Yaponiya delegatsiyasi vakillari bilan uchrashuv bo‘lib o‘tdi

Uchrashuvda “Sojitz Corporation” kompaniyasi raisi Masayoshi Fujimoto, “Ronesans Healthcare” kompaniyasi boshqaruv raisi Kamil Yanikomeroglu, “Ronesans Avrasya” boshqaruv raisi Cem Ozoguz, “GVE” kompaniyasi asoschisi va bosh ijrochi direktori Fusa Kodji hamda Iqtisodiyot va moliya vaziri o‘rinbosarlari Jasur Karshibayev, Otabek Fozilkarimov, Xurshed Mustafayev va boshqa mas’ul vakillar ishtirok etdilar.

Ma’lumot uchun: JBIC (Japan Bank for International Cooperation) 1999-yilda tashkil etilgan bo‘lib, Yaponiya eksportini jadallashtirish va xalqaro faoliyatni rivojlantirishga faol hissa qo‘shmoqda. JBIC umumiy aktivlari 150 mlrd. AQSh dollarini tashkil etadi (2023-yil). Bugungi kunga qadar JBIC bilan hamkorlikda O‘zbekistonda 2,6 milliard AQSh dollari miqdoridagi 11 ta loyiha amalga oshirilgan.

“Sojitz Corporation” Yaponiyaning eng yirik universal savdo kompaniyalaridan biri hisoblanadi. Dunyo bo‘ylab keng ko‘lamli biznes bilan shug‘ullanadi, xususan, xalqaro savdo, investitsiya faoliyati, ichki bozorda mahsulot ishlab chiqarish va sotish, xizmatlar ko‘rsatish, Yaponiya va chet davlatlarda loyihalarni rejalashtirish va muvofiqlashtirish faoliyatini olib boradi.

Suhbat davomida tomonlar mamlakatimizda amalga oshirilayotgan keng ko‘lamli iqtisodiy islohotlar, barqaror iqtisodiy o‘sish, yashil iqtisodiyotni rivojlantirish hamda barcha sohalarda yashil o‘sishni ta’minlash yuzasidan o‘zaro fikr almashdilar.

Muloqotda energetika sohasini yanada rivojlantirish, sog‘liqni saqlash va energetika yo‘nalishlarida davlat-xususiy sheriklik loyihalarini shakllantirish va ularni hayotga tadbiq etish, qayta tiklanuvchi energiya manbalaridan foydalanish va energiya samaradorlikni oshirish, zamonaviy avtomobil va temir yo‘llarni qurish hamda ushbu sohalarda xalqaro tajribalarni joriy etish masalalari muhokama qilindi.

Muzokaralar so‘ngida tomonlar o‘zaro manfaatli hamkorlik aloqalari rivojlantirish va kengaytirishga kelishib oldilar.