Salomatlik manbai: Quritilgan mevalarning qanday foydali xususiyatlari bor?
2025-03-17 16:50:00 / Yangiliklar
Quritilgan nok nafaqat shirin va mazali, balki ichak faoliyatini yaxshilash va organizmni toksinlardan tozalash xususiyatiga ega. Tarkibidagi antioksidantlar hujayralarni erkin radikallarning zararli ta’siridan himoya qiladi va ovqat hazm qilish jarayonini tartibga soladi.
O‘rik turshagi kaliyning boy manbai bo‘lib, yurak-qon tomir tizimi faoliyatini qo‘llab-quvvatlaydi va qon bosimini me’yorda ushlab turishga yordam beradi. Shuningdek, immunitetni mustahkamlash va organizmning umumiy chidamliligini oshirishda foydalidir.
Olxo‘ri qoqi oshqozon-ichak yo‘lining normal ishlashini ta’minlaydi, ichak peristaltikasini yaxshilab, ovqat hazm qilishni osonlashtiradi. Tarkibidagi A vitamini ko‘rish qobiliyatini yaxshilash bilan birga, yurak va jigar faoliyatiga ham ijobiy ta’sir ko‘rsatadi. U, ayniqsa, gipertoniya va revmatizm bilan og‘rigan kishilar uchun foydalidir.
Mayiz nerv tizimining faoliyatini yaxshilovchi tabiiy antidepressant bo‘lib, kayfiyatni ko‘taradi va ruhiy bosimni kamaytirishga yordam beradi. Tarkibidagi yod moddasi esa qalqonsimon bez faoliyatini qo‘llab-quvvatlab, gormonal muvozanatni saqlashga yordam beradi.
Quritilgan olcha hujayralarning erta qarishini sekinlashtiradi, terining elastikligini oshiradi va yoshartirish xususiyatiga ega. Shuningdek, yurak-qon tomir tizimini mustahkamlab, qon aylanishini yaxshilaydi hamda organizmning umumiy himoya kuchini oshiradi.