Qishloq xo‘jaligi ekinlarini sovuqdan asrash bo‘yicha tavsiyalar
2024-12-17 14:00:00 / Yangiliklar
Sovuqning qishloq xo‘jaligi ekinlariga salbiy ta’sirini kamaytirish maqsadida Qishloq xo‘jaligi vazirligi va uning tizimidagi ilmiy tadqiqot institutlari olimlari tomonidan to‘qsonbosti usulidagi piyoz va boshqa ekinlarni sovuqdan himoya qilish bo‘yicha tavsiyalar ishlab chiqilib, dehqon va fermerlarga yetkazildi.
Shuningdek, tajribali dehqon va fermerlar ko‘p yillik amaliyotlariga asoslangan holda ekinlarni sovuqdan saqlash bo‘yicha zarur choralarni ko‘rmoqda. Bu jarayonda ekinlarning sovuqqa chidamliligiga qarab ularni to‘g‘ri parvarishlash katta ahamiyatga ega.
Sabzavot ekinlarini sovuqbardoshligiga ko‘ra quyidagi guruhlarga ajratish mumkin:
Sovuqbardosh va qishga chidamli ekinlar: piyoz, sarimsoqpiyoz, shovul, rovoch, yerqalampir kabi ekinlar. Ular -10°C dan -15°C gacha, qor ostida esa -20°C dan -25°C gacha bo‘lgan sovuqqa bardosh berishi mumkin;
Qisqa muddatli sovuqdan himoya talab etmaydigan ekinlar: sovuqqa chidamli boshqa sabzavotlar, ular tabiiy sharoitda qattiq sovuqqa ham bardosh bera oladi.
Qisqa muddatli sovuqdan keyingi agrotexnik chora-tadbirlar.
Sovuq kunlar o‘tib, ekinlarni “stress” va “shok” holatidan chiqarish uchun quyidagi chora-tadbirlar amalga oshirilishi lozim:
Qo‘shimcha oziqlantirish
Ekinlarni mikroelementlar va aminokislotalarga boy preparatlar bilan oziqlantirish zarur. Viusid, Biotrac kabi bor elementi mavjud ozuqalarni bargdan oziqlantirish uchun ishlatish yaxshi natija beradi.
Azotli o‘g‘itlardan foydalanish
Ekinlarning o‘sish jarayonini tezlashtirish maqsadida tez ta’sir etuvchi sulfat ammoniya kabi azotli mineral o‘g‘itlardan foydalanish tavsiya etiladi.
Issiqlikni saqlash choralari
Havo harorati past bo‘lsa, ekinlarni egat ustiga shaffof plyonka bilan yopish orqali himoya qilish mumkin.
Sug‘orish va tuproq namligini saqlash
Tuproqdagi namlikni saqlash va sovuq ta’sirini kamaytirish uchun sug‘orishni muntazam amalga oshirish kerak.
Barcha agrotexnik tadbirlar intensiv usulda va qisqa muddat ichida bajarilishi lozim. Bu kabi amaliyotlar nafaqat ekinlarni sovuqdan himoya qilishga yordam beradi, balki hosildorlikni saqlab qolishda ham muhim o‘rin tutadi.