Yuksak mukofot sohiblari. El duosin olgan kapitan
2024-09-16 10:50:00 / Yangiliklar
Profilaktika katta inspektori Gʻolib Karimov yarim kechasi jiringlagan telefonni koʻtarishi bilan ayolning yigʻi aralash ovozi eshitildi: “Sobir akangiz yana ichib kelibdi, janjal qilyapti”. Kapitan zudlik bilan nizo yuz bergan xonadonga yetib bordi. Yaxshiki, hech kimga aziyat yetmabdi. Shunday boʻlsa-da, turmush oʻrtogʻi, bolalari hamda qoʻshnilarni bezovta qilayotgan erkakni avtouloviga chiqarib, hushyorxonaga yetkazdi.
Kapitan xizmat uyi tomon yoʻl olarkan, bir necha kishining tashvishini aritganidan mamnun edi. Ammo Sobir akaning oʻnglanmayotgani, ichmaslikka vaʼda berib, soʻzida turmaganligi dilini xira qildi. Ertaga mahalla fuqarolar yigʻinida oʻtadigan yigʻilishda shu masalani koʻtaradi, balki majburiy davolatish choralarini koʻrar…
Profilaktika katta inspektori, kapitan Gʻolib Karimov shu tarzda Sharof Rashidov tumanining “Ravalligʻ” mahallasida istiqomat qiluvchi 6 nafar oilaviy janjalkash, 12 ta nizoli oila vakillari, 11 nafar ichkilikka ruju qoʻygan shaxs bilan profilaktik tadbirlarni amalga oshiradi. Xuddi shunday, qonunbuzarliklarning oldini olish maqsadida muqaddam sudlangan, probatsiya, ichki ishlar organlarida profilaktik hisobda turgan va maʼmuriy nazorat ostiga olingan shaxslar bilan tez-tez muloqot qilib turadi.
Shu oʻrinda taʼkidlash kerak, halol, bosiq, doimo qonuniy yoʻl tutadigan kapitanni mahalla ahli hurmat qiladi, qoʻllab-quvvatlaydi. Ayniqsa, fuqarolar yigʻini raisi, ichki ishlar organlari faxriysi Ubaydulla Xidirov bilan hamkorlik oʻz samarasini bermasdan qolmadi. Chunonchi, mahallada joriy yilning oʻtgan davrida birorta ham jinoyat qayd etilmadi.
Oʻrni kelganda aytish joiz, Samarqand viloyati Urgut tumani “Quyi tegana” mahallasida tugʻilib oʻsgan Gʻolib Karimov Jizzax politexnika institutini tamomlagan. Harbiy xizmatdan qaytgach, 2007-yili IIV Akademiyasi Serjantlar tarkibini tayyorlash oliy kurslarida taʼlim oldi va shu yili Jizzax viloyati IIB YHXB alohida YPX otryadi uchinchi safarbarlik guruhi YPX katta inspektori lavozimiga tayinlandi. 2013-2017-yillarda viloyat IIB tizimida, 2017-yildan beri profilaktika inspektori lavozimida el osoyishtaligini asrayapti.
Vazirlikning oliy oʻquv yurtiga kirishga imtiyoz beruvchi tavsiyanomasi asosida oʻgʻli Javohir Tolibov hozirda Toshkent davlat iqtisodiyot universitetining 3-bosqichida taʼlim olmoqda.
Bu yil istiqlol bayrami arafasida Gʻolib Karimovning hayotida yana bir quvonchli voqea roʻy berdi. U davlatimiz rahbarining farmoniga binoan, “Shuhrat” medali bilan taqdirlandi.
Kamtarona xizmatlarim yuksak darajada eʼtirof etilgani uchun Yurtboshimizdan, vazirlik rahbariyatidan minnatdorman, deydi qahramonimiz. Bu eʼtirofdan qoʻshimcha kuch va gʻayrat olib, jinoyatchilik va huquqbuzarliklarni jilovlashda yanada samarali xizmat qilishga harakat qilaman.
Alijon Abdusattorov, oʻz muxbirimiz. “Postda”
Jizzax viloyati