Afg‘onistonga mobil laboratoriya torshirildi
2025-03-15 18:40:00 / Yangiliklar
Bugun iqtisodiyotning boshqa tarmoqlari qatori aynan qishloq xo‘jaligi bo‘yicha ham qo‘shni davlatlar bilan hamkorlikda tomonlar uchun birdek manfaatli bo‘lgan istiqbolli loyihalar amalga oshirilmoqda.
Jumladan, O‘zbekiston Qishloq xo‘jaligi vazirligining Afg‘oniston qishloq xo‘jaligi, irrigatsiya va chorvachilik vazirligi bilan ham qishloq xo‘jaligi ekinlari urug‘chiligi, don va dukkakli ekinlarni yetishtirish, tuproqshunoslik, chorvachilik yo‘nalishlarida hamkorligi tomonlarning o‘zaro manfaatlari uchun xizmat qilmoqda.
O‘zbekiston va Afg‘oniston hukumati rahbarlari kelishuviga asosan tuproq tahlillarini olib borishga ixtisoslashgan va barcha zaruriy uskunalar bilan jihozlangan mobil laboratoriya bugun Hayraton postida Afg‘oniston tomoniga taqdim etildi.
Tomonlarning kelishuviga ko‘ra, mobil laboratoriya Kobulga yetkazilgandan so‘ng mamlakatimizning tuproqshunos olimlari tomonidan afg‘onistonlik tuproqshunos izlanuvchilar uchun 3 kunlik seminar-treninglar o‘tkaziladi.