Maslahatchilar tajriba almashishdi
2025-02-27 18:35:00 / Yangiliklar
2016-yilgacha sohaga oid birgina Qonun va bitta qaror mavjud bo‘lgan bo‘lsa, so‘nggi yetti yillikda tilimiz rivojiga oid yigirmaga yaqin me’yoriy hujjatlar qabul qilindi. Ayniqsa, Prezident farmoni bilan har bir hudud va tizimlarda rahbarning davlat tilini rivojlantirish bo‘yicha maslahatchilari lavozimi joriy etilganligi ushbu sohada amaliy ishlarning ham jadal sur’atlarda rivojlanishida muhim omil bo‘ldi.
Bu borada erishilgan ilg‘or tajribalarni ommalashtirish maqsadida Romitan tumanida viloyatdagi shahar va tumanlar hokimlarining tegishli masala bo‘yicha maslahatchilarining amaliy seminari o‘tkazildi.
Tumandagi tashkilot va korxonalar hamda markaziy ko‘chalarda ko‘rgazmali tarzda o‘tgan seminarda Romitan tumani hokimi maslahatchisi Gulandom G‘iyosova hududda amalga oshirilayotgan ilg‘or tajribalar bilan tanishtirdi.
Qayd etilishicha, hududdagi barcha korxona va tashkilotlarda ish yuritish to‘liq davlat tilida olib borilmoqda. Geografik obyektlarni nomlash va qayta nomlash borasidagi komissiya sa’y-harakati tufayli 2000 ga yaqin aholi punktlari va ularning tarkibiy qismlari to‘liq davlat reyestriga kiritildi.
O‘zbekiston Respublikasining “Davlat tili haqida”gi va “Reklama to‘g‘risida”gi Qonunlariga asosan tashqi yozuvlarni qonunchilik talablariga moslashtirish borasida ham qator ishlar amalga oshirilmoqda.
Albatta bu kabi erishilgan ijobiy natijalar respublika miqyosidagi turli tanlovlarda munosib e’tirof etilmoqda.
Xususan, 2024-yil yakuni bilan Romitan tumani “Qadring baland bo‘lsin, ona tilim!” Respublika tanlovida 2-o‘rinni egalladi.
Shuningdek seminarda Buxoro viloyati hokimining davlat tilini rivojlantirish masalalari bo‘yicha maslahatchisi Akbar Rustamov tomonidan shahar va tumanlar maslahatchilari oldida turgan dolzarb vazifalar, xususan, tashqi yozuvlarni davlat tili va reklama to‘g‘risidagi qonunchilik talablariga moslashtirish, xatlov natijasida aniqlangan nomsiz ko‘chalarni nomlash va boshqa masalalar yuzasidan tavsiya va takliflar berildi.
Seminar so‘nggida Vazirlar Mahkamasining Davlat tilini rivojlantirish departamenti tashabbusi bilan chop etilgan 2 jildlik “O‘zbekiston joy nomlari izohli lug‘ati” hamda 4 jildlik “Alisher Navoiy ensiklopediyasi” kitoblari taqdimoti bo‘lib o‘tdi.
Viloyat hokimligi matbuot xizmati