Eng ilgʻor ofitserlar saralandi
2024-09-16 09:40:00 / Yangiliklar
Mazkur bellashuv oʻz nomi bilan eng mohir, yuqori kasbiy tayyorgarlikka ega, salohiyatli, bir soʻz bilan aytganda, professional ofitserlarni saralash imkonini berishi bilan ham ahamiyatli hisoblanadi.
Mudofaa vazirligi tizimida har yili anʼanaviy tarzda oʻtkazib kelinayotgan ushbu bellashuvda Havo hujumidan mudofa qoʻshinlari va Harbiy havo kuchlari qoʻmondonligi harbiy xizmatchilariga ham kasbiy va intellektual salohatlarini amalda namoyon etish imkonini berdi. Oʻndan ortiq shartlar asosida ishtirokchilarning bilim va mahoratlari sinovdan oʻtdi.
Vatan himoyachilari oʻrtasida sogʻlom raqobat muhitini shakllantirish maqsadida oʻtkaziladigan mazkur bellashuv qoidasiga koʻra, ishtirokchilarning jangovar tayyorgarlik va komandirlik dasturlarini samarali oʻzlashtirishi, shaxsiy kasbiy mahoratlarini muntazam yuksaltirib borishi, ularda liderlik qobiliyatini shakllantirish kabi jihatlarga eʼtibor qaratiladi. Oʻtkazilgan bunday koʻrik-tanlovlar oʻzaro tajriba almashishga, yuqori kasbiy tayyorgarlikka ega, mahoratli ofitserlarni aniqlash, malakali kadrlar rezervini shakllantirish va lavozimlarga tayinlash, milliy armiyamizning kuch-qudratini yanada yuksaltirish imkonini beradi.
Qoʻmondonlik bosqichida yuqori natijaga erishgan ofitserlar koʻrik-tanlovning vazirlik bosqichida ishtirok etadi.
Mudofaa vazirligi Axborot va ommaviy kommunikatsiyalar departamenti