Yuksak mukofot sohiblari. Halol xizmat qilib
2024-09-13 12:45:00 / Yangiliklar
Davlatobod tumani IIB JXX Jamoat tartibini saqlash boʻlinmasi patrul-post xizmati otryadi boʻlinma komandiri, safdor Saydulloxon Eshonxonov mustaqilligimizning 33 yilligi arafasida Prezident farmoniga koʻra, “Sodiq xizmatlari uchun” medali bilan taqdirlandi.
Chin dildan qilingan xizmat besamar ketmasligini, ayniqsa, mehnatlar rohatga aylanishini shu onlarda yana bir bor his qildim, deydi qahramonimiz. Zero, bunday eʼtibor va ragʻbat odamga kuch beradi. Hayotda armonsiz yashab boʻlmas ekan-da, mening shu kunlarga yetishishimga sababchi boʻlgan rahmatli otam va onam bu mukofotni oʻzgacha qarshi olgan boʻlardilar.
Saydulloxon 1977-yilda Yangiqoʻrgʻon tumanining Iskovot qishlogʻida tavallud topgan. 2005-yilda ichki ishlar organlari safiga qabul qilingan. Sportga oshno boʻlgan S. Eshonxonov qoʻl jangi bilan muntazam shugʻullandi. Bir necha bor viloyat IIB xodimlari oʻrtasida oʻtkazilgan musobaqalarda ishtirok etib, faxrli oʻrinlarni qoʻlga kiritdi.
Joriy yilda oʻtkazilgan profilaktik tadbirlar davomida 168 nafar huquqbuzarlik sodir etgan shaxsni aniqlab, tegishli choralar koʻrilishini taʼminlagan S. Eshonxonov 468 nafar fuqaro bilan profilaktik suhbatlar olib bordi. Shuningdek, 2 ta oʻgʻrilik jinoyatini fosh etgan, 1 nafar bedarak yoʻqolgan shaxsning yashash manziliga qaytarilishiga erishgan. Mart oyida muqaddam sodir etgan jinoyati uchun qidiruvda boʻlgan fuqaroning yashiringan joyini aniqlab, qoʻlga olishga erishgan.
Yurtimiz va fuqarolarimiz tinchlik-osoyishtaligi yoʻlidagi kamtarona xizmatlarim munosib eʼtirof etilganidan behad mamnunman, deydi lavhamiz qahramoni.
Buning uchun Prezidentimiz hamda vazirlik rahbariyatiga minnatdorlik bildiraman.
Darhaqiqat, kasbini eʼzozlagan kam boʻlmaydi. Orzuga erishmoq uchun chin dildan qilingan tilak va halol xizmat muhim ekanini Saydulloxon singari fidoyi xodimlar timsolida koʻrish mumkin.
Gulchehra Buvamirzayeva, oʻz muxbirimiz. “Postda”
Namangan viloyati