Oʻzbekiston Respublikasi Kriminologiya tadqiqot instituti Vengriya Milliy kriminologiya instituti bilan yangi hamkorlik bitimini imzoladi
2024-09-19 17:15:00 / Yangiliklar
Joriy yilning 17-sentyabr kuni Vengriyaning Budapesht shahrida Oʻzbekiston Respublikasi Kriminologiya tadqiqot instituti boshligʻi Berdialiyev Baxtiyor Erkinovich boshchiligidagi delegatsiya Vengriya Milliy kriminologiya instituti direktori professor Tunde Andrea Barabash yetakchiligidagi institut xodim va olimlari bilan uchrashuvi boʻlib oʻtdi. Uchrashuvda ikkala tomon oʻzlarining kriminologiya sohasida amalga oshirilayotgan loyihalari va ilmiy izlanishlari haqida maʼlumotlar berdi.
Shuningdek, tadbir davomida ilmiy hamkorlikni yoʻlga qoʻyish, rivojlantirish boʻyicha ikkala tomon uchun manfaatli boʻlgan qator kelishuvlarga erishildi.
Tashrif davomida Oʻzbekiston Respublikasi Kriminologiya tadqiqot instituti mutasaddilari Vengriyadagi Gaspar universitetining Jinoiy fanlar instituti hamda, Qirol Lyudovik Davlat xizmati universitetlarida boʻlib, kriminologiya sohasida amalga oshirilayotgan loyihalar va ilmiy izlanishlar tanishib yurtimizda mazkur yoʻnalishni rivojlantirish boʻyicha olib borilayotgan loyihalar haqida maʼlumot berildi. Shuningdek, ikki tomonlama uchrashuvlar davomida giyohvand moddalar bilan bogʻliq jinoyatlar va mahkumlar bilan ishlashni ilmiy tadqiq qilish hamda Oʻzbekiston tomonidan ilmiy xodimlarni stajirovkaga joʻnatish boʻyicha kelishib olindi.
Bundan tashqari tashrif davomida yurtimiz vakillari Vengriyadagi Oʻzbekiston Respublikasi elchixonasi tomonidan xorijda taʼlim olayotgan yoshlar bilan uchrashib, “Yoshlar oʻrtasidagi jinoyatchilikni oldini olish va diniy ekstremizm illatlari” mavzusida seminar tashkil etishdi.
Doʻstona va konstruktiv ruhda oʻtgan qator uchrashuvlar yakunida tadqiqot institutlari oʻrtasida birgalikda ilmiy izlanishlar va loyihalarni amalga oshirish hamda tajribalar almashish masalalarini koʻzda tutuvchi oʻzaro teng manfaatli hamkorlik memorandumi imzolandi.