O‘mon investitsiya agentligi vakillari bilan mamlakatimizdagi iqtisodiy tendensiyalar yuzasidan fikr almashildi
2024-09-24 09:50:00 / Yangiliklar
Uchrashuvda O‘mon Sultonligining O‘zbekistondagi Favqulodda va Muxtor elchisi Vafo Jabra Nassera Al-Busaidi, O‘zbekiston-O‘mon investitsiya kompaniyasining bosh ijrochi direktori Omar Baxram hamda Iqtisodiyot va moliya vaziri o‘rinbosari Jasur Karshibayev, Davlat aktivlarini boshqarish agentligi direktori Akmalxon Ortiqov va boshqa mas’ul vakillar ishtirok etdi.
Muloqot davomida tomonlar O‘mon investitsiya agentligi bilan hamkorlikda olib borilayotgan loyihalar, xususan, xususiy kompaniyalarni qo‘llab-quvvatlash va sarmoyalar jalb qilish, bank-moliya sohasidagi o‘zaro aloqalar, yangi ish o‘rinlarini yaratish hamda logistika sohasini takomillashtirish masalalarini muhokama qildi.
Shuningdek, muhokamada mamlakatimizdagi joriy iqtisodiy jarayonlar, xususan, makroiqtisodiy barqarorlik, inflatsiya darajasining barqarorligini ta’minlash, davom etayotgan iqtisodiy islohotlar, jumladan, davlat ishtirokidagi korxonalar va banklar transformatsiyasi va xususiylashtirish jarayonlari, energetika sohasida bozor munosabatlarini joriy etish va erkin raqobat muhitini yaratish, qishloq xo‘jaligiga mo‘ljallanmagan yer uchastkalaridan foydalanishdagi o‘zgarishlar yuzasidan fikr almashdilar.
Shu bilan birga, davlat-xususiy sheriklik dasturi asosida amalga oshirilayotgan loyihalar, xususan, energetika sohasi, maktablar qurish, ichimlik suvini yetkazib berish va nasos stansiyalarini takomillashtirish yo‘nalishlarida DXSh loyihalarini kengaytirish haqida so‘z yuritildi hamda bu borada O‘zbekiston Respublikasi Prezidentining “O‘zbekiston Respublikasida 2024-2030-yillarda davlat-xususiy sheriklikni rivojlantirish chora-tadbirlari to’g’risida”gi Qarori sohani yanada rivojlantirishdagi muhim qadam bo‘lganligi ta’kidlandi.
Muzokaralar yakunida tomonlar o‘zaro manfaatli hamkorlik aloqalarini yanada rivojlantirish va yangi bosqichga olib chiqishga kelishib oldi.