Qoraqalpog'iston Respublikasi Amudaryo tumani hokimligi

Amudaryo tumanining “To‘lqin” va “Oq oltin” OFY hududlarida 2026-yil chigit ekish mavsumiga tayyorgarlik ishlari doirasida qator amaliy seminarlar tashkil etildi. 
Seminarlarda Qoraqalpog‘iston Respublikasi Jo‘qorg‘i Kengesining Agrar, suv xo‘jaligi, tabiatni muhofaza qilish va ekologiya masalalari qo‘mitasi raisi Anvar Jumanazarov, Suv xo‘jaligi vaziri Baxtiyor Yusupov,  qishloq va suv xo‘jaligi sohalariga mas’ul tashkilotlar rahbarlari, tuman hokimlarining qishloq va suv xo‘jaligi masalalari bo‘yicha o‘rinbosarlari hamda fermerlar ishtirok etdilar. Ushbu tadbirlar qishloq xo‘jaligi ishlarini ilmiy asosda, belgilangan agrotexnik muddatlarda va yuqori sifat bilan amalga oshirishga qaratilgani bilan ahamiyat kasb etdi.
Seminarlar davomida qishloq xo‘jaligi texnikalarini ta’mirlash ustaxonalarida olib borilayotgan ishlar, texnika va agregatlarni mavsumga shay holatga keltirish jarayonlari atroflicha ko‘zdan kechirildi. Shuningdek, ekin maydonlarini shudgorlash, lazerli tekislash, sho‘r yuvishga yer tayyorlash, chel olish va sho‘r yuvish ishlarining borishi yuzasidan amaliy tushuntirishlar berildi.
Urug‘lik chigitini tozalash, saralash, tuksizlantirish va dorilash, biolaboratoriyalarni mavsumga tayyorlash masalalari ham seminarlarning muhim yo‘nalishlaridan bo‘ldi. Bu jarayonlar kelgusida sog‘lom ko‘chatlar yetishtirish va yuqori hosildorlikka erishishda muhim omil ekani alohida ta’kidlandi.
Seminarlar jarayonida Qoraqalpog‘iston Respublikasi Jo‘qorg‘i Kengesining Agrar, suv xo‘jaligi, tabiatni muhofaza qilish va ekologiya masalalari qo‘mitasi raisi Anvar Jumanazarov so‘zga chiqib, yer va suv resurslaridan oqilona foydalanish, agrotexnik tadbirlarni to‘liq va sifatli bajarish bugungi kunning eng dolzarb vazifalaridan biri ekanini qayd etdi. U o‘z nutqida sho‘rlangan yerlarni meliorativ holatini yaxshilash, suv tejovchi texnologiyalarni keng joriy etish orqali barqaror hosildorlikka erishish mumkinligini ta’kidladi.
Shuningdek, Suv xo‘jaligi vaziri Baxtiyor Yusupov seminarda nutq so‘zlab, ichki sug‘orish tarmoqlarini betonlashtirish, qandaklarni belgilangan me’yorlarda qazish, suv sarfini aniq hisobga olish masalalariga alohida e’tibor qaratdi. Uning ta’kidlashicha, suvdan tejamkor va samarali foydalanish — bugungi sharoitda qishloq xo‘jaligi barqarorligining eng muhim omillaridan biridir.
Tadbirlar doirasida 2026-yil hosili uchun ekilgan g‘alla maydonlariga go‘ng chiqarish, yerga yer qo‘shish, meliorativ holatni yaxshilash, ichki sug‘orish tizimlarini takomillashtirish bo‘yicha amalga oshirilayotgan ishlar ham muhokama qilindi. Fermerlar bilan ochiq muloqotlar o‘tkazilib, ularning taklif va muammolari tinglandi. Mutasaddilar tomonidan amalga oshirilayotgan ishlar bo‘yicha aniq tavsiyalar berilib, ilg‘or tajribalarni ommalashtirish, fermerlar bilan hamkorlikni kuchaytirish zarurligi ta’kidlandi. 
Mazkur seminarlar Amudaryo tumanida 2026-yilgi qishloq xo‘jaligi mavsumiga puxta tayyorgarlik ko‘rilayotganidan, sohada tizimli yondashuv va amaliy nazorat kuchaytirilayotganidan dalolat beradi. Eng muhimi, seminarlar fermerlar bilim va tajribasini oshirish, yuqori hosil olish yo‘lida muhim amaliy jarayon sifatida xizmat qilmoqda.

Charos Arslonova, tuman hokimligining Axborot xizmati rahbari.