Buxoroda harbiy xizmatchilarga yangi uylar topshirildi
2024-08-21 15:25:00 / Yangiliklar
Buxoro shahrining Amir Temur mavzesida harbiy xizmatchilar uchun “Buxoro trans terminal” qurilish-pudrat korxonasi binokorlari tomonidan barpo etilgan keng va yorug‘, barcha zarur shart-sharoit yaratilgan xonadonlarning o‘z egalariga toshirish marosimida viloyat va shahar hokimligi mutasaddilari, harbiy xizmatchilar va ularning oila a’zolari, gornizon qo‘mondonligi, jamoatchilik vakillari ishtirok etdi.
Tadbirda viloyat hokimining o‘rinbosari Mirali Hamroyev va boshqalar so‘zga chiqib, yangi xonadonlarga ko‘chib o‘tayotgan harbiy xizmatchilarni hamda ularning oila a’zolarini qutlashdi.
Davlatimiz rahbari tashabbusi bilan harbiylar va ularning oila a’zolarini ijtimoiy himoya qilishga alohida e’tibor qaratilayotganini, ushbu ko‘p qavatli uylarda ham barcha zarur qulayliklar yaratilgani ta’kidlandi.
Tadbir davomida harbiy xizmatchilarning oila a’zolari davlat rahbari tomonidan ularga yaratilayotgan keng imkoniyatlar, ko‘rsatilayotgan e’tibor va e’zozdan juda minnatdor ekanliklarini ta’kidlab o‘tdilar.
Tantanali marosimda harbiy xizmatchilarga xonadonlar kalitlari topshirildi.
Inshootni barpo etgan quruvchilarga ham alohida ehtirom ko‘rsatildi.
Shundan so‘ng lenta qirqilib, tadbirda yig‘ilganlar shinam va zamonaviy turar joyda yaratilgan shart-sharoit bilan yaqindan tanishdilar.
Qayd etish joizki, barpo etilgan mazkur inshoot umumiy qiymatining 25 foizi, ya’ni 5 milliard so‘mdan ziyod mablag‘ Mudofaa vazirligi tomonidan qoplab berilgani harbiylar va ular oilalari uchun katta imtiyoz bo‘ldi.
Muhimi, harbiylar uyida zarur jihozlar, oshxona mebeli va gaz plitasi, yuvinish tarmog‘i, yana eshik–derazalari o‘rnatib berilgan, emin-erkin yashash uchun barcha shart-sharoit muhayyo qilingan.
Bundan tashqari, alohida isitish tizimi, uylar oldida bolalar maydonchasi, suhbatlashish uchun joylar barpo etilganligi yashovchilarga katta qulayliklar yaratadi.
Qulayligi––uzoq yilga ipoteka krediti asosida rasmiylashtirib berilgan bu turar joy uchun harbiylar hisobidan oyiga to‘lanadigan badal miqdori ham ko‘p emas. Buning uchun ular Prezidentimizdan minnatdor.
Viloyat hokimligi matbuot xizmati