Qoraqalpog'iston Respublikasi Ichki ishlar vaziri Baxtiyar Torebekov Amudaryo tumanida bo'ldi
2026-02-17 10:40:00 / Yangiliklar
Amudaryo tumani Durunki mahallasida jinoyatchilik va huquqbuzarliklarning oldini olish, hududlarda xavfsiz muhitni ta’minlash masalalariga bag‘ishlangan ochiq muloqot bo‘lib o‘tdi. Unda Baxtiyar Torebekov — Qoraqalpog‘iston Respublikasi Ichki ishlar vaziri ishtirok etdi.
Tadbirda Amudaryo tumani hokimi Sobir Xo‘jametov, tuman prokurori Bahram Masharipov, tuman Ichki ishlar bo‘limi boshlig‘i Timur Doshumbayev, shuningdek, mahalla fuqarolar yig‘ini raislari, profilaktika inspektorlari, “mahalla yettiligi” a’zolari hamda keng jamoatchilik vakillari qatnashdi.
Uchrashuv davomida tumandagi kriminogen vaziyat atroflicha tahlil qilinib, sodir etilayotgan jinoyat va huquqbuzarliklarning kelib chiqish sabablari muhokama qilindi. Ayniqsa, yoshlar o‘rtasida jinoyatchilikning oldini olish, oilaviy nizolarni barvaqt bartaraf etish, xotin-qizlar va voyaga yetmaganlar bilan manzilli ishlash, profilaktik tadbirlarni kuchaytirish masalalariga alohida e’tibor qaratildi.