Qishloq xo‘jaligi sug‘urtasi sohasida Turkiya bilan hamkorlik amaliy jihatdan davom ettirilmoqda!
2026-09-08 12:00:00 / Yangiliklar
O‘zbekiston va Turkiya o‘rtasida qishloq xo‘jaligi sug‘urtasi sohasidagi hamkorlikni yanada rivojlantirish, xususan, mustaqil ekspertlarni tayyorlash va ularning malakasini oshirish bo‘yicha belgilangan kelishuvlar ijrosi doirasida navbatdagi o‘quv mashg‘uloti o‘tkazilmoqda.
Mazkur o‘quv jarayoni Zoom platformasi orqali tashkil etilib, unda Turkiya Respublikasi Qishloq va o‘rmon xo‘jaligi vazirligi huzuridagi sug‘urta yo‘nalishi vakili, TARSİM mustaqil ekspertlar koordinatori Sayfettin Gün, Qishloq xo‘jaligi sug‘urta jamg‘armasi Sug‘urta vositachilari va mustaqil ekspertlar bilan ishlash bo‘limi boshlig‘i Alisher To‘lqinov, shuningdek, 4-bosqich o‘quv kursida tahsil olayotgan mustaqil ekspertlikka nomzodlar ishtirok etmoqda.
O‘quv mashg‘ulotlari davomida Turkiya tajribasi asosida qishloq xo‘jaligi sug‘urtasida mustaqil ekspertlarning faoliyati, sug‘urta hodisalarini baholash, zararni aniqlash hamda ekspertlik ko‘nikmalarini rivojlantirishga alohida e’tibor qaratilmoqda.
Mazkur amaliy hamkorlik Turkiyaga yaqinda amalga oshirilgan ishchi tashrif davomida erishilgan kelishuvlar va “Yo‘l xaritasi”da belgilangan vazifalarni izchil amalga oshirishning muhim yo‘nalishlaridan biridir.
O‘zaro tajriba almashish va zamonaviy yondashuvlarni joriy etish orqali O‘zbekistonda qishloq xo‘jaligi sug‘urtasi tizimini yanada takomillashtirish, malakali mustaqil ekspertlar institutini rivojlantirish bo‘yicha ishlar davom ettirilmoqda.