Buxoro viloyati hokimligi

Aslida, tomorqa har bir xonadon xazinasi, chunki, unda yoz faslida ochiq maydonda, qishda esa ixcham issiqxona sharoitida turli xildagi oziq-ovqat mahsulotlari yetishtirib, roʻzgʻor toʻkinligini bemalol taʼminlash imkoniyati bor.  

"Changaron" MFY ning Changaron qishlogʻida yashovchi Joʻrabek Hayitovning dehqonchilikdagi ish tajribasi yuqoridagi fikrimiz dalili. Mirishkor dehqon yigit avval boshida birgina moʻjaz issiqxonada moʻl hosil yetishtirish xadisini puxta oʻzlashtirgan boʻlsa, keyinchalik bu issiqxonani ikkita qilib, kengaytirib,  sabzavot mahsulotlari, shu bilan birga, sitrus menva yetishtirishning uddasidan chiqmoqda. Ish koʻzini bilgan dehqon ayni qish mavsumida issiqxonalari 6 sotix qismida 2 ming tup qizil bulgʻor qalampirining "ferari" navini ekib, moʻl va sifatli hosil koʻtarmoqda. Rangi qizil, turli salatlar, tuzlamalarga qoʻllaniladigan xaridorbop bulgʻor qalampirining bir kilogramini uydan 40  ming soʻmdan sotishga erishayotgan xonadon ahli yaxshigina daromadga ham ega boʻlmoqda.  Ularning moʻljali hademay 1 tonnadan oshiq mahsulotni aholi dasturxoniga yetkazib, shundan 25 million soʻmga yetkazib moddiy manfaat koʻrishdir.  

—Dastlab tomorqadan koʻzlangan hosilni olish maqsadida “Kaliforniya chuvalchangi” orqali biogumusni hosil qilib, ekin maydoniga kiritganmiz,— deydi Joʻrabek Hayitov.—Mahsulotimiz ham shunga yarasha moʻl boʻldi. Bundan avvalo roʻzgʻorimiz ehtiyojini qoplab, keyin bozorga olib chiqib sotib,  qilgan sarf-xarajatimizni bemalol bartaraf etamiz.    

Tomorqa egasi  ikkinchi issiqxonasida kartoshka yetishtirmoqda.  Bu borada ham uning harakatlari samarador. Shu bilan birga, Joʻrabek Hayitov tomorqasida plyonka ostida turli xildagi koʻkatlarni ham ekib saranjomlab, qishki mavsumda qoʻshimcha foyda koʻrmoqda. Qolaversa, tomorqa egalari limon, apelsin yetishtirishda ham yetarli tajribaga ega. Issiqxonasida 30 tup limon butasi parvarishlanmoqda. Bir soʻz bilan aytganda, vobkentlik Hayitovlar xonadonida tomorqa xoʻjaligi rivojlantirilayotgani oilaga fayzu-baraka olib kirmoqda.     

Umuman, “Bir mahalla — bir mahsulot” tamoyili asosida hozirda tumandagi  22 ta mahallada borayotgan tomorqa faoliyatini ixtisoslashtirish, jumladan, sabzavotchilik yoʻnalishida 12 ta, kartoshkachilikda 2 ta, polizchilikda 4 ta, meva-bogʻdorchilik, rezavor hamda sarxil meva yetishtirishda, parranda va chorvachilik tarmogʻida jami yigirmadan ortiq, qolaversa, anor va anjirchilikni rivojlantirishda alohida xoʻjaliklar shakllantirilayotgani ham aholi dasturxoni toʻkinligini taʼminlash, qishloq xoʻjaligida band boʻlgan issiqxonachi xonadonlar moddiy manfaatdorligini taʼminlashga xizmat qiladi.  

Viloyat hokimligi matbuot xizmati