Amudaryo tumanida 8-mart – Xalqaro xotin-qizlar kuni munosabati bilan tantanali bayram tadbiri o‘tkazildi
2026-03-06 17:50:00 / Yangiliklar
Bahor faslining ilk kunlari bilan birga kirib keladigan 8-mart – Xalqaro xotin-qizlar kuni yurtimizda ayollarga bo‘lgan yuksak hurmat va ehtiromning yorqin ifodasidir. Ushbu sana nafaqat bayram, balki jamiyatimizda ayollarning o‘rni, ularning fidokorona mehnati va beqiyos mehr-muhabbatini qadrlash kuni sifatida alohida ahamiyat kasb etadi.
Ushbu sana munosabati bilan Amudaryo tumanida ham bayramona ruhda tantanali tadbir tashkil etildi. Tuman Madaniyat bo‘limida o‘tkazilgan ushbu tadbirda turli sohalarda samarali mehnat qilib kelayotgan faol xotin-qizlar, jamoatchilik vakillari, nuroniy onaxonlar, sportchi yoshlar ishtirok etdi.
Tadbirni Amudaryo tumani hokimi o‘rinbosari Nodirbek Kamolov ochib berdi. U o‘z so‘zida tuman hokimining bayram tabrigini o‘qib eshittirib, barcha xotin-qizlarni ushbu ulug‘ ayyom bilan samimiy muborakbod etdi. Tabrikda ayollarning jamiyat taraqqiyotidagi o‘rni, ularning fidoyiligi va hayotimizdagi beqiyos xizmatlari yana bir bor e’tirof etildi. Xotin-qizlarni e’zozlash jamiyatimizning eng muqaddas qadriyatlaridan biri ekani, ular oilada mehr-muhabbat va tarbiya maskani bo‘lsa, jamiyat hayotida fidoyiligi, tashabbuskorligi va mehnatsevarligi bilan alohida o‘rin egallashi ta’kidlandi.
Shuningdek, tabrikda bugungi kunda davlatimiz tomonidan xotin-qizlarni har tomonlama qo‘llab-quvvatlash, ularning huquq va manfaatlarini himoya qilish, ta’lim olishi, kasb-hunar egallashi, tadbirkorlik faoliyatini rivojlantirishi uchun keng imkoniyatlar yaratilayotgani alohida qayd etildi. Bu e’tibor va g‘amxo‘rlik xotin-qizlarning jamiyatdagi faolligini oshirish, ularning orzu-intilishlarini ro‘yobga chiqarishda muhim omil bo‘lib xizmat qilayotgani ta’kidlab o‘tildi.
Tadbir davomida o‘zining fidokorona mehnati, tashabbuskorligi va jamoat ishlaridagi faolligi bilan boshqalarga o‘rnak bo‘lib kelayotgan bir guruh xotin-qizlar alohida e’tirof etildi. Ular Amudaryo tumani hokimining tashakkurnomasi hamda esdalik sovg‘alari bilan taqdirlandi. Bu esa ayollarning jamiyat hayotidagi o‘rni va mehnatiga berilayotgan yuksak e’tiborning yana bir ifodasi bo‘ldi.
Shuningdek, tadbirda ishtirok etgan barcha xotin-qizlarga bayram munosabati bilan esdalik sovg‘alari topshirilib, ularga samimiy tilaklar bildirildi. Bu esa bayram kayfiyatini yanada ko‘tarib, tadbirga o‘zgacha ruh bag‘ishladi.
Bayram tadbiri tuman Madaniyat bo‘limi ijodkorlari tomonidan tayyorlangan rang-barang konsert dasturi bilan davom etdi. Konsert davomida bahor, go‘zallik, ona, ayol va muhabbatni madh etuvchi kuy-qo‘shiqlar ijro etildi. Dilbar raqslar, sahna ko‘rinishlari hamda hazilona chiqishlar tomoshabinlarga manzur bo‘lib, yig‘ilganlarga ko‘tarinki kayfiyat ulashdi. Ayniqsa, madaniyat xodimlari tomonidan sahnalashtirilgan qiziqarli sahna ko‘rinishlari va hazil-mutoyibaga boy kulguli chiqishlar tadbirga o‘zgacha zavq bag‘ishlab, tomoshabinlar tomonidan iliq kutib olindi.
Ijodkorlar tomonidan ijro etilgan kuy-qo‘shiqlar bahorning tarovati, ayollarning go‘zalligi va mehr-muhabbatini tarannum etib, tadbir ishtirokchilariga unutilmas lahzalarni tuhfa etdi.
Samimiy tabriklar, ezgu tilaklar va go‘zal kuy-qo‘shiqlarga boy bo‘lgan mazkur bayram tadbiri xotin-qizlarga bo‘lgan yuksak hurmat va ehtiromning yana bir yorqin ifodasi bo‘ldi. Ayollarga ko‘rsatilayotgan bunday e’tibor ularning jamiyatdagi faolligini yanada oshirishga, oilalarda mehr-oqibat va totuvlik muhitini mustahkamlashga xizmat qiladi.
Shubhasiz, yurtimiz taraqqiyoti, jamiyat ravnaqi va farovon kelajak barpo etishda xotin-qizlarning o‘rni beqiyosdir. Ularning fidokorona mehnati, sabr-toqati va mehr-muhabbati har bir oilaning, qolaversa, butun jamiyatning mustahkam tayanchi bo‘lib xizmat qiladi.
Charos Arslonova, tuman hokimligining Axborot xizmati rahbari.