Mudofaa vazirligi sport markazi murabbiyi Akmal Hasanov “Chingiz Aytmatov” medali bilan taqdirlandi
2024-08-22 17:55:00 / Yangiliklar
Bugun, 22-avgust kuni “Intercontinental Tashkent” mehmonxonasi anjumanlar zalida bo‘lib o‘tgan xalqaro konferensiya doirasida tashkil etilgan taqdirlash marosimida Qirg‘iz Respublikasi delegatsiyasi, tegishli vazirlik va idoralar, yurtimizda faoliyat yuritayotgan turli konfessiya va milliy madaniy markazlar vakillari, olimlar va yoshlar ishtirok etdi.
“Chingiz Aytmatov nomidagi Issiqko‘l forumi” xalqaro jamoat birlashmasi bosh kotibi Assol Moldokmatova medalni topshirar ekan, Akmal Hasanovga insoniyligi hamda birodarlik munosabati uchun yana bir bor rahmat aytdi. Tadbirda so‘z olganlar ham, xalqlarimiz birdamligining yuksak namunasi bo‘lgan murabbiyimizning harakatlarini munosib baholab, Qirg‘iz Respublikasi hukumati, qolaversa, qirg‘izistonlik muxlislar nomidan minnatdorchilik bildirdi.
Ma’lumot uchun, joriy yilda bo‘lib o‘tgan Olimpiya o‘yinlarida 4-avgustga o‘tar kechasi qirg‘izistonlik bokschi Munarbek Seyitbek o‘g‘li amerikalik Harvey Jahmalga qarshi chorak final jangini o‘tkazib, yarim finalga chiqqandi. Jang davomida unga O‘zbekiston delegatsiyasidan borgan murabbiy Akmal Hasanov sekundantlik qilgan. O‘z o‘rnida, oʻzbek murabbiyining bu koʻmagi ijtimoiy tarmoq foydalanuvchilari tomonidan “Markaziy Osiyo birodarligi” deya e’tirof etilgandi.
Mudofaa vazirligi Axborot va ommmaviy kommunikatsiyualar departamenti