Qoraqalpog'iston Respublikasi Amudaryo tumani hokimligi

1989-yil 15-fevral — Afg‘oniston hududidan sobiq Sovet Ittifoqi qo‘shinlari to‘liq olib chiqilgan kun sifatida tarixda muhrlangan. Ushbu sana yillar o‘tgan sari jasorat va fidoyilik timsoliga, jang-u jadallarda qatnashgan minglab yurtdoshlarimiz xotirasini yod etish, omon qaytgan faxriylarimizga hurmat bajo keltirish kuniga aylandi.
    O‘n yilga yaqin vaqt mobaynida davom etgan harbiy harakatlar ko‘plab oilalar taqdiriga o‘z ta’sirini o‘tkazdi. Respublikamizdan 3580 nafar harbiy xizmatchi ushbu urushda ishtirok etib, o‘z burchini ado etdi. Bugun esa ularning jasorati va sabr-matonati tinch va osoyishta hayotimizning qadriga yetish, yosh avlodni vatanparvarlik ruhida tarbiyalashda muhim ibrat maktabi bo‘lib xizmat qilmoqda. 
    Joriy yilda sobiq ittifoq qo‘shinlari Afg‘onistondan olib chiqilganining 37 yilligi munosabati bilan Amudaryo tumanida ham keng ko‘lamli tadbirlar tashkil etildi. Sana arafasida tuman Xotira maydonida afg‘on urushi faxriylari xotirasiga bag‘ishlab haykal muqaddas o‘rnatilgani tadbirning ma’naviy ahamiyatini yanada oshirdi. Ushbu maskanda o‘tkazilgan marosimda jangchi-faxriylar, nuroniylar, yoshlar hamda keng jamoatchilik vakillari ishtirok etdi.
    Tuman hokimligi tashabbusi bilan tashkil etilgan tadbirda hokimning yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Nodirbek Kamolov, tuman Mudofaa ishlari bo‘limi boshlig‘i Shuhrat Mamatov, O‘zbekiston “Veteran” jangchi-faxriy va nogironlar birlashmasining respublika va tuman miqyosidagi rahbarlari hamda a’zolari, bir guruh baynalmilal jangchilar qatnashdi.
    Tadbirni ochib bergan tuman hokimi o‘rinbosari Nodirbek Kamolov o‘z nutqida 15-fevral sanasi faxriylar uchun chin ma’nodagi bayram ekanini alohida ta’kidladi. U murakkab sharoitlarda jang-u jadallarda qatnashib, Vatanga omon qaytgan yurtdoshlarimizning jasorati, matonati va sadoqati bugungi tinch hayotimizning qadriga yetishda muhim o‘rin tutishini qayd etdi.
    So‘zga chiqqanlar yurtimizda jangchi-faxriylarni har tomonlama qo‘llab-quvvatlash, ularning munosib hayot kechirishi, salomatligini tiklashi va ijtimoiy himoyasini ta’minlash borasida amalga oshirilayotgan ishlar haqida to‘xtaldi. Shu bilan birga, Afg‘on urushi saboqlari bugungi yosh avlod uchun ibrat maktabi ekani alohida qayd etildi.
    Tadbir davomida amudaryolik afg‘on urushi qatnashchilari ishtirokida Xotira maydonidagi haykal poyiga gulchambarlar qo‘yildi. Baynalmilal jangchilar Afg‘onistondagi urush harakatlarida halok bo‘lgan quroldoshlari xotirasiga hurmat bajo keltirib, ularning yorqin xotirasini yod etdilar. Yurtimizda tinchlik va osoyishtalik mangu bo‘lishi tilab, duoga qo‘l ochildi. 
    Tantanalar Mang‘it shahridagi “Diamond” restoranida davom ettirildi. Bu yerda faxriylar uchun bayram dasturxoni yozilib, ularning xizmatlari e’tirof etildi. Sana munosabati bilan tashakkurnomalar va esdalik sovg‘alari topshirildi. Faxriylar hukumatimiz tomonidan ko‘rsatilayotgan e’tibor va g‘amxo‘rlik uchun minnatdorlik bildirdilar.
    Bayram tadbirida tuman Madaniyat bo‘limi san’atkorlari tomonidan konsert dasturi namoyish etildi. Vatan, ona, tinchlik va shukronalikni madh etuvchi kuy-qo‘shiqlar tadbirga ko‘tarinki ruh bag‘ishladi.

Charos Arslonova, tuman hokimligining Axborot xizmati rahbari.