Fargʻona viloyati IIB boshligʻi, general-mayor Azizbek Ikramov tomonidan oʻtkazilgan yigʻilishda 3-sektor faoliyati tahlil qilindi
2024-09-17 17:15:00 / Yangiliklar
Joriy yilning 11-sentyabr kuni Prezidentimiz Shavkat Mirziyoyev tomonidan oʻtkazilgan videoselektor yigʻilishida kambagʻal oilalarni bunday holatga tushib qolish sabablarini aniqlash va ularning daromadini oshirib, kambagʻallikdan chiqarish boʻyicha ustuvor vazifalar belgilab berilgan edi.
Ushbu yigʻilishda belgilangan vazifalar ijrosidan kelib chiqib, viloyat IIB boshligʻi, general mayor Azizbek Ikramov tomonidan 3-sektor faoliyati tahliliga bagʻishlangan yigʻilish oʻtkazildi.
Yigʻilishda qayd etilganidek, viloyat 3-sektorlarida 279 ta mahalla mavjud boʻlib, 1 million 65 ming nafardan ortiq fuqarolar istiqomat qiladi.
Davlatimiz rahbarining 2019-yil 8-yanvardagi “Hududlarni kompleks ijtimoiy-iqtisodiy rivojlantirish boʻyicha sektorlar faoliyatini yanada takomillashtirishga doir qoʻshimcha chora-tadbirlar toʻgʻrisida”gi qaroriga koʻra viloyatdagi barcha 3 sektorlarda ishchi guruhlari tuzilgan edi.
Tahlillar shuni koʻrsatmoqdaki, soʻnggi vaqtlarda sektor shtabi ishchi guruhlarining faoliyati ancha susaytirib yuborilgan. Faqatgina Rishton, Oltiariq va Buvayda tumanlarida sezilarli ijobiy ishlar koʻzga tashlandi xolos.
Yigʻilishda endilikda, sektorga biriktirilgan ishchi guruhlari bilan yangicha yondashuv asosida ish tashkil etilishi maʼlum qilindi.
Bundan tashqari, “Sayxunobod”, “Zarbdor”, “Uychi” va “Gʻijduvon” tajribalarini keng joriy etish borasidagi ishlar ahvoli ham muhokama qilindi. 3-sektor hududidagi kambagʻal oilalar bilan ishlashda asosiy eʼtibor qaratilishi zarur boʻlgan masalalar xususida soʻz yuritildi.
Joylarda quyosh panellarini oʻrnatish borasida olib borilayotgan ishlar va murojaatlar bilan ishlash holati ham chuqur tahlil qilinib, mutasaddi rahbar va xodimlar oldiga aniq vazifalar belgilab berildi.
Fargʻona viloyati IIB Axborot xizmati