Uyshin mahallasida zamonaviy tibbiyot maskani aholiga sifatli tibbiy xizmat ko‘rsatmoqda
2026-02-03 17:45:00 / Yangiliklar
Bugun yurtimizda aholining salomatligini mustahkamlash, tibbiy xizmatlar sifatini oshirish davlat siyosatining ustuvor yo‘nalishlaridan biriga aylangan. Bu borada davlat bilan bir qatorda saxovatpesha tadbirkorlarning ijtimoiy mas’uliyatini his etib, xalq manfaatini ko‘zlab amalga oshirayotgan ezgu ishlari alohida e’tirofga loyiq. Ana shunday xayrli tashabbuslardan biri Amudaryo tumani Uyshin mahallasida barpo etilgan zamonaviy oilaviy shifokorlik punkti bo‘ldi.
Mazkur tibbiyot maskani bugungi kunda mahalla aholisi salomatligini mustahkamlash, kasalliklarning oldini olish va birlamchi tibbiy xizmatlarni sifatli ko‘rsatishda muhim ahamiyat kasb etmoqda. Eng muhimi, bu inshoot to‘liq saxovatpesha tadbirkor homiyligida qurilib, xususiy sektorning ijtimoiy sohadagi faol ishtirokini yaqqol namoyon etdi.
Avvallari Uyshin mahallasi aholisi tibbiy xizmat olish uchun Qipchoq shaharchasida joylashgan 1-sonli oilaviy poliklinikaga borishga majbur edi. Ushbu poliklinika mahalladan 8–9 kilometr uzoqlikda joylashgani sababli, ayniqsa keksalar, nogironligi bo‘lgan fuqarolar va yosh bolali ayollar uchun bu masofa jiddiy muammolar tug‘dirardi. Qishning sovuq, izg‘irinli kunlari yoki yozning jazirama issig‘ida transport topish mushkulligi tibbiy xizmatdan foydalanishni yanada qiyinlashtirgan.
Aholining ana shu dolzarb ehtiyojlari inobatga olinib, tadbirkor tashabbusi qo‘llab-quvvatlandi hamda Qoraqalpog‘iston Respublikasi Sog‘liqni saqlash vazirligi tomonidan Uyshin mahallasida yangi tibbiy punkt qurish loyihasi tasdiqlandi. Natijada qisqa vaqt ichida barcha zamonaviy talab va standartlarga javob beradigan tibbiyot muassasasi barpo etildi.
Bugungi kunda mazkur oilaviy shifokorlik punkti ultra tovush tekshiruvi (UZI), elektrokardiografiya (EKG), stomatologiya xizmatlari uchun zarur uskunalar, zamonaviy kompyuter texnikalari va boshqa ilg‘or tibbiy jihozlar bilan to‘liq ta’minlangan. Bu esa mahalla aholisiga turli tekshiruv va davolanishlarni uzoq yo‘l bosmasdan, o‘z yashash hududida amalga oshirish imkonini bermoqda.
Oilaviy shifokorlik punktida tajribali shifokorlar hamda mutaxassislar faoliyat olib bormoqda. Xususan, umumiy amaliyot shifokori, pediatr, akusher-ginekolog, stomatolog hamda qator mutaxassislar aholiga malakali tibbiy xizmat ko‘rsatmoqda. Shuningdek, hamshiralar va o‘rta tibbiyot xodimlari tomonidan emlash, profilaktik ko‘riklar, onalar va bolalar salomatligini muhofaza qilishga qaratilgan chora-tadbirlar muntazam amalga oshirilmoqda.
Natijada mahalla aholisi turli kasalliklar bo‘yicha dastlabki tashxis va maslahatlarni hududning o‘zida, tezkor va qulay tarzda olish imkoniyatiga ega bo‘lmoqda.
Shubhasiz, bunday tibbiyot maskanining tashkil etilganligi nafaqat tibbiy infratuzilmaning kengayishi, balki aholining hayot sifati yaxshilanishi, sog‘lom turmush tarzini shakllantirish va kasalliklarni erta aniqlash borasida muhim qadamdir. Eng asosiysi, bu ezgu ish xalq bilan tadbirkor, davlat bilan jamiyat o‘rtasidagi hamkorlik samaradorligining yorqin ifodasidir.
Uyshin mahallasida barpo etilgan ushbu oilaviy shifokorlik punkti kelgusida ham aholi salomatligini muhofaza qilish yo‘lida ishonchli tayanch bo‘lib xizmat qilishi shubhasiz. Saxovat, tashabbus va ezgulik uyg‘unlashgan bunday loyihalar yurtimizda tobora ko‘payib borayotgani esa barchamizni quvontiradi.
Charos Arslonova, tuman hokimligining Axborot xizmati rahbari.