Unda O‘zbekiston Respublikasi Vazirlar Mahkamasi, Oliy ta’lim, fan va innovatsiyalar vazirligi hamda Qishloq xo‘jaligi vazirligi mas’ullari, universitet professor-o‘qituvchilari ishtirok etdi.

Yig‘ilishda vazir Ibrohim Abdurahmonov O‘zbekiston Respublikasi Vazirlar Mahkamasining qarori bilan Toshkent davlat agrar universitetiga rektor etib tayinlangan Narzullo Oblomuradovni jamoaga tanishtirdi.

Shuni alohida ta’kidlash kerakki, Qishloq xo‘jaligi vazirligi tizimidagi eng yirik oliy o‘quv yurti hisoblangan ushbu dargoh  mamlakatimiz agrar sohasi uchun yuqori malakali, o‘z sohasining yetuk mutaxassisi bo‘lgan kadrlarni tayyorlab beradi.

Tadbirda mamlakatimiz agrar tarmog‘ini rivojlantirishda muhim ahamiyat kasb etuvchi ushbu oliy o‘quv yurtining keyingi faoliyati, ta’lim jarayoniga xorijiy tajribalarni joriy etish borasida ham fikrlar o‘rtaga tashlanib, jamoa o‘rtasida o‘zaro hurmatni shakllantirish va ishga vijdonan yondashilgandagina kutilgan natijaga erishish mumkinligi ta’kidlandi.