Qoraqalpog'iston Respublikasi Amudaryo tumani hokimligi

Amudaryo tumani hokimi Sobir Xo‘jametovning fuqarolar murojaatlari yuzasidan navbatdagi sayyor qabuli Oq oltin ovulida tashkil etildi. Sayyor qabul ovuldagi 7-sonli umumta’lim maktabi binosida bo‘lib o‘tdi.

Mazkur uchrashuvda O‘zbekiston Mahallalar uyushmasi Amudaryo tuman bo‘limi boshlig‘i Alisher Yo‘ldashev, tegishli tashkilot va idoralar rahbarlari, mutasaddi mas’ullar hamda ovul aholisining keng jamoatchilik vakillari ishtirok etdi.

Sayyor qabul davomida fuqarolar tomonidan hududni ijtimoiy-iqtisodiy rivojlantirishga oid qator dolzarb masalalar ko‘tarildi. Jumladan, ichki ko‘priklarni ta’mirlash, ichki yo‘llarning holatini yaxshilash, ovul hududida yangi maktabgacha ta’lim muassasasi (bog‘cha) qurishga ehtiyoj, ko‘mir mahsulotlariga talabning yuqoriligi, shuningdek, aholini ish bilan ta’minlash masalalari yuzasidan murojaatlar bildirildi.

Tuman hokimi tomonidan har bir murojaat alohida tinglanib, ularni ijobiy hal etish yuzasidan mas’ullarga aniq topshiriqlar berildi. Ayrim masalalar joyida hal etilgan bo‘lsa, qo‘shimcha o‘rganishni talab qiladigan murojaatlar bo‘yicha belgilangan tartibda chora-tadbirlar ishlab chiqilishi ta’kidlandi.