Toshkentda PEMPAL Ichki audit hamjamiyatining yalpi majlisi o‘z ishini boshladi

Yalpi majlis “Davlat ichki moliyaviy nazoratining davlat sektoridagi islohotlar bilan o‘zaro bog‘liqligi va ularni muvofiqlashtirish” mavzusiga bag‘ishlangan bo‘lib, unda xalqaro standartlar va ilg‘or tajribalar, xalqaro tashkilotlarning tavsiyalari hamda mamlakatimizda ichki audit sohasida amalga oshirilayotgan islohotlar bilan ishtirokchilarni tanishtirish nazarda tutilgan.

Mazkur yalpi majlisda Jahon banki, Yevropa Ittifoqi, Iqtisodiy hamkorlik va taraqqiyot tashkiloti, Xalqaro ichki auditorlar instituti hamda hamjamiyatga a’zo 25 dan ortiq mamlakatdan 60 ga yaqin xalqaro ekspertlar va amaliyotchilar ishtirok etmoqda.

Tadbirni O‘zbekiston Respublikasi Iqtisodiyot va moliya vaziri o‘rinbosari Axadbek Xaydarov kirish so‘zi bilan ochdi. U  o‘z nutqida mamlakatimizda davlat ichki audit tizimi islohoti doirasida olib borilayotgan ishlarga to‘xtalib, yalpi majlisning O‘zbekistonda o‘tkazilishi yurtimizda olib borilayotgan islohotlar natijadorligini yanada oshirishga xizmat qilishini ta’kidladi.

Shu bilan birga, yalpi majlisning ochilish marosimida Jahon bankining O‘zbekistondagi vakolatxonasi boshlig‘i janob Marko Mantovanelli hamda Ichki audit hamjamiyatining ijro qo‘mitasi raisi Tatyana Traykovska so‘zga chiqib, Yevropa mintaqasi va Markaziy Osiyo mamlakatlarida davlat moliyasini boshqarish bo‘yicha halqaro hamkorlik ta’lim dasturi (PEMPAL), shuningdek, Ichki audit hamjamiyati doirasida amalga oshirilayotgan ishlar va erishilgan yutuqlarga to‘xtalib o‘tishdi.

Tadbirning birinchi kunida davlat ichki auditi va davlat boshqaruvi hamda davlat moliyasini boshqarish sohasidagi islohotlarning o‘zaro ta’siri va muvofiqlashtirish bo‘yicha taqdimot, bu borada xorijiy mamlakatlar tajribasi tahlili hamda guruhlar muhokamasi o‘tkazildi. Shuningdek, Jahon miqyosida hamda PEMPAL Ichki audit hamjamiyatiga a’zo mamlakatlarda ichki audit va ichki nazorat sohasida so‘nggi yangiliklar taqdimoti bo‘lib o‘tdi.

Ta’kidlash joizki, ushbu tadbirning O‘zbekistonda o‘tkazilishi mamlakatimizda davlat moliyaviy nazorati sohasida amalga oshirilayotgan islohotlar natijalarini muhokama qilish orqali kelgusidagi dolzarb vazifalarni belgilab olish hamda xalqaro tashkilotlar, xorijiy davlatlarning ekspertlari hamda amaliyotchilari bilan o‘zaro fikr va tajriba almashishga xizmat qiladi.

Ma’lumot uchun, PEMPAL ta’lim dasturi 2006-yilda Jahon banki tomonidan tashkil etilgan bo‘lib, Markaziy Osiyo va Yevropa mintaqasidagi 23 ta mamlakatning Davlat moliyasini boshqarish tizimini takomillashtirish, qiyosiy tahlil qilish va ta’lim seminarlari o‘tkazish orqali mahalliy mutaxassislarning bilim-ko‘nikmalarini oshirishga imkon yaratadi.