Forum doirasida “Hamma narsada ozodalik: ekologik tozalik biznesni rivojlantirish vositasi” sessiyasi bo‘lib o‘tdi, unda Ekologiya vaziri maslahatchisi, "Yashil transformatsiya va iqlim o‘zgarishiga moslashish milliy markazi" direktori Suna Park, "ACWA Power"ning respublikadagi rahbari Jon Zaidi, “O‘zGidro” transformatsiyalarni amalga oshirish boshqarmasi boshlig‘i Pahlavon Nurmatov, Qozog‘istonning CAIER instituti ESG konsalting direktori Aygerim Ospanova va "Huawei Uzbekistan" direktori o‘rinbosari Suli Gayrat ishtirok etdi.

Suna Park o‘z nutqida 2030-yilga borib O‘zbekiston issiqxona gazlari emissiyasini YaIM birligiga 35 foizgacha kamaytirish rejalashtirilayotgani, shuningdek, mamlakatning “yashil” iqtisodiyotga bosqichma-bosqich o‘tishi muhimligini ta’kidladi.

“Davlat biznesga tadbirkorlik faoliyatini qanday yo'lga qo'yishni buyura olmaydi, lekin u asoslarni joriy qilishi mumkin. O'ylaymanki, talablarni emas, balki chiqindilar va boshqa ekologik ko'rsatkichlar bo'yicha standartlarni kuchaytirish kerak. Yirik ishlab chiqarish korxonalari bir yil ichida "yashil"ga aylana olmaydi, bu, albatta, katta xarajatlarga olib keladi. Ammo mamlakatning “yashil” iqtisodiyotga o‘tish jarayoni allaqachon boshlangan va biz qoidalarni takomillashtirish ustida ishlayapmiz”, — dedi vazir maslahatchisi.

Suna Park, shuningdek, biznes ishtirokisiz respublikada tadbirkorlikni ekologik toza sohaga aylantirish mumkin emasligini qayd etdi.

O‘z navbatida Pahlavon Nurmatov ESG tamoyillarini respublika tashkilotlarida joriy etish va tadbirkorlikni o‘zgartirish yo‘llari haqida gapirdi.

“Biz ESG tamoyillarini butun mamlakat bo‘ylab tatbiq etish ustida ishlayapmiz. Kelgusi besh yil ichida yashil ta'minot zanjirini rivojlantirish rejalashtirilgan. Masalan, qurilish firmalari yoki xizmat ko‘rsatish sohasidagi boshqa kompaniyalar barqaror rivojlanish uchun qulay shart-sharoitlar yaratish uchun ekologiya bo‘yicha xodimlar, xavfsizlik bo‘yicha mutaxassislar va boshqalarni jalb qilishlari shart bo‘ladi”, — dedi UzGidro transformatsiyasini amalga oshirish boshqarmasi boshlig‘i.

Forumda, shuningdek, ESG (Ekologik, ijtimoiy va korporativ boshqaruv) va barqaror rivojlanish tamoyillari, barqaror kun tartibini ilgari surishda xalqaro taraqqiyot institutlarining roli va ESG amaliyotining qarorlar qabul qilish jarayoniga ta’siri kabi mavzular muhokama qilindi.