O‘zbekiston Respublikasi Prezidentining «O‘zbekiston Respublikasi Favqulodda vaziyatlar vazirligini tashkil etish to‘g‘risida» 1996 yil 4 martdagi PF-1378-son Farmoniga muvofiq Vazirlar Mahkamasi qaror qiladi:

1. O‘zbekiston Respublikasi Favqulodda vaziyatlar vazirligi to‘g‘risidagi Nizom va uning tuzilmasi 1, 2, 2a, 2v-ilovalarga muvofiq tasdiqlansin. O‘zbekiston Respublikasi Favqulodda vaziyatlar vazirligi Mudofaa vazirligi, Moliya vazirligi, boshqa manfaatdor vazirliklar va idoralar bilan birgalikda bir oy muddatda Vazirlar Mahkamasiga favqulodda vaziyatlarda ishlarni bajarish uchun faoliyat ko‘rsatib turgan tuzilmalarning moddiy-texnika bazasini mustahkamlash, shuningdek, tashkil etilayotgan maxsus tuzilmalarning tuzilmasi, joylashishi, moliyaviy va moddiy-texnika ta’minoti to‘g‘risida taklif kiritsin.

2. Favqulodda vaziyatlar vazirligi tizimi xodimlarining umumiy soni 1785 nafar, shu jumladan ma’muriy-boshqaruv xodimlari soni 540 nafardan iborat etib belgilansin; Favqulodda vaziyatlar vazirligi markaziy apparati xodimlarining cheklangan soni 80 nafar, shu jumladan 35 nafar ofitserdan iborat etib belgilansin (binolarni qo‘riqlash va ularga xizmat ko‘rsatish xodimlaridan tashqari). Favqulodda vaziyatlar Vaziriga Vazirlikning tasdiqlangan tuzilmasiga xodimlarning belgilangan umumiy soni va mehnatga haq to‘lash fondi doirasida o‘zgartirishlar kiritishga ruxsat etilsin.

3. O‘zbekiston Respublikasi Favqulodda vaziyatlar vazirligiga Vazirning uch nafar o‘rinbosariga, shu jumladan bir nafar birinchi o‘rinbosariga hamda shaxsiy tarkibi O‘zbekiston Respublikasi Vazirlar Mahkamasi tomonidan tasdiqlanadigan 9 kishidan iborat hay’atga ega bo‘lishga ruxsat etilsin.

4. Qoraqalpog‘iston Respublikasi Vazirlar Kengashi, viloyatlar va Toshkent shahar, toifalangan shaharlar va tumanlar hokimliklarining favqulodda vaziyatlar boshqarmalari (bo‘limlari) namunaviy tuzilmalari 3, 4 va 5-ilovalarga muvofiq tasdiqlansin;

Favqulodda vaziyatlar bo‘yicha ko‘rsatib o‘tilgan boshqarmalar (bo‘limlar) va ularning bo‘linmalarini zarur binolar, telefon aloqasi va boshqa aloqa, mol-mulk, inventar, avtotransport bilan ta’minlash va ularning joylashishiga yordam ko‘rsatish uchun shaxsan javobgarlik Qoraqalpog‘iston Respublikasi Vazirlar Kengashi Raisiga, viloyatlar va Toshkent shahar, toifalangan shaharlar va tumanlar hokimlari zimmasiga yuklansin.

5. Vazirliklar, idoralar, korporatsiyalar, uyushmalar, birlashmalar va korxonalar tuzilmasidagi xalq xo‘jaligi ob’ektlarining fuqaro muhofazasi bo‘yicha mavjud xizmatlar va shtatdagi lavozimlarni tugatsinlar.

6. Belgilab qo‘yilsinki, Favqulodda vaziyatlar vazirligi tizimini mablag‘ bilan ta’minlash xarajatlari O‘zbekiston Respublikasi davlat byudjeti mablag‘lari hisobiga amalga oshiriladi.

7. Favqulodda vaziyatlar vazirligi harbiy xizmatchilari, xodimlari va mutaxassislari xizmatni o‘tash, mehnatga haq to‘lash, tibbiy va maishiy xizmat ko‘rsatish masalalarida, shu jumladan ularning oila a’zolari ham, O‘zbekiston Respublikasi Mudofaa vazirligi harbiy xizmatchilari, xodimlari va mutaxassislarining tegishli toifalariga tenglashtirilsinlar.

8. O‘zbekiston Respublikasi Mudofaa vazirligi, «O‘zkimyosanoat» uyushmasi, Toshkent shahar hokimligi Vazirlar Mahkamasining 1991 yil 25 oktyabrdagi 269-son qaroriga muvofiq Mudofaa vazirligi tarkibiga kirgan O‘zbekiston Respublikasi Mudofaa vazirligi Fuqaro mudofaasi va favqulodda vaziyatlar boshqarmasining 1996 yil 1 aprelgacha bo‘lgan holatiga ko‘ra xodimlari soni, muassasalari va o‘quv yurtlarini O‘zbekiston Respublikasi Fuqaro mudofaasi shtabining moddiy-texnika bazasi va asosiy fondlari bilan birgalikda, shuningdek 6-ilovaga muvofiq tashkilotlarni Favqulodda vaziyatlar vazirligiga bersinlar, Vazirlik esa ularni belgilangan tartibda qabul qilib olsin.

9. «O‘zbekiston havo yo‘llari» aviakompaniyasi Favqulodda vaziyatlar vazirligi bilan birgalikda 1996 yil 1 iyungacha shoshilinch ishga kirishuvchi aviatsiya otryadini tashkil etsin, uni belgilangan normalargacha zarur uchish apparatlari, uchuvchilar va texnik xodimlar bilan butlasin. Belgilab qo‘yilsinki, O‘zbekiston Respublikasi Favqulodda vaziyatlar vazirligi tomonidan uchish apparatlaridan foydalanish shartnoma asosida amalga oshiriladi.

10. «O‘zavtotrans» davlat korporatsiyasi Favqulodda vaziyatlar vazirligi bilan birgalikda 1 iyungacha mavjud avtokorxonalar negizida shoshilinch ishga kirishish respublika (Qoraqalpog‘iston Respublikasi), viloyatlar va Toshkent shahar avtotransport otryadlarini tuzsin, ularni zarur avtomobil texnikasi, tuzatish va xizmat ko‘rsatish bazasi bilan butlasin. Ko‘rsatib o‘tilgan avtotransport otryadlarini favqulodda vaziyatlar davrida jalb etish shartnoma asosida amalga oshirilsin.

11. O‘zbekiston Respublikasi Favqulodda vaziyatlar vazirligiga favqulodda vaziyatlar va ularning oqibatlarini bartaraf etish davrida: Mudofaa vazirligining fuqaro muhofazasi qo‘shinlari kuchlari va vositalariga; Ichki ishlar vazirligining harbiylashtirilgan yong‘indan saqlash respublika ixtisoslashtirilgan otryadiga; O‘zbekiston Respublikasi Sog‘liqni saqlash vazirligining SHoshilinch tibbiy yordam ko‘rsatish respublika markaziga; «O‘zavtotrans» davlat korporatsiyasining shoshilinch ishga kirishish avtotransport otryadlariga amaliy rahbarlik qilish yuklatilsin.

Oldingi tahrirga qarang.

O‘zbekiston Respublikasi Aloqa, axborotlashtirish va telekommunikatsiya texnologiyalari davlat qo‘mitasining Maxsus avariya-tiklash boshqarmasi (15361-harbiy qism) ga;

(11-bandning oltinchi xatboshisi O‘zbekiston Respublikasi Vazirlar Mahkamasining 2013 yil 23 avgustdagi 233-sonli qarori tahririda - O‘R QHT, 2013 y., 34-son, 458-modda)

12. «O‘zbekiston havo yo‘llari» aviakompaniyasi, «O‘zbekiston temir yo‘llari» kompaniyasi, «O‘zavtotrans» davlat korporatsiyasi Favqulodda vaziyatlar vazirligi buyurtmanomalari bo‘yicha favqulodda vaziyatlar oqibatlarini tugatish uchun zarur bo‘lgan avariya-qutqarish xizmati, harbiy qismlar kuchlari va vositalari hamda yuklarning favqulodda vaziyatlar yuzaga kelgan joylarga birinchi navbatda olib borilishi hamda qaytarib olib kelinishini ta’minlasinlar. Favqulodda vaziyatlar vazirligiga zarur bo‘lgan hollarda ushbu maqsadlar uchun O‘zbekiston Respublikasi boshqa vazirliklari va idoralarining transport vositalarini jalb qilishga ruxsat etilsin.

Oldingi tahrirga qarang.

13. O‘zbekiston Respublikasi Melioratsiya va suv xo‘jaligi vazirligi, Qishloq xo‘jaligi vazirligi, «O‘zbekenergo» davlat-aksiyadorlik kompaniyasi, Sog‘liqni saqlash vazirligi, Ichki ishlar vazirligi, Davlat geologiya qo‘mitasi, Davlat tabiatni muhofaza qilish qo‘mitasi, O‘zbekiston Respublikasi «Sanoatgeokontexnazorat» davlat inspeksiyasi, Fanlar akademiyasi, «O‘zbekneftgaz» korporatsiyasi, «O‘zkimyosanoat» davlat-aksiyadorlik kompaniyasi va «O‘zgidromet» markazi O‘zbekiston Respublikasi Favqulodda vaziyatlar vazirligini hududlar, ob’ektlardagi tabiiy-iqlim, ekologik, epidemiologik, epizootik, geologik va texnologik vaziyat hamda ularning yaqin davrda va istiqbolda o‘zgarishi ehtimollari to‘g‘risidagi axborot bilan muntazam ravishda, favqulodda vaziyatlarda esa darhol ta’minlasinlar O‘zbekiston Respublikasi Favqulodda vaziyatlar vazirligi ko‘rsatib o‘tilgan vazirliklar va idoralar bilan birgalikda ikki oy muddatda Favqulodda vaziyatlar vazirligi va uning joylardagi organlarini tegishli axborot bilan ta’minlash tartibi, muddatlari va shakllarini belgilasin. (13-bandning birinchi xatboshisi O‘zbekiston Respublikasi Vazirlar Mahkamasining 2010 yil 17 dekabrdagi 301-sonli qarori tahririda - O‘R QHT, 2010 y., 51-son, 486-modda)

14. O‘zbekiston Respublikasi Mudofaa vazirligi:

Favqulodda vaziyatlar vazirligini va uning bo‘linmalarini respublika aholisi va hududini muhofaza qilish tadbirlarini rejalashtirish, bevosita xavf to‘g‘risida davlat boshqaruv organlarini xabardor qilish uchun hamda alohida davr uchun boshlang‘ich ma’lumotlar bilan ta’minlasin;

Favqulodda vaziyatlar vazirligiga tegishli bo‘lgan qurol-yarog‘ va texnikani tuzatish ishlarini shartnoma asosida amalga oshirsin;

O‘zbekiston Respublikasi xabar berish markazlashtirilgan tizimi va Qoraqalpog‘iston Respublikasi, viloyatlar va Toshkent shahar xabar berish viloyat ichki tizimlarini Favqulodda vaziyatlar vazirligi balansiga bersin.

15. O‘zbekiston Respublikasi Favqulodda vaziyatlar vazirligi, Mudofaa vazirligi, Ichki ishlar vazirligi, Sog‘liqni saqlash vazirligi boshqa vazirliklar va idoralar bilan birgalikda 1996 yil 1 iyulgacha favqulodda vaziyatlarda davlat boshqaruvi organlari, konsernlar, korporatsiyalar va uyushmalarning o‘zaro hamkorligini tashkil etish, favqulodda vaziyatlarning oldini olish va favqulodda vaziyatlarda harakat qilish davlat tizimini (FVDT), shuningdek shoshilinch qutqarish xizmati yagona davlat tizimini yaratish to‘g‘risidagi takliflarni Vazirlar Mahkamasiga kiritsinlar.

16. «O‘zistiqbolstat» davlat qo‘mitasi, O‘zbekiston Respublikasi Moliya vazirligi O‘zbekiston Respublikasi Favqulodda vaziyatlar vazirligi ob’ektlari qurilishi va rekonstruksiya qilinishining adresli dasturlarini ko‘rib chiqsinlar.

17. O‘zbekiston Respublikasi Aloqa vazirligi, Milliy xavfsizlik xizmati, Vazirlar Mahkamasining Hukumat aloqasi xizmati Vazir va uning o‘rinbosarlariga hukumat ATSi, «VCH», hukumat shaharlararo va boshqa aloqa turlarini o‘rnatgan holda, Favqulodda vaziyatlar vazirligi boshqarmalari va bo‘limlarini telefonlashtirishni ta’minlasin.O‘zbekiston Respublikasi Favqulodda vaziyatlar vazirligiga favqulodda vaziyatlar davrida umumdavlat va idoraviy aloqa tarmoqlaridan ustun tartibda foydalanishga ruxsat etilsin.

18. «O‘zbekengilsanoat» davlat uyushmasi 1996 yilning ikkinchi choragida Favqulodda vaziyatlar vazirligining buyurtmanomasi bo‘yicha uning shaxsiy tarkibi uchun formali kiyim namunasini ishlab chiqsin va tayyorlab bersin.

19. O‘zbekiston Respublikasi Moliya vazirligi mazkur qarorni amalga oshirish uchun zarur mablag‘lar, to‘rtta avtomobil xarajatlari uchun limit ajratsin va O‘zbekiston Respublikasi Mudofaa vazirligini mablag‘ bilan ta’minlash rejasiga tegishli o‘zgartirishlar kiritsin.

20. O‘zbekiston Respublikasi Favqulodda vaziyatlar vazirligi, Moliya vazirligi, Davlat soliq qo‘mitasi bir oy muddatda Favqulodda vaziyatlar vazirligiga qarashli korxonalar va tashkilotlarga, bo‘sh qoladigan mablag‘larni ularning moddiy-texnika bazalarini rivojlantirishga yo‘naltirish maqsadida, soliq imtiyozlari berishni ko‘rib chiqsinlar va bu to‘g‘rida takliflar kiritsinlar.

21. Toshkent shahar hokimligi O‘zbekiston Respublikasi Favqulodda vaziyatlar vazirligiga Mustaqillik maydoni, 6-uydan joy ajratsin.

22. «Toshshaharyo‘lovchitrans» davlat uyushmasi O‘zbekiston Respublikasi Favqulodda vaziyatlar vazirligiga xizmat ko‘rsatish uchun 4 ta engil avtomashina ajratsin.

23. O‘zbekiston Respublikasi Vazirlar Mahkamasining Favqulodda vaziyatlar bo‘yicha komissiyasi kotibiyati Vazirlar Mahkamasining besh nafar xodimdan — mudir, mudir o‘rinbosari, ikkita katta ekspert va katta inspektordan iborat bo‘luvchi Favqulodda vaziyatlar bo‘limiga aylantirilsin, unga O‘zbekiston Respublikasi Favqulodda vaziyatlar vazirligi va davlat boshqaruv organlarining fuqaro muhofazasi, favqulodda vaziyatlarning oldini olish va ularning oqibatlarini tugatish masalalariga oid faoliyatlarini muvofiqlashtirib borish vazifasi yuklatilsin.

24. Fuqaro mudofaasi va favqulodda vaziyatlar bo‘yicha rahbar xodimlar tayyorlash respublika markazi O‘zbekiston Respublikasi Fuqaro muhofazasi institutiga aylantirilsin. Favqulodda vaziyatlar vazirligi Vazirlar Mahkamasiga O‘zbekiston Respublikasi Fuqaro muhofazasi institutining tuzilmasi va xodimlari soni to‘g‘risida ikki hafta muddatda taklif kiritsin.

25. O‘zbekiston Respublikasi Vazirlar Mahkamasining 1993 yil 2 apreldagi 169-son qarori o‘z kuchini yo‘qotgan deb hisoblansin.

26. O‘zbekiston Respublikasi Favqulodda vaziyatlar vazirligi va Adliya vazirligi O‘zbekiston Respublikasi Favqulodda vaziyatlar vazirligi faoliyatiga tegishli bo‘lgan amaldagi qonunchilik hujjatlari va normativ hujjatlarni o‘zgartirish hamda yangilarini chiqarish to‘g‘risida bir oy muddatda takliflar tayyorlasinlar va Vazirlar Mahkamasiga kiritsinlar.

27. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari - Favqulodda vaziyatlar vaziri I.H. Jo‘rabekov zimmasiga yuklansin.