Quvayt Davlati delegatsiyasi vakillari bilan uchrashuv bo‘lib o‘tdi

Uchrashuvda Quvayt delegatsiyasi tarkibida mazkur davlatning Toshkentdagi elchixonasi vakili Xolid al-Mutayrat, shuningdek, Quvayt Moliya vazirligi, Tashqi ishlar vazirligi, Savdo-sanoat palatasi, Quvayt investitsiya boshqarmasi hamda Quvayt arab iqtisodiy taraqqiyot jamg‘armasi vakillari ishtirok etdilar.

O‘zbekiston tomonidan muhokamada Iqtisodiyot va moliya vaziri o‘rinbosari Jasur Karshibayev, Oʻzbekistonning Quvayt Davlatidagi Favqulodda va Muxtor Elchisi Ayubxon Yunusov, “UzAssets” kompaniyasi boshqaruvi raisi Bobur Abdinazarov, Davlat aktivlarini boshqarish agentligi direktori Akmalxon Ortiqov va boshqa mas’ullar ishtirok etdi.

Uchrashuvda ikki mamlakat o‘rtasida infratuzilma loyihalarini amalga oshirish va iqtisodiy hamkorlikni kengaytirish bo‘yicha birgalikdagi sa’y-harakatlar muhokama qilindi. Tomonlar iqtisodiy o‘sish va barqaror rivojlanishni rag‘batlantirish maqsadida asosiy tarmoqlarda, jumladan, “yashil” energetika sohasida sheriklikni chuqurlashtirish va “yashil” iqtisodiyot sohasidagi startap loyihalarni rivojlantirishdan manfaatdor ekanligini bildirdi.

Davlat-xususiy sheriklikni yanada rivojlantirish imkoniyatlari hamda yoshlar tadbirkorligini qo‘llab-quvvatlashga qaratilgan islohotlarga alohida e’tibor qaratildi. Bundan tashqari, ikki tomonlama munosabatlarni mustahkamlash va qo‘shma tashabbuslarni amalga oshirish uchun muloqot va hamkorlikni davom ettirish muhimligi ta’kidlandi.

Uchrashuv yakunida tomonlar muhokama qilingan loyihalar va tashabbuslarni amalga oshirish uchun aniq qadamlarni ishlab chiqish bo‘yicha ishlarni davom ettirishga kelishib oldi.