Do‘rman ovuli - mehnat, hamjihatlik va taraqqiyot maskani
2025-12-25 16:35:00 / Yangiliklar
Amudaryo tumanining Do‘rman ovuli hududning yirik qishloq xo‘jaligi mahsulotlari yetishtiriladigan, aholisi mehnatsevarligi, hamjihatligi va tinch-osoyishta hayot tarzi bilan ajralib turadigan ovullaridan biridir. Asrlar davomida shakllangan dehqonchilik va chorvachilik an’analari bugun zamonaviy yondashuvlar bilan uyg‘unlashib, ovul taraqqiyotining muhim omiliga aylanmoqda.
Bugungi kunda Do‘rman ovulida “Mahalla yettiligi” vakillarining samarali va tizimli faoliyati natijasida hududda ijtimoiy-iqtisodiy rivojlanish izchil ta’minlanmoqda. Mahalla faollari, mas’ul tashkilotlar hamkorligida aholi muammolari joyida o‘rganilib, ularni bartaraf etish bo‘yicha amaliy ishlar olib borilmoqda.
Ovulda hozirgi kunda 514 ta xonadonda 774 ta oila tarkibida jami 2677 nafar aholi o‘zaro ahil-inoq yashab kelmoqda. Hududda 2 ta umumta’lim maktabi, 1 ta maktabgacha ta’lim muassasasi, 3 ta oziq-ovqat do‘koni, 1 ta sartaroshxona, 1 ta ichimlik suvini tozalash va yetkazib berish shoxobchasi faoliyat yuritib, aholiga doimiy xizmat ko‘rsatmoqda.
Aholini ish bilan ta’minlash, tomorqa yerlaridan samarali foydalanish, kichik biznes va xususiy tadbirkorlikni rivojlantirish orqali aholi daromadlarini oshirish masalalari ustuvor vazifa sifatida belgilangan.
Olib borilgan tizimli va manzilli ishlar natijasida joriy yilning 12 oyi davomida ovulda yashovchi 26 nafar ishsiz fuqaroga jami 470 million so‘m miqdorida imtiyozli kreditlar ajratildi. Natijada 86 nafar fuqaro o‘zini o‘zi band qilgan, 91 nafar fuqaro doimiy ish o‘rniga ega bo‘lgan.
Migratsiyadan qaytib kelgan 4 nafar fuqaroning 2 nafariga kredit ajratilib, ularning mehnat faoliyati yo‘lga qo‘yildi. Shuningdek, yil boshidan buyon 8 ta yangi tadbirkorlik subyekti faoliyati yo‘lga qo‘yilib, hudud iqtisodiy salohiyati yanada mustahkamlandi.
Do‘rman ovulida yaratilayotgan imkoniyatlardan unumli foydalanib, barqaror daromad olayotgan aholi vakillari safi tobora kengaymoqda. Jumladan, hududda yashovchi Islom Qurbanov ko‘p yillardan buyon chorvachilik bilan shug‘ullanib keladi. Bugungi kunda 22 bosh qoramol boqib, qishloq xo‘jaligi tarmoqlaridan barqaror daromad topmoqda. Uning kelgusidagi rejalari ham katta – faoliyatini kengaytirib, yirik chorvachilik xo‘jaligi tashkil etish va yangi ish o‘rinlari yaratish ustuvor maqsadlaridan sanaladi.
Shuningdek, Xaytboy Jumaniyozov 10 yildan buyon asalarichilik bilan shug‘ullanib, bugungi kunda 100 ta asalari qutisiga ega. Oilaviy mehnat asosida olib borilayotgan bu faoliyat natijasida oila farovonligi tobora oshib bormoqda.
Ovulda yoshlarni har tomonlama qo‘llab-quvvatlash borasidagi ishlar ham izchil davom etmoqda. 2025 yilning 9 oyi davomida 8 nafar yosh “Yoshlar daftari”ga kiritilib, ularga manzilli yordamlar ko‘rsatildi. Jumladan, 3 nafar yoshning to‘lov-kontrakt summasi to‘lab berildi, 2 nafar yoshga imtiyozli kredit ajratildi, 2 nafar yosh kelajak kasblariga o‘qitildi, 1 nafar yoshga subsidiya asosida chorva mollari uchun tarozi olib berildi.
Xotin-qizlar bandligini ta’minlash borasida ham e’tiborga molik ishlar amalga oshirilmoqda. Hududda yashovchi Muqaddas Ahmedova 5 yildan buyon tikuvchilik bilan shug‘ullanib, 10 nafardan ortiq shogird tayyorladi. U o‘z mehnati bilan nafaqat oilasining farovonligini ta’minlamoqda, balki ko‘plab xotin-qizlarning band bo‘lishiga munosib hissa qo‘shib kelmoqda.
Hududda oilaviy tadbirkorlik ham rivojlanib bormoqda. “Xiva choyxonasi” oilaviy korxonasida non va non mahsulotlari hamda milliy taomlar tayyorlanib, bozorga chiqarilmoqda. Ushbu faoliyat orqali oilaning barcha a’zolari ish bilan band bo‘lib, barqaror daromad manbaiga ega.
Bugun Do‘rman ovuli – mehnat, tashabbus va hamjihatlik uyg‘unlashgan, aholisi ertangi kunga ishonch bilan qarayotgan hududdir. Amalga oshirilayotgan islohotlar, yaratilayotgan imkoniyatlar va aholi faolligi tufayli ovul ijtimoiy-iqtisodiy jihatdan yanada ravnaq topib, farovon hayot sari dadil odimlamoqda.
Charos Arslonova, tuman hokimligining Axborot xizmati rahbari.