishda muhim omil bo‘lib xizmat qildi. Bu esa Navro‘zning nafaqat madaniy, balki tarbiyaviy ahamiyatga ham ega ekanini yana bir bor ko‘rsatdi.
Bayram tantanalarida respublika va tuman miqyosidagi rahbarlar, turli korxona va tashkilotlar mas’ullari, ta’lim muassasalari vakillari hamda keng jamoatchilikning faol ishtiroki ushbu tadbirning nufuzi va ahamiyatini yanada oshirdi. Ayniqsa, yoshlarning bayramdagi faolligi, ularning milliy qadriyatlarga bo‘lgan hurmati va qiziqishi quvonarli holatdir.
Navro‘z – bu shunchaki bayram emas. U xalqimizning ko‘p asrlik tarixiy xotirasi, madaniy merosi va ma’naviy qadriyatlarining mujassam ifodasidir. U insonlarni yaxshilikka, mehr-oqibatga, birlik va hamjihatlikka chorlaydi. Shu bois ham “Navro‘zni ulug‘lash — insonni ulug‘lashdir” degan ezgu g‘oya har bir tadbirda, har bir chiqishda o‘z ifodasini topdi.
Amudaryo tumanida o‘tkazilgan ushbu Navro‘z bayrami xalqimizning boy ma’naviy merosi, yuksak insoniy fazilatlari va ezgu qadriyatlarining yorqin namoyoniga aylandi. Bu kabi tadbirlar jamiyatda birdamlikni mustahkamlash, milliy o‘zlikni anglash va yosh avlodni vatanparvarlik ruhida tarbiyalashda muhim ahamiyat kasb etadi.
Darhaqiqat, Navro‘z – yangilanish, ezgulik va umid bayrami. U har bir xonadonga fayz, baraka, har bir qalbga esa iliqlik va mehr olib kiradi.
 Yangi kunlar yangi orzular sari yetaklasin! Navro‘zingiz muborak bo‘lsin!